ކޮރޯނާވައިރަސް (ކޮވިޑް-19) އާ ގުޅިގެން ހުއްޓިފައިވާ ކުޅިވަރު އެކެޑަމީތަކުގެ ހާލަތު އޮޅުންފިލުވައި އެހީތެރިވުމަށް އޮލިމްޕިކް ކޮމިޓީގެ ސެކްރެޓަރީ ޖެނެރަލް އަހުމަދު މަރުޒޫގު (މަރޭ) ގޮވާލައްވައިފި އެވެ.

މިމަހުގެ 12 ވަނަ ދުވަހު ވަނީ ރާއްޖޭގައި ފުރަތަމަ ފަހަރަށް ސިއްހީ ކުއްލި ނުރައްކަލުގެ ހާލަތު އިއުލާންކޮށްފައެވެ. މިއާއެކު ގިނަ ކުޅިވަރު އެސޯސިއޭޝަންތަކުން ކުޅިވަރުގެ ހަރަކާތްތައް ހުއްޓާލާފައިވާއިރު، ކުޅިވަރު އެކެޑަމީތަކުން ވަނީ އެ އެކެޑަމީތަކުގެ ހަރަކާތްތައްވެސް ހުއްޓާލާފައެވެ.

ފޭސްބުކްގައި ކުރި ޕޯސްޓެއްގައި މަރޭ ވިދާޅުވީ ކުޅިވަރު ކައުންސިލާއި ކުޅިވަރު އެސޯސިއޭޝަނުތަކުގެ ފަރާތުން ކުޅިވަރު އެކެޑަމީތަކާއި ބައްދަލުކޮށް، އެ އެކެޑަމީތަކުގެ ހާލަތު ބައްލަވަން ޖެހޭ ކަމަށެވެ. އެގޮތުން ގިނަ އެކެޑަމީތަކުގެ ކޯޗުންނަކީ އެ އެކެޑަމީތަކުން ލިބޭ މުސާރައަށް ބަރޯސާވާ ކޯޗުން ކަމަށާއި، މިފަދަ ދަނޑިވަޅެއްގައި އެ ކޯޗުންނަށް ގިނަ ގޮންޖެހުންތަކަކާއި ކުރިމަތިލާން ޖެހޭނެ ކަމަށެވެ. އަދި ދިމާވެފައިވާ ދަތިތަކުން އަރައިގަތުމަށް، އެކެޑަމީތަކާއި ބައްދަލުކޮށް އެ އެކެޑަމީތަކުގެ ކޯޗުންގެ ހާލަތު އޮޅުންފިލުވައި، ކަންކަން ހައްލުކުރެވޭނެ މަގެއް ހޯދައިދިނުމަށް ސަރުކާރަށް ހުށަހަޅުއްވާނެ ކަމަށް އުންމީދު ކުރައްވާ ކަމަށްވެސް މަރޭ ވިދާޅުވި އެވެ.

ކޮވިޑް-19 އާ ގުޅިގެން ރައްކާތެރި ފިޔަވަޅު އެޅުމުގެ ގޮތުން މާލޭ ސަރަހައްދުގައި ގާއިމްކޮށްފައިވާ ކުޅިވަރު ކުޅޭ ތަންތަން ބަންދުކުރުމަށް ކުޅިވަރާ ބެހޭ ވުޒާރާއިން މީގެ ކުރިން ވަނީ ނިންމާފައެވެ. އަދި ރާއްޖޭގައި ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައިވާއިރު، އެކި ކުޅިވަރު އެސޯސިއޭޝަންތަކުން އަންނަނީ އެ އެސޯސިއޭޝަންތަކުގެ ހަރަކާތްތައް ހުއްޓާލަމުންނެވެ.

ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ އަދަދު 14 އަށް އަރާފައިވާއިރު، މީގެ ތެރެއިން 9 މީހަކު މިހާރު ވަނީ ރަނގަޅުވެފައެވެ.