އަސްކަރީ ތަމްރީން ބަލަން އެއްނުވާން ސޮން އެދިއްޖެ

އަސްކަރީ ތަމްރީނަށް ނުކުތުމުން މަންޒަރު ބަލަން މީހުން އެއްނުވާން، ދެކުނު ކޮރެއާ އާއި ޓޮޓެންހަމް ހޮޓްސްޕާގެ ފޯވާޑް ސޮން ހުއެން-މިން އެދިއްޖެ އެވެ.

ކޮރޯނާވައިރަސް (ކޮވިޑް-19) ގެ ސަބަބުން ފުޓްބޯޅަ ސީޒަން ހުއްޓިފައި އޮތުމުން، ސޮން ވަނީ އެގައުމުގެ ގާނޫނުގައިވާ ކަންތައް ފުރިހަމަ ކުރުމަށް އަސްކަރީ ޚިދުމަތުގައި ބައިވެރިވާން ނިންމާފައެވެ.

ދެކުނު ކޮރެއާގެ ގާނޫނުގައި ވަނީ އެގައުމުގެ ފިރިހެނުން، އުމުރުން 28 އަހަރު ފުރުމުގެ ކުރިން އަސްކަރިއްޔާގައި ދެ އަހަރު ފުރިހަމަ ކުރަން ޖެހޭނެ ކަމަށެވެ. އެކަމަކު ގައުމަށް އެކި ރޮނގު ރޮނގުން ރަންވަނަ ހޯދައިދޭ ފަރާތްތަކަށް އެގައުމުގެ ސަރުކާރުން ކޮންމެސް ވަރެއްގެ ލުޔެއް ދެޔެވެ. އެގޮތުން 2018 ވަނަ އަހަރު އޭޝިއަން ގޭމްސް ފުޓްބޯޅަ އިވެންޓުން ސޮންގެ ކެޕްޓަން ކަމުގެ ދަށުން ކޮރެއާއިން ވަނީ ރަން މެޑަލް ކާމިޔާބުކޮށްފައެވެ. އެހެންކަމުން އެ ގައުމުގެ ސަރުކާރުން ވަނީ ރަން މެޑަލް ހޯދި ޓީމުގެ ކުޅުންތެރިންނަށް ލުޔެއް ދޭން ނިންމާފައެވެ. އެގޮތުން ސޮން އަށް ދިން ލުޔަކީ ހަތަރު ހަފްތާ ވަންދެން އަސްކަރީ ޚިދުމަތުގައި މަސައްކަތް ކުރުމެވެ.

މިހާރު އޮތްގޮތުން އުމުރުން 27 އަހަރުގެ ސޮން އަށް ހަމަޖެހިފައި އޮތީ މި މަހު 20 ވަނަ ދުވަހު ކޮރެއާގެ ޖެޖޫގައި ތިން ހަފްތާގެ އަސްކަރީ ތަމްރީނުތަކަށް ފަހު، އާންމުންގެ ޚިދުމަތުގައި ވަކި މުއްދަތެއް ފުރިހަމަކުރުމަށެވެ.

ކޮރެއާގެ މީޑިއާ އަކަށް ދިން އިންޓަވިއުއެއްގައި ސޮން ބުނީ ކޮވިޑް-19 ފެތުރޭތީ މީހުން އެއްވެ އުޅުން ސަރުކާރުން މަނާކޮށްފައިވާ ކަމަށާއި، އޭނާގެ ތަމްރީނުތައް ފެށުމުން މަންޒަރު ބަލަން ރައްޔިތުން ތަންތަނަށް އެއް ނުވާން އެދޭ ކަމަށެވެ. އަދި މި ވައިރަހުގެ ނުރައްކަލުން ސަލާމަތްވެވޭނީ އެންމެން އެކުގައި މަސައްކަތް ކޮށްގެން ކަމަށްވެސް ސޮން ވަނީ ބުނެފައެވެ.

ކޮވިޑް-19 އަށް ދެކުނު ކޮރެއާ އިން 10،512 މީހުން ޕޮޒިޓިވްވެފައިވާއިރު، އެގައުމުން މިހާތަނަށް މި ވައިރަސް ޖެހިގެން 214 މީހަކު ވަނީ މަރުވެފައެވެ.