ކޮވިޑް-19: ޓްރިވެންޑްރަމްގައި ތިބި ދިވެހިން ގެންނަން 11 ވަނަ ދުވަހު ފުލައިޓެއް ބާއްވަނީ

އިންޑިއާ ލޮކްޑައުންއަށް ދިއުމާއެކު އެގައުމުގައި ތާށިވެފައި ތިބި ދިވެހިން ގެނައުމަށް ކުރާ މަސައްކަތުގެ ދަށުން ޓްރެވެންޑްރަމްގައި ތިބި ދިވެހިން ގެންނަން މި މަހުގެ 11 ވަނަ ދުވަހު ފުލައިޓެއް ބާއްވަން ގައުމީ އެއަރލައިން މޯލްޑިވިއަނުން ނިންމައިފިއެވެ.

ނެޝަނަލް އެމަރޖެންސީ އޮޕަރޭޝަން ސެންޓަރުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ގައުމީ އެއަރލައިން މޯލްޑިވިންގެ ޕީއާރް އަދި ކޮމިއުނިކޭޝަން މެނޭޖަރ މޫސާ ވަސީމް ވިދާޅުވީ މި މަހުގެ 11 ވަނަ ދުވަހު ޓްރިވެންޑްރަމްގައި ތިބި ދިވެހިން މާލެ ގެނައުމަށް ފްލައިޓެއް ބާއްވާނެ ކަމަށާއި، މި މީހުންނަކީ 21 ވަނަ ދުވަހު ރާއްޖެ އައުމަށް ޓިކެޓް ނެގިފަހުން ފުލައިޓް ކެންސަލްވެގެން ނުގެނެވި ތިބި މީހުން ކަމަށެވެ.

މޯލްޑިވިއަނުން ވަނީ ބޭރަށް ކުރާ ދަތުރުތަކުގެ އަގުތައް ހާމަކޮށްފައެވެ. އެގޮތުން ސްރީ ލަންކާގެ ކޮލަމްބޯގެ ޓިކެޓްގެ އަގަކީ 220 ޑޮލަރެވެ. އިންޑިއާގެ ކޮޗިންއަށް 149 ޑޮލަރަށް ޓިކެޓް ހަމަޖައްސަފައިވާ އިރު ޓްރިވެންޑްރަމްއަށް ހަމަޖައްސަފައިވަނީ ޓިކެޓެއް 199 ޑޮލަރަށެވެ. މީގެ އިތުރުން މެލޭޝިއާގެ ކުއާލަލަމްޕޫރުގެ ޓިކެޓްގެ އަގަކީ 330 ޑޮލަރެވެ.