މި މަހުގެ 31 ވަނަ ދުވަހު އިންދިރާ ގާންދީ މެމޯރިއަލް ހޮސްޕިޓަލުން 6800 ޓެސްޓް ކިޓް ރާއްޖެ ގެންނާނެ ކަމަށް ސަރުކާރުން ބުނެފިއެވެ.

އާދިއްތަ ދުވަހުގެ ހަވީރު ދަރުބާރުގޭގައި ގާއިމްކޮށްފައިވާ ނެޝަނަލް އެމެޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ޓާސްކްފޯހުގެ ތަރުޖަމާން މަބްރޫކް އަޒީޒް ވިދާޅުވީ ކޮވިޑް-19 ގެ މި ޓެސްޓް ކިޓްތައް ރާއްޖެ ގެނައުމަށް ހަމަޖެހިފައިވާއިރު މުޅި ޖުމްލަ 29500 ޓެސްޓް ކިޓް ރާއްޖެއަށް ލިބެން އެބަހުރި ކަމަށެވެ.

މީގެ އިތުރުން މިވަގުތު ރާއްޖޭގައި ހުރި ޓެސްޓް ކިޓްތަކުގެ ޖުމްލަ އަދަދު ހާމަކުރައްވާ މަބްރޫކް ވިދާޅުވީ 3800 ޓެސްޓް ކިޓާއި 100 ރެޕިޑް ޓެސްޓް ކިޓް ރާއްޖޭގައި އެބަހުރި ކަމަށެވެ.

އިންޑިއާ އިތުރު މެޑިކަލް ޝިޕްމަންޓެއް ރާއްޖެ ގެނައުމުގެ މަޝްވަރާތައް ކުރިއަށްދާކަން ފާހަގަކުރައްވާ މަބްރޫކް ވިދާޅުވީ މަޝްވަރާތައް ކުރިއަށްދަނީ ރާއްޖޭގެ ފޮރިން މިނިސްޓްރީއާއެކު ކަމަށެވެ. އަދި މާދަމާ ރާއްޖެއިން ސްރީލަންކާ އަށް ކާގޯ ފްލައިޓްތަކެއް ހަމަޖެހިފައިވާ ކަމަށް ވެސް ވިދާޅުވިއެވެ. ކާގޯ ފްލައިޓްތައް އެކި ސަރަހައްދުތަކަށް ކުރިއަތް އޮތް ދުވަސްތަކުގައި ދަތުރުކުރާނެ ކަމަށާއި އެއީ ރާއްޖެއަށް ބޭނުންވާ ކާބޯތަކެއްޗާއި ބޭސް ހޯދުމަށް ކަމަށް ވެސް އޭނާ ވިދާޅުވިއެވެ.

ކޮވިޑް-19 އިން ރައްކާތެރިވުމަށްޓަކައި ރާއްޖެއިން އެކި ފިޔަވަޅުތައް ދަނީ އަޅަމުންނެވެ. އެގޮތުން އެކި ސަރަހައްދުތަކުގައި ފްލޫ ކްލިނިކްތައް ވަނީ ޤާއިމުކޮށްފައެވެ. އަދި ޓްރެވަލެއް ކްލިނިކެއް ވެސް ޤާއިމުކޮށްފައިވެއެވެ. ފްލޫ ކްލިނިކްތަކަށް މިހާތަނަށް ޖުމްލަ 4660 މީހުން ޒިޔާރަތްކޮށްފައިވާއިރު ފާއިތުވެދިޔަ 24 ގަޑިއިރުގެ ތެރޭގައި 257 މީހަކު ވަނީ ކްލިނިކަށް ގޮސްފައެވެ.