ރާއްޖެއިން ކޮވިޑް-19 އަށް 13 މީހަކު ޕޮޒިޓިވްވި އެވެ. ނުވަ މީހުން ބަލިން ފަސޭހަވުމާއެކު މިހާރު ފަރުވާދެމުންދަނީ ހަތަރު މީހަކަށެވެ.

ބުރާސްފަތި ދުވަހުގެރޭ ނެޝަނަލް އެމެޖެންސީ އޮޕަރޭޝަން ސެންޓަރ (އެންއޯއީސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. މުހައްމަދު އަލީ ވިދާޅުވީ، ބަލިން ރަނގަޅުވެފައިވަނީ ދަރުމަވަންތަ ހޮސްޕިޓަލުގައި ފަރުވާދެމުންދާ ތިންވަނަ ބަލި މީހާ ކަމަށެވެ.

ޑރ. މުހައްމަދު ވިދާޅުވީ، ކޮވިޑް-19 ބަލި ޖެހޭ މީހުންގެ ތެރެއިން ސީރިއަސް ހާލަތަށް ދަނީ 15 އިންސައްތަ އާއި 20 އިންސައްތައިގެ މީހުން ކަމަށެވެ. އޭނާ ވިދާޅުވީ، ރާއްޖޭގައި އެބަލިން ސީރިޔަސް ހާލަތަށް ދިޔަ ތިން މީހަކު ރަނގަޅުވެފައިވާ ކަމަށެވެ. ބައެއް ގައުމުތަކުގައި ކޮވިޑް-19 ޖެހޭ މީހުންގެ ތެރެއިން ހަތް ޕަސެންޓް މީހުންނަކީ މަރުވާ މީހުންކަން ފާހަގަކުރައްވަމުން އޭނާ ވިދާޅުވީ، ރާއްޖޭގައި އެފަދަ ހާލަތެއް އަދި މިހާތަނަށް ނެތަސް، މަސައްކަތްކުރަނީ އެ ހާލަތަށް ރާއްޖެ ނުދިޔުން ކަމަށެވެ.