ސޮން އަސްކަރީ ޚިދުމަތަށް

ކޮރޯނާވައިރަސް (ކޮވިޑް-19) ގެ ސަބަބުން ފުޓްބޯޅަ ސީޒަން ހުއްޓިފައި އޮތުމުން، ޓޮޓެންހަމް ހޮޓްސްޕާސް އަށް ކުޅެމުން އަންނަ ދެކުނު ކޮރެއާގެ ފޯވާޑް ސޮން ހެއުން-މިން އެގައުމުގެ ގާނޫނުގައިވާ ކަންތައް ފުރިހަމަ ކުރުމަށް އަސްކަރީ ޚިދުމަތުގައި ބައިވެރިވާން ނިންމައިފިއެވެ.

ސީޒަންގެ މެދުތެރެއިން އަތަށް ލިބުނު އަނިޔާ އާއެކު މި ސީޒަނުގައި އޭނާއަށް ދެން ނުކުޅެވޭނެ ކަމަށް ވަނީ ރިޕޯޓުކޮށްފައެވެ. އެކަމަކު ޔޫރަޕުގައި ހަލުވިކަމާއިއެކު ފެތުރެމުން އަންނަ ކޮވިޑް-19 ގެ ސަބަބުން އިނގިރޭސި ޕްރިމިއާ ލީގުގެ ކުޅުން ވަނީ މާޗު މަހުގެ 12 ވަނަ ދުވަހުން ފެށިގެން މެދުކަނޑާލާފައެވެ.

ދެކުނު ކޮރެއާގެ ގާނޫނުގައި ވަނީ އެގައުމުގެ ފިރިހެނުން، އުމުރުން 28 އަހަރު ފުރުމުގެ ކުރިން އަސްކަރިއްޔާގައި ދެ އަހަރު ފުރިހަމަ ކުރަން ޖެހޭނެ ކަމަށެވެ. އެކަމަކު ގައުމަށް އެކި ރޮނގު ރޮނގުން ރަންވަނަ ހޯދައިދޭ ފަރާތްތަކަށް އެގައުމުގެ ސަރުކާރުން ކޮންމެސް ވަރެއްގެ ލުޔެއް ދެޔެވެ. އެގޮތުން 2018 ވަނަ އަހަރު އޭޝިއަން ގޭމްސް ފުޓްބޯޅަ އިވެންޓުން ސޮންގެ ކެޕްޓަން ކަމުގެ ދަށުން ކޮރެއާއިން ވަނީ ރަން މެޑަލް ކާމިޔާބުކޮށްފައެވެ. އެހެންކަމުން އެ ގައުމުގެ ސަރުކާރުން ވަނީ ރަން މެޑަލް ހޯދި ޓީމުގެ ކުޅުންތެރިންނަށް ލުޔެއް ދޭން ނިންމާފައެވެ. އެގޮތުން ސޮން އަށް ދިން ލުޔަކީ ހަތަރު ހަފްތާ ވަންދެން އަސްކަރީ ޚިދުމަތުގައި މަސައްކަތް ކުރުމެވެ.

މީގެ ދެ ހަފްތާ ކުރިން ޓޮޓެންހަމުން ވަނީ ސޮން އަށް އަމިއްލަ ސަބަބުތަކަށްޓަކައި ވީއްލުމަށް ނިންމައިފައިވާ ކަމަށް ބުނެފައެވެ. މީޑިއާ ރިޕޯޓުތައް ބުނާ ގޮތުން ސޮން ވީއްލުމަށް ނިންމާފައިވަނީ އަސްކަރީ ޚިދުމަތަށް ގުޅުމަށް އޭނާ އެދުމުންނެވެ. އަދި މީޑިއާ ރިޕޯޓުތައް ބުނާ ގޮތުން އުމުރުން 27 އަހަރުގެ ސޮން މިހާރު އަންނަނީ އަސްކަރީ ޚިދުމަތަށް ގުޅުމުގެ ގޮތުން ފިޓްވުމަށް ގޭގައި ޓްރެއިނިން ފަށާފައެވެ.

ދެކުނު ކޮރެއާއިން ވަނީ މީގެ ކުރިން ދެ ފަހަރެއްގެ މަތިން އެގައުމުގެ ކުޅިވަރު ދެ ޓީމަކަށް އަސްކަރީ ޚިދުމަތަށް ލުޔެއް ދީފައެވެ.