ތުރުކީގެ ލެޖެންޑް ރުސްޓޫ ކޮރޯނާވައިރަހަށް ޕޮޒިޓިވްވެ އެޑްމިޓްކޮށްފި

ތުރުކީގެ ގޯލްކީޕަރު ރުސްޓޫ ރެކްބާ ކޮރޯނާވައިރަހަށް (ކޮވިޑް-19) އަށް ޕޮޒިޓިވްވެ، ހާލު ސީރިއަސްވުމުގެ ސަބަބުން ހޮސްޕިޓަލްގައި އެޑްމިޓްކޮށްފި އެވެ.

ކުރިން ބާސެލޯނާ، ފެނަބާޗޭ އަދި ބެސެކްޓަސްއަށް ކުޅެފައިވާ އުމުރުން 46 އަހަރުގެ ރުސްޓޫ ކޮވިޑް-19 އަށް ޕޮޒިޓިވްވީ މީގެ ދެ ދުވަހެއް ކުރިންނެވެ. އަދި މިހާރު އޭނާގެ ހާލު ގޯސްވުމުގެ ސަބަބުން ވަނީ ހޮސްޕިޓަލްގައި އެޑްމިޓްކޮށްފައެވެ.

ރުސްޓޫގެ އަންހެނުން އައިސިލް ރެކްބާ ބުނީ ކުއްލިއަކަށް ރުސްޓޫގެ ހާލަތު ގޯސްވުމުން ވަރަށް ބޮޑަށް ކަންބޮޑުވާ ކަމަށާއި އެއްވެސް ބައްޔަކަށް ބޭސްކުރަމުން ނުދާ މީހަކު އެހާ ބޮޑަށް ހާލު ސީރިއަސްވާނެ ކަމަށް ކުރިން ހީނުކުރާ ކަމަށެވެ.

ތުރުކީ ގައުމީ ޓީމަށް ގިނަ އަހަރުތަކެއް ވަންދެން ކުޅުނު ރުސްޓޫ އަކީ 2002 ވަނަ އަހަރުގެ ވޯލްޑް ކަޕްގައި ތުރުކީން ތިންވަނަ ހޯދިއިރު، އެޓީމުގައި މުހިންމު ދައުރެއް އަދާކުރި ކުޅުންތެރިއެކެވެ. ބާސެލޯނާ އަށް ތިން އަހަރު ކުޅެދީ ކާމިޔާބީތަކެއް ހޯދި ރުސްޓޫ ކުޅުން ހުއްޓާލާފައިވަނީ 2012 ވަނަ އަހަރުއެވެ.

ތުރުކީގެ ގޯލްކީޕަރު ރުސްޓޫ ކޮވިޑް-19 އަށް ޕޮޒިޓިވްވިއިރު، މީގެ ކުރިން ތުރުކީގެ ގަލަތަސަރާއީގެ ކޯޗު ފާތިހު ތެރިމް އާއި ނައިބު ރައީސް އަބްދުލްރަހީމް އަލްބާރަކް ވަނީ މި ވައިރަހަށް ޕޮޒިޓިވްވެފައެވެ.

މީގެ ކުރިން ދުނިޔޭގެ ގިނަ ގައުމުތަކެއްގެ ފުޓްބޯޅަ ކުޅުންތެރިންނާއި ބައެއް ކޯޗުން ވަނީ މި ވައިރަހަށް ޕޮޒިޓިވްވެފައެވެ. އަދި ކޮވިޑް-19 އާ ގުޅިގެން ދުނިޔޭގެ ފުޓްބޯޅަ ވަނީ ހުއްޓުމަކަށް އައިސްފައެވެ.

ތުރުކީގައިވެސް ކޮވިޑް-19 ހަލުވިކަމާއެކު ފެތުރެމުންދާއިރު، އެ ގައުމުން މި ވައިރަސް ޖެހުނު މީހުންގެ އަދަދު މިހާރު ވަނީ 9،217 އަށް އަރާފައެވެ. އަދި މި ވައިރަސް ޖެހިގެން ތުރުކީން 131 މީހަކު ވަނީ މަރުވެފައެވެ.