މިއީ ރައްޔިތުންގެ ގާތުގައި ރައްޔިތުންގެ ވަކީލުން ތިބެންވީ ވަގުތު: މަޖިލީހުގެ ރައީސް
މަޖިލީހުގެ ރައީސް ވިދާޅުވީ މިވަގުތު މެމްބަރުން ތިއްބަވަންޖެހޭނީ ރައްޔިތުންނާ ފަސޭހައިން ގުޅޭގޮތަށް ކަމަށް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައްޔިތުންގެ މަޖިލީހުގެ މެންބަރުންނަކީ ރައްޔިތުންގެ ވަކީލުންކަމަށާއި، ރައްޔިތުންނަށް ކަންބޮޑުވުމެއް ކުރިމަތިވާ ކޮންމެފަހަރަކު ރައްޔިތުން އެންމެ ފުރަތަމަ ގުޅާނެ އެއް ފަރާތަކީ ރައްޔިތުންގެ މަޖިލީހުގެ މެންބަރުންކަމަށް، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
އޮންލައިންކޮށް ފުރަތަމަ ފަހަރަށް ކުރިޔަށްގެންދިޔަ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މަޖިލީހުގެ ރައީސް ވިދާޅުވީ މިވަގުތު މެންބަރުން ތިއްބަވަންޖެހޭނީ ރައްޔިތުންނާ ފަސޭހައިން ގުޅޭގޮތަށް އަބަދުވެސް ރައްޔިތުންގެ ޝަކުވާ އަޑުއަހަން ތައްޔާރަށްކަމަށެވެ.
މީގެއިތުރުން ރައީސް ނަޝީދު ވިދާޅުވީ ރައްޔިތުންގެ މަޖިލީހުގެ ޖަލްސާތައް މިވަގުތު ބޭއްވުން މުހިންމު ކަމަށެވެ. ޤާނޫނު އަސާސީ އާއި، ރައްޔިތުންގެ މަޖިލީހުގެ ޤަވާއިދަށް ރިޢާޔަތްކުރާއިރު މަޖިލީހުގެ މަސައްކަތްތައް އޮންލައިންކޮށް ކުރިޔަށް ގެންދިޔުމާމެދު ޤާނޫނީ ގޮތުން އިއުތިރާޒުކުރާނެ ކަމެއް އޮތް ކަމަށް ފެނިވަޑައިނުގަންނަވާ ކަމަށާއި، މަޖިލީހުގެ ކައުންސެލަރ ޖެނެރަލްވެސް އެފަދަ ގޮތަކައް ލަފާފުޅެއް ނުދެއްވާކަމަށް ރައީސް ނަޝީދު ވިދާޅުވިއެވެ.
މުޅި ދުނިޔެ ވަނީ ކޮވިޑް-19 ގެ ވިލާގަނޑެއްގެ ދަށުގައިކަމަށާއި ރޯގާއިން ސަލާމަތްވުމަށް އަޅާ ފިޔަވަަޅުތަކުގެ ސަބަބުން ރައްޔިތުންނަށް ދިމާވާ ވަރަށް ބޮޑެތި ދަތިތައް އެބަހުރިކަމަށް ރައީސް ނަޝީދު ވިދާޅުވިއެވެ. ރައްޔިތުންނަށް މިވަގުތު ދިމާވާ މިފަދަ ކަންކަމަށް އަޅާލާ އަދި އިޖުތިމާޢީ ރައްކާތެރިކަން ފޯރުކޮށްދިނުމުގެ މަސައްކަތްތައްވެސް ސަރުކާރުން ރާވަމުން އަންނަކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މިދަނޑިވަޅުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު އަޅުއްވަމުން ގެންދަވާ ފިޔަވަޅުތަކަކީ ކޮވިޑް-19 ފެތުރުނަ ނުދިނުމަށް އަޅަންޖެހޭ ފިޔަވަޅުތަކެއް ކަމަށެވެ. އަދި މިވަގުތު ހުރިހާ އެންމެންވެސް ކަންބޮޑުވާކަމަށާއި އެހެންނަމަވެސް ކަމާބެހޭ ފަރާތްތަކަށް އިތުބާރު ކުރެއްވުމަށް ރައްޔިތުންގެ ކިބައިން ރައީސް ނަޝީދު އެދިވަޑައިގެންނެވި އެވެ. ރައީސް ނަޝީދު ވިދާޅުވީ މިކަމުން އަރައިގަނެވޭނެ ކަމަށެވެ.
