ޔޫކޭގައި ކޮވިޑް-19 އަށް ފަރުވާދެއްވަން އުޅުއްވި ދިވެހި ޑޮކްޓަރެއްގެ އަނބިކަނބަލުން ވެސް ވައިރަސްއަށް ޕޮޒިޓިވް
28 މާރިޗު 2020 | ހޮނިހިރު 09:27އޭނާއަކީ ޔޫކޭގައި ކޮވިޑް-19 ގެ ކޭސްތަކުގައި ފަރުވާ ދިނުމުގެ މަސައްކަތް ކުރައްވަމުން ގެންދަވާ ޑޮކްޓަރެއް
މުޅި ދުނޔެއިން 6 ލައްކައަށްވުރެ ގިނަ މީހުން ވައިރަސްއަށް ޕޮޒިޓިވްވެފައިވޭ
އިނގިރޭސިވިލާތް (ޔޫކޭ) ގައި ކޮވިޑް-19 އަށް ފަރުވާދިނުމުގައި އުޅުއްވި ދިވެހި ޑޮކްޓަރެއްގެ އާއިލާ މެމްބަރުންނަށްވެސް ވައިރަސްގެ އަސަރުކޮށްފިއެވެ.
ޔޫކޭގައި ކޮވިޑް-19 ގެ ކޭސްތަކުގައި ފަރުވާ ދިނުމުގެ މަސައްކަތް ކުރައްވަމުން ގެންދަވާ ޑޮކްޓަރެއް ކަމަށްވާ ޑރ މުހައްމަދު ރަޒީމް އޭނާގެ ފޭސްބުކްގައި ލިޔުއްވި ޕޯސްޓެއްގައި ވިދާޅުވީ، އަންގާރަ ދުވަހުން ފެށިގެން ގޭގައި ސެލްފް- އައިސޮލޭޝަންގައި ހުންނެވި ކަމަށެވެ. އެގޮތުން ފާއިތުވި 2 ހަފްތާ ތެރޭގައިވެސް އެ މަސައްކަތުގައި އުޅުއްވިއިރު، ޑޮކްޓަރުގެ އަނބިކަނބަލުން ކިބައިން ރޯގާގެ އަލާމަތްތަކެއް ފެނި ޓެސްޓުކުރި އިރު ކޮވިޑް-19 އަށް ޕޮޒިޓިވްވެފައިވާކަން ވަނީ ފާހަގަކުރައްވާފައެވެ.
އަދި އެހިސާބުން ގޭގައި ސެލްފް އައިސޮލޭޓް ކުރައްވައި ދަރިފުޅަށް ވެސް ގޭގައި ކިޔަވައިދެއްވަމުން ގެންދަވާއިރު، ދަރިފުޅުގެ ޙާލު ރަނގަޅުކަން ޑޮކްޓަރ ފާހަގަކުރެއްވިއެވެ. ނަމަވެސް ޑޮކްޓަރ ރަޒީމްގެ ކިބައިންވެސް މިހާރު ކޮވިޑް-19 ގެ އަލާމަތްތަކެއް ފެންނަމުންދާކަން ފާހަގަ ކުރައްވާފައިވާއިރު، މި ވައިރަސްއަކީ "މަސައްކަތް ކުރެއްވި ހޮސްޕިޓަލުން ގެއަށް ގެނެވުނު" އެއްޗެއްކަން ޔަޤީންވާކަމަށް ވިދާޅުވެފައިވެއެވެ.
އަނބިކަނބަލުންގެ ޙާލު ރަނގަޅުވަމުން އަންނަަކަން ފާހަގަކުރައްވާފައިވާއިރު، ޑރ. ރަޒީމް މި ވައިރަސްއަށް މިހާތަނަށް ޓެސްޓު ކުރައްވާފައިވާކަން ނުވަތަ ނޫންކަން ޕޯސްޓުގައި ހާމަކުރައްވާފައެއް ނުވެއެވެ.
ޑރ. ރަޒީމް ވިދާޅުވީ، ސެލްފް އައިސޮލޭޝަންގައި ހުންނަވާއިރު، ބޭނުންތެރި މަސައްކަތްތަކެއް ކުރައްވަމުން ގެންދަވާ ކަމަށާއި، މިހާރު އޮންލައިންކޮށް މަސައްކަތް ކުރައްވާ ތަނުގެ ސާރވަރ އާއި ގުޅާލެވި، "ވާރޗުއަލް ޓެލެފޯން ކްލިނިކް" އެއް ގޮތުގައި މަސައްކަތް ކުރައްވަމުން ގެންދަވާކަމަށެވެ.
