ވިސާމް ގޮވާލެއްވީ އިންތިހާބުގައި ވާދަކުރާ ސިވިލް ސާވެންޓުންގެ ސަސްޕެންޝަން އުވާލުމަށް
ކުރިއަށް އޮތްތާގައި އެކަމަށް ހައްލެއް ހޯދުމަށް މަޖިލީހުން ވެސް މަސައްކަތް ކުރާނެ
ގަމު ދާއިރާގެ މެމްބަރު މުހައްމަދު ވިސާމް
ލޯކަލް ކައުންސިލް އިންތިހާބުގައި ވާދަކުރާ ސިވިލް ސާވެންޓުންގެ ސަސްޕެންޝަން އުވާލުމަށް ގަމު ދާއިރާގެ މެމްބަރު މުހައްމަދު ވިސާމް ގޮވާލައްވައިފިއެވެ.
ބުދަ ދުވަހުގެ މަޖިލީހުގެ ޖަލްސާގައި ވާހަކަދައްކަވަމުން ވިސާމް ވިދާޅުވީ ކޮވިޑް-19 ގެ ބިރުވެރިކަމާއި ކުރިމަތިވީ، ލޯކަލް ކައުންސިލް އިންތިހާބާއި ކުރިމަތިލައިގެން ތިއްބާ ކަމަށެވެ.
ސިވިލް ސަރވިސްގައި މަސައްކަތްކުރާ 204 ސިވިލް ސަރވެންޓުން މި އިންތިހާބުގައި ކެންޑިޑޭޓުންގެ ގޮތުގައި ވާދަކުރައްވާކަމަށް ވިސާމް ވިދާޅުވިއެވެ. އަދި މިހާރު އެ ކެންޑިޑޭޓުން ތިބީ ސަސްޕެންޝަންގައިކަން ފާހަގަކުރައްވާ މެމްބަރު ވިދާޅުވީ ސަސްޕެންޝަން ދިގު ދެމިގެންދާނަމަ އެ 204 ކެންޑިޑޭޓުންގެ އާއިލާތަކަށްވެސް ގެއްލުންވާނެ ކަމަށެވެ.
އެހެންކަމުން އެ ފަރާތްްތަކުގެ ސަސްޕެންޝަން ބާތިލު ކުރުމަށް ވިސާމް ގޮވާލެއްވިއެވެ. ވިސާމް ވިދާޅުވީ ކުރިއަށް އޮތްތާގައި އެކަމަށް ހައްލެއް ހޯދުމަށް މަޖިލީހުންވެސް މަސައްކަތް ކުރައްވާނެ ކަމަށެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބު އެންމެ ފުރަތަމަ ބާއްވަން ހަމަޖެހިފައި އޮތް ތާރީޚަކީ އެޕްރިލް މަހުގެ 4 އެވެ. ނަމަވެސް، ފަހުން އިލެކްޝަންސް ކޮމިޝަނުން ވަނީ އިންތިޚާބު ބާއްވާ ތާރީޚު އެޕްރިލް 18 އަށް ބަދަލުކޮށްފައެވެ. އަދި އެޔަށްފަހު، އެ ތާރީހު އިތުރަށް ފަސްކުރުމަށް އަންނަނީ މަޝްވަރާތައްކުރަމުންނެވެ.
