ކޮވިޑް-19: ''ބައްދަލުވާ މީހުންގެ ލިސްޓު ނެގުން ރަނގަޅު''
ނަޝީދު ވަނީ ކޮވިޑް-19 އަށް ޓެސްޓު ކުރައްވާފައި
ލޯކަލް ކައުންސިލް އިންތިހާބުގެ ކެމްޕޭނުގައި ނަޝީދު ރަށަކަށް ކުރެއްވި ދަތުރުފުޅެއްގެ ތެރެއިން
ކޮންޓެކްޓް ޓްރޭސިން ހެދުމަށް ފަސޭހަކުރުމުގެ ގޮތުން ބައްދަލުވާ މީހުންގެ ލިސްޓު ނެގުން އެއީ ރަނގަޅު ކަމެއް ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާ ނިންމާލައްވަމުން ނަޝީދު ވަނީ މަޖިލީހުގެ މެމްބަރުންނަަށް މެސެޖެއް ދެއްވާފައެވެ. އެގޮތުން ކޮވިޑް-19 އާ ގުޅިގެން ހުރިހާ މެމްބަރުންވެސް ރައްކާތެރިކަމާއިއެކު ތިއްބެއްވުމަށް އިލްތިމާސް ކުރައްވަމުން ނަޝީދު ވިދާޅުވީ، އާއްމުންގެ ތެރޭގައި ފެތުރިފައިނެތަސް އެއަކީ ވަރަށް ސަމާލުވާންޖެހޭ ކަމެއް ކަމަށެވެ. ކޮވިޑް-19 ފެތުރިގެން ނުދަނީ ކޮންޓެކްޓް ޓްރޭސިންގެ ހަރަކާތް ރަނގަޅުކަމުން ކަމަށް ފާހަގަކުރައްވައި ނަޝީދު ވިދާޅުވީ،''ކޮންމެ ބޭފުޅަކުވެސް ކޮންމެ ދުވަހަކަ ބައްދަލުވާ މީހުން، އެއީ ލިސްޓު ކޮށްލަން މި ދުވަސްވަރު ރަނގަޅު ކަމެއް''ކަމަށެވެ.
މީގެކުރިން މަޖިލީހުގެ ޖަލްސާގައި ވާހަކަ ދައްކަވަމުން ނަޝީދު ވިދާޅުވެފައިވަނީ، ކޮވިޑް-19 ޝައްކުކުރެވޭ މީހަކު ހުންނަ ރަށުން އެހެން ރަށަކަށް ގެންދިޔުން އެއީ ބުއްދިވެރި ކަމެއް ނޫންކަމަށް ވިދާޅުވެފައެވެ. ކޮވިޑް-19 އާ ގުޅިގެން މަޖިލީހުގެ ޖަލްސާތައް ކުރިޔަށް ދަނީ ވީޑިއޯ ކޮންފަރެންސް މެދުވެރިކޮށެވެ. އެކަމާއި ގުޅޭ ގޮތުން އެމަނިކުފާނު ވިދާޅުވެފައިވަނީ، ވީޑިއޯ ކޮންފަރެންސް މެދުވެރިކޮށް މަޖިލީހުގެ ޖަލްސާތަކާއި މަސައްކަތްތައް ކުރަން ނިންމީ މިވަގުތު މުޅި ދުނިޔެއަށް ފެތުރެމުންދާ ނުރައްކާތެރި ކޮވިޑް-19 ރޯގާގެ ސަބަބުން، އެ ރޯގާ ފެތުރުނަ ނުދިނުމަށް ޑިރެކްޓަރ އޮފް ޕަބްލިކް ހެލްތް މައިމޫނާ އަބޫބަރު އަޅުއްވާފައިވާ ފިޔަވަޅުތަކާއި ނޭޝަނަލް އެމަޖެންސީ އޮޕަރޭޝަން ސެންޓަރުން އަޅާފައިވާ ފިޔަވަޅުތަކަށް އިހުތިރާމު ކުރުމުގެ ގޮތުން ކަމަށެވެ.
އިނގިރޭސިވިލާތުގައި ޗުއްޓީ ހޭދަކޮށްލެއްވުމަށް ފަހު ރައްޖެ ވަޑައިގަތުމުން ނަޝީދު ވަނީ ކޮވިޑް-19 އަށް ޓެސްޓު ކުރައްވާފައެވެ. އެމަނިކުފާނުގެ ޓެސްޓު ނަތިއްޖާ ނެގެޓިވްއެވެ.
