ދެކުނު ކޮރެއާގެ އަސްކަރީ ތަމްރީނުތަކުން ރަނގަޅު ތަޖުރިބާއެއް ލިބުނު ކަމަށް ޓޮޓެންހަމް ހޮޓްސްޕާގެ ފޯވާޑް ސޮން ހުއެން-މިން ބުނެފި އެވެ.

ކޮރޯނާވައިރަސް (ކޮވިޑް-19) ގެ ސަބަބުން ފުޓްބޯޅަ ސީޒަން ހުއްޓިފައި އޮތުމުން، ސޮން ވަނީ ދެކުނު ކޮރެއާގެ ގާނޫނުގައިވާ ކަންތައް ފުރިހަމަ ކުރުމަށް އަސްކަރީ ޚިދުމަތުގައި ބައިވެރިވެފައެވެ. ސޮން ވަނީ ތިން ހަފުތާގެ އަސްކަރީ ތަމްރީނުތަކުގައި އެ ޔުނިޓުގެ އެންމެ ރަނގަޅު ފަސް ރެކްރޫޓުންގެ ތެރޭގައި ހިމެނިފައެވެ.

އަސްކަރީ ތަމްރީނުތަކަށްފަހު މެއި މަހުގެ މެދުތެރޭގައި ސޮން އެނބުރި އިންގްލެންޑަށް ދިޔައިރު، މިހާރު ވަނީ އޭނާ ވަނީ ޓޮޓެންހަމްގެ ފަރިތަކުރުންތަކަށް ނުކުމެފައެވެ.

ދާދި ފަހުން ދިން އިންޓަވިއުއެއްގައި ސޮން ބުނީ ތިން ހަފުތާއަށް ކުރިއަށް ގެންދިޔަ އަސްކަރީ ތަމްރީނުތަކަކީ ލިބުނު ރަނގަޅު ތަޖުރިބާއެއް ކަމަށެވެ. ތަމްރީނުތަކުގެ ތަފުސީލު ހިއްސާ ނުކުރި ނަމަވެސް، ސޮން ވަނީ އެ ތިން ހަފުތާ އަކީ ވަރަށް ބުރަކޮށް ދިޔަ ތިން ހަފުތާ ކަމަށް ބުނެފައެވެ.

ސޮން އިތުރަށް ބުނީ ތަމްރީނުތަކުގައި އުޅުންއިރު ޔުނިޓްގެ މީހުންނާ ވަރަށް ގާތް ގުޅުމެއް އުފެދުނު ކަމަށާއި، ބުރަކޮށް އުޅެން ޖެހުނު ނަމަވެސް، އެ މީހުންގެ ފަރާތުން ވަރަށް ބޮޑަށް އެއްބާރުލުމެއް ލިބުނު ކަމަށެވެ.

ކޮވިޑް-19 އާ ގުޅިގެން މާޗު މަހުގެ އަށްވަނަ ދުވަހު އިނގިރޭސި ޕްރިމިއާ ލީގު މެދުކަނޑާލިއިރު، ފެބްރުއަރީ މަހު ސޮންގެ އަތަށް ލިބުނު ސީރިއަސް އަނިޔާ އިން އޭނާ މިހާރު ވަނީ އެއްކޮށް ރަނގަޅުވެފައެވެ. އަދި މިހާރު އަންނަނީ ޓޮޓެންހަމްގެ ފަރިތަކުރުންތަކުގައި ބައިވެރިވަމުންނެވެ.

މީގެ ކުރިން ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރުމުގެ ހުއްދަ ޕްރިމިއާ ލީގުގެ ކްލަބުތަކަށް ދީފައިވާއިރު، މިމަހުގެ 17 ވަނަ ދުވަހު ލީގު އަލުން ފަށަން މިހާރު ވަނީ ނިންމާފައެވެ.