ދަނޑުވެރިކަމުގެ އުފެއްދުންތެރިކަން އިތުރުކުރުމަށް މި ދަނޑިވަޅުގައި އިތުރަށް މަސައްކަތް ކުރެއްވުމަށް މިނިސްޓަރ އޮފް ފިޝަރީޒް އެންޑް މެރިން ރިސޯސަސް ޒަހާ ވަހީދު އިލްތިމާސްކުރައްވައިފިއެވެ.

އެސްޓީއޯގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ ޒަހާ ވަހީދު ވިދާޅުވީ ދަނޑުވެރިންނަށް ލުއިތަކެއް ހޯދައިދިނުމަށް އިކޮނޮމިކް މިނިސްޓްރީއާއެކު މަޝްވަރާތައް ކުރަމުން އަންނަކަމަށެވެ. އަދި ދަނޑުވެރިންނަށްކުރާ އިލްތިމާސްއަކީ އުފައްދާ އުފެއްދުންތައް އިތުރުކުރުން ކަމަށް މިނިސްޓަރ ވިދާޅުވިއެވެ.

އެގޮތުން ރާއްޖޭގައި ޒަމާނުއްސުރެ އުފައްދަމުން އަންނަ ފަލަމަޑީގެ ބާވަތްތައް އުފައްދާ އުފެއްދުން އިތުރުކުރަންޖެހޭކަމަށް މިނިސްޓަރ ވިދާޅުވިއެވެ. އަދި ފަލަމަޑީގެ ބައެއް ބާވަތްތައް ހެއްދުމަށް ގޮންޖެހުންތަކެއް ހުރި ނަމަވެސް އައު ކްލައިމެޓް ރެޒިލިއަންޓް ވެރައިޓީތަކެއް ގެނެސް މުޑުވައް އިތުރުކުރުމުގެ މަސައްކަތް ކުރިޔަށް ގެންދާކަމަށެވެ.

މިނިސްޓަރ ވިދާޅުވީ ސަރުކާރުގެ ސިޔާސަތަކީ ހުރިހާ ދަނޑުވެރިން ވިއްކާ އެއްޗެހި ގަތުންކަމަށެވެ. އަދި ދަނޑުވެރިންނަށް މެދުކެނޑުމެއް ނެތި އާމްދަނީ ލިބޭނެ ގޮތްތަކެއް ކަނޑައެޅުންކަމަށް މިނިސްޓަރ ވިދާޅުވިއެވެ.

ނޫސްވެރިންގެ ބައްދަލުވުމުގައި އިތުރަށް ވާހަކަދައްކަވަމުން މިނިސްޓަރ އިތުރަށް ވިދާޅުވީ، ފުޅާ ދާއިރާއެއްގައި ދަނޑުވެރިކަން ކުރުމަށް މިހާރު ދޫކޮށްފައިވާ ފަޅުރަށްރަށުން އުފެއްދޭ މިންވަރާއި މާކެޓަށް ނެރެވޭ މިންވަރު އިތުރުކުރުމަށްޓަކައި، ދަނޑުވެރިންނާއި މަޝްވަރާކުރަމުންދާކަމަށެވެ.

އޭގެ އިތުރުން، ދަނޑުވެރިންގެ އުފެއްދުންތެރިކަން އިތުރުކޮށް ރާއްޖެއިން ބޭރަށް ބަރޯސާވާ މިންވަރު މަދުކުރުމަށްޓަކައި ސަރުކާރުން ބުރަ މަސައްކަތްތަކެއް ކުރަމުން ގެންދާކަމަށް މިނިސްޓަރ ވިދާޅުވިއެވެ. އިތުރަށް ވިދާޅުވީ އިމްޕޯޓު ސަބްސިޓިއުޝަން ޕްރޮގުރާމްގެ ދަށުން މިކަމަށް އިތުރު އަހައްމިއްޔަތުކަމެއް ދެއްވާނެކަމަށެވެ.

ކޮވިޑް-19 ގެ ސަބަބުން މުޅި ދުނިޔެއަށް ކުރިމަތިވެފައިވާ ހާލަތާއި ގުޅިގެން ރާއްޖެއަށާއި ދުނިޔޭގެ އެކި ގައުމުތަކަށް ވަނީ ކާބޯތަކެތި ލިބުމުގައި ދަތިތަކާ ކުރިމަތިލާން ޖެހިފައެވެ. ގިނަ ގައުމުތަކެއް ލޮކްޑައުން ކުރުމާއި، ފްލައިޓްތައް މަޑުޖައްސާލުމުން ބައެއް ކާބޯތަކެތީގެ ބާވަތްތައް ލިބުމުގައި ބޮޑެތި ދަތިތަކެއް އިމްޕޯޓަރުންނަށް އަންނަނީ ކުރިމަތިވަމުންނެވެ.

ރާއްޖެއަކީ ކާބޯތަކެތި ގަންނަން ބޮޑު ހޭދައެއް ކުރާ ގައުމެކެވެ. 2018 ގެ ތަފާސްހިސާބުތަކަށް ބަލާލާ ކަމުގައިވީނަމަވެސް، ގޭބިސީތަކުގައި ބޭނުންކުރުމަށް، 4.5 ބިލިއަނަށް ވުރެ ގިނަ ރުފިޔާގެ ކާބޯތަކެތި ވަނީ އެތެރެކޮށްފައެވެ. މިއީ ބޮލަކަށް ޖެހޭ ނިސްބަތުން ބަލާނަމަ، ދުނިޔޭގެ ނިސްބަތުން ވެސް ބޮޑު އަދަދެކެވެ.