ފިޔާ، އަލުވި، ބިހުގެ އަގު ކޮންޓްރޯލް ކުރެވޭ ބީދައިން ގޭގެ ކުލިވެސް ކޮންޓްރޯލް ކުރެވެންޖެހޭ: އަލީ ހުސައިން
މާލޭގައި ދިރިއުޅޭ 60 ޕަސެންޓަށް ވުރެ ގިނަ މީހުން ދިރިއުޅެނީ ކުށްޔަށް
މީހަކު ފިޔާތަކެއް ސާފުކުރަނީ
ފިޔާ، އަލުވި، ބިހުގެ އަގުކޮށް ކޮންޓްރޯލް ކުރާ ބީދައިން، ގޭގެ ކުލި ވެސް ކޮންޓްރޯލް ކުރެވެންޖެހޭ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ވިދާޅުވެއްޖެ އެވެ.
އަލީ ހުސައިން ކުރެއްވި ޓްވީޓެއްގައި ވިދާޅުވެފައިވަނީ، ފިޔާ، ބިސް، އަލުވި، މުގު އަދި ޓެކްސީގެ އަގު ކޮންޓްރޯލު ކުރާ ބީދައިން ކުލިވެސް ކޮންޓްރޯލު ކުރެެވެން އެބަޖެހޭ ކަމަށެވެ. އަލީ ހުސައިން ވިދާޅުވީ، ބޭންކު ލޯނު ދައްކާ ނިމިފައިހުރި ބިލްޑިންގްތައްވެސް މަދެއް ނޫން ކަމަށާއި، ޑިމާންޑް އެންޑް ސަޕްލައިގެ އުސޫލު ތަކަށްވުރެ ރައްޔިތުންގެ އަސާސީ ބޭނުންތައް މާ މުހިންމު ކަމަށެވެ.
ފިޔާ، އަލުވި ބިހަކީ އެކި ދުވަސްވަރު ވަރަށް ތަފާތު އަގުތަކުގައި ވިއްކާ ދިވެހިން ކެއުމަށް ބޭނުންކުރާ އެންމެ އަސާސީ ބާވަތްތަކުގެ ތެރޭގައި ހިމެނޭ ތަކެއްޗެވެ. ހާާއްސަކޮށް، ރޯދަމަހާ ދިމާކޮށް، މިފަދަ ކާބޯތަކެތީގެ އަގުތަށް އިންތިހާއަށް މައްޗަށްދެއެވެ. އެގޮތަށް އަގުތައް މައްޗަށްދާއިރު، ސަރުކާރުން އަގު ކޮންޓްރޯލް ކުރުމަށް، އެސްޓީއޯ މެދުވެރިކޮށް، އެތަކެތި އެތެރެކޮށް، ކޮންޓްރޯލް އަގެއްގައި ވިއްކަމުން ދެއެވެ.
ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮވިޑް-19 އާގުޅިގެން ކާބާތަކެއްޗާއި ބޭހާއި އަދިވެސް އަސާސީ ބައެއް ތަކެތީގެ އަގުތަށް ބޮޑު ކުރަމުންދާތީ އިކޮނޮމިކް މިނިސްޓްރީން ވަނީ އެފަދަ ތަކެތި އަގު ބޮޑުކޮށް ވިއްކާ ފަރާތްތަކުން ޖޫރިމަނާ ކުރާނެ ކަމަށް ބުނެފަ އެވެ. އަދި ރާއްޖޭގެ މާކެޓުގައި ފިޔާ، އަލުވި އަދި ބިސް، ބޮޑު އަގުގައި ވިއްކާ ނަމަ އެއްލައްކަ ރުފިޔާއިން ޖޫރިމަނާ ކުރެވޭނެ ކަމަށް އިކޮނޮމިކް މިނިސްޓްރީން ވަނީ ބުނެފަ އެވެ.
އިކޮނޮމިކް މިނިސްޓްރީން ނެރުނު ބަޔާނެއްގައި ބުނެފައި ވަނީ މުދާ ގަންނަ ފަރާތްތަކާ ހިދުމަތް ލިބިގަންނަ ފަރާތްތައް ހިމާޔަތްކުރުމުގެ ގާނޫނުގެ ހަތް ވަނަ މާއްދާގެ (ހ) ގެ ދަށުން މިވަގުތު ގައުމުގެ އިގްތިސާދީ ހާލަތު ހުރިގޮތުން ބައެއް ތަކެތީގެ އަގު ކޮންޓްރޯލްކުރުމަށް ނިންމާފައިވާ ކަމަށެވެ.
ޓެކްސީގެ އަގުތަކަކީ ވެސް ޓްރާންސްޕޯޓް މިނިސްޓްރީން ކަނޑައަޅާ އަގެއްގައި ދޭންޖެހޭ ހިދްމަތެކެވެ.
މާލޭގައި ދިރިއުޅޭ 60 ޕަސެންޓް މީހުން ދިރިއުޅޭނީ ކުށްޔަށެވެ. ކުލީގެ އަގުބޮޑު ވާހަކައަކީ އަބަދުވެސް ދައްކަމުންދާ ވާހަކަ އެކެވެ.
ސޯސަލް ހައުންސިންގެ ޕްރޮގްރާމްގެ ދަށުން، ބޯހިޔާވަހިކަމަށް ހައްލެއް ނުގެނެވި، މާލޭގެ ކުލީގެ އަގު ހެޔޮނުވާނެ ކަމަށް އިމާރާތްކުރުމުގައި އުޅޭ ބައެއް ފަރާތްތަކުން ދަނީ ބުނަމުންނެވެ.
