ކައުންސިލްތަކުގެ އިންތިހާބު ބާއްވާނެ ވަކިދުވަހެއް އަދި ކަނޑައެއް ނާޅަން، ނިންމާނީ މެމްބަރުން: އާޒިމް
ގާނޫނަށް އިސްހު ގެނެސްގެންވެސް އިންތިހާބު ބާއްވާނެ ދުވަހެއް ކަނޑައެޅިދާނެ
މެޖޯރިޓީ ލީޑަރު އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަލީ އާޒިމް
ކޮވިޑް-19 އާއި ގުޅިގެން ފަސްކުރެވިފައިވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބު ބާއްވާނެ ދުވަހެއް ކަނޑައަޅާނީ، ރައްޔިތުންގެ މަޖިލީހުގެ މެމްބަރުންގެ މެދުގައި ބަހުސް ކުރެއްވުމަށްފަހު، މެމްބަރުން ނިންމާ ގޮތެއްގެމަތިންކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު، އަދި އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަލީ އާޒިމް ވިދާޅުވެއްޖެ އެވެ.
އާޒިމް މިހެން ވިދާޅުވީ، އަންނަ އަހަރުގެ ޖެނުއަރީ މަހުގެ 6 ވަނަ ދުވަހު ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބު ބާއްވުމަށް ހާއްސަ ގާނޫނެއް ހަދާ ވާހަކަ ފެތުރުމާއި ގުޅިގެން "ރާއްޖެއެމްވީ" އިން ކުރި ސުވާލަކަށް ޖަވާބު ދެއްވަމުންނެވެ. އާޒިމް ވިދާޅުވީ، މައިގަނޑު ވިސްނުމެއް އޮތީ، އިންތިހާބު ފަސްކުރުމުގެ ފުރުސަތު ކޯޓުތަކަށް ދިނުމުގެ ބަދަލުގައި، އެކަމަށް ގާނޫނުގެ ތެރެއިން ފަރުވާއެއް ހޯދުން ކަމަށެވެ.
އެގޮތުން، އިންތިހާބާ ބެހޭ ގާނޫނަށް އިސްލާހު ހުށަހަޅައިގެންވެސް ރައްޔިތުންގެ މަޖިލީހަށް އެކަން ކުރެވެން އެބައޮތް ކަމަށް އާޒިމް ވިދާޅުވި އެވެ. އަދި ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބު ބާއްވާނެ ތާރީހެއް ކަނޑައެޅުމުގައި، ހުށަހެޅޭ ހާއްސަ ބިލެއް ކަމަށްވިޔަސް، އަދި ގާނޫނަށް އިސްލާހު ގެނައުމުގެ ބިލެއް ކަމަށްވިޔަސް، ވަކި ތާރީހެއް އޮތްނަމަ، އެކަން ނިންމާނީ ރައްޔިތުންގެ މަޖިލީހުގެ މެމްބަރުން އެކަމަށް ބަހުސް ކުރުމަށްފަހު، މަޖިލީހުގެ މެމްބަރުން ނިންމާގޮތެއްގެ މަތީން ކަމަށް ވެސް އާޒިމް ވިދާޅުވި އެވެ.
އެނގިފައިވާ ގޮތުގައި އެޓަަރނީ ޖެނެރަލްގެ އޮފީހާއި އެލެކްޝަންސް ކޮމިޝަނާއެކު މަޝްވަރާކުރެވި، ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބު ބައްވާނެ ތާރީހެއް ކަނޑައެޅުމާ ގުޅޭ ހާއްސަ ބިލްގެ ޑްރާފްޓެއް ދަނީ ތައްޔާރު ކުރަމުން ނެވެ. އިލެކްޝަންސް ކޮމިޝަނުގެ މައިގަނޑު ވިސްނުން ހުރީ އަންނަ ޖެނުއަރީ މަހުގެ ފުރަތަމަ ހަފްތާގައި ނުވަތަ ޖެނުއަރީ މަހުގެ ކުރިން އިންތިހާބު ބޭއްވުން ކަމަށް ވެއެވެ. އެހެންކަމުން އިންތިހާބު ބޭއްވުން އެންމެ ގާތީ، ޖެނުއަރީ މަހުގެ ދެ ވަނަ ދުވަހު ކަމަށް ބެލެވެ އެވެ.
އެނގިފައިވާ ގޮތުގައި އެބިލްގެ ބޭނުމަކީ، ގާނޫނުގައި ބުނާ މުއްދަތުގައި އިންތިހާބު ނުބޭއްވި ލަސްވެފައިވާތީ ގާނޫނީ ފަރުވާއެއް ހޯދުމެވެ. އަދި އެ ބިލް ފަރުމާކުރަމުން އަންނަނީ، އިންތިހާބު ނިމުމާއެކު އުވާލާ ގޮތަށެވެ.
މީގެއިތުރުން، އެބިލްގައި، ލޯކަލް ކައުންސިލްތަކުގެ އިންތިހާބު ދެންބާއްވާއިރު ބާއްވާނީވެސް އިންތިހާބުގެ ކަންކަން މިހާރު ކުރިއަށް ގޮސްފައިވާ ހިސާބުންނެވެ. އެހެންކަމުން އިންތިހާބު ކުރިއަށް ދަނީ މިހާރު ތިބި ކެންޑިޑޭޓުންނާއެކުގަ އެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބު އެންމެ ފުރަތަމަ ބާއްވަން ހަމަޖެހިފައި އޮތް ތާރީޚަކީ އެޕްރިލް މަހުގެ 4 އެވެ. ނަމަވެސް، ފަހުން އިލެކްޝަންސް ކޮމިޝަނުން ވަނީ އިންތިޚާބު ބާއްވާ ތާރީޚު އެޕްރިލް 18 އަށް ބަދަލުކޮށްފައެވެ.
