ކޮވިޑް-19 އަށް ރާއްޖެއިން ޕޮޒިޓިވް ވި މީހުންގެ ތެރެއިން 8 މީހަކު ރަނގަޅުވެއްޖެ
މިކަން އިއުލާނުކުރެއްވީ ބުދަ ދުވަހު
ހޫނު ޚަބަރު
ރާއްޖެއިން ކޮވިޑް-19ގެ 13 ކޭސްއެއް މިހާތަނަށް ފެނިފައިވާއިރު ރައީސް ވިދާޅުވީ އޭގެ ތެރެއިން 8 މީހަކު ބަލިން ފަސޭހަވެފައިވާކަމަށެވެ. އަދި މިވަގުތު ފަރުވާދެމުން ގެންދާ ފަސް މީހުން މީހުން ވެސް ރަނގަޅުވަމުން އަންނަ ކަމަށް ރައީސް ވިދާޅުވިއެވެ.
ރައީސް ވިދާޅުވީ މިއީ ބަލި ނުފެތުރޭނެ ކަމަށް ނިންމަންވީ ވަގުތެއް ނޫންކަމަށެވެ. ދުނިޔޭގައި މި ބަލި ހަލުވިކަމާއި އެކު ފެތުރެމުންދާއިރު، ރާއްޖެއަށް މި ބަލި އަދިވެސް ނާންނާނެއެކޭ ބުނެވެން ނެތް ކަމަށް އެމަނިކުފާނު ފާހަގަކުރެއްވިއެވެ. ރައީސް ސާލިހު ވިދާޅުވީ މިހާތަނަށް އެޅިފައިވާ ފިޔަވަޅުތަކުގެ ނަތީޖާ ވަރަށް ރަނގަޅުކަމަށެވެ. އަދި މިވަގުތު އެންމެ ބޮޑަށް ސަމާލުކަމެއް ދޭންޖެހެނީ ބަލި ފެތުރޭނެ މަގުތައް ބަންދުކުރުމަށް ކަމަށެވެ.
ރައީސްގެ ވާހަކަފުޅުގައިވަނީ ރާއްޖޭގައި މި ބަލި ފެތުރުނަ ނުދިނުމަށް، ޞިއްޙީ ޚިދުމަތްތެރިން ކުރައްވާ މަސައްކަތަށް ޝުކުރުއަދާކުރައްވާފައެވެ. އަދި ޞިއްޙީ ތަޖުރިބާކާރުން އެ ދެއްވާ އިރުޝާދުތަކާ އެއްގޮތަށް އަމަލުކުރެއްވުމަށް ހުރިހާ ދިވެހި ރައްޔިތުންނަށް ގޮވާލެއްވިއެވެ. މީގެ އިތުރުން ރައީސް ވިދާޅުވި ކަމާބެހޭ ފަރާތްތަކުން މަސައްކަތް ކުރައްވަނީ ދިވެހި ރައްޔިތުންނަށްޓަކައި ކަމަށެވެ. އަދި ހުރިހާ ދިވެހި ރައްޔިތުން ބޭރަށް ނުނުކުމެ ގޭގައި މަޑުކުރުމަށް ރައީް ސާލިހު އިލްތިމާސްކުރެއްވިއެެވެ. ރައީސް ވިދާޅުވީ މިހާރު އެޅެމުންދާ ފިޔަވަޅުތަކަކީ އެންމެންގެ ރައްކާތެރިކަމަށްޓަކައިއެޅިގެންދާ ފިޔަވަޅުތަކެކަމަށް ގަބޫލުކުރަންޖެހޭ ކަމަށެވެ. އަދި ޙާލަތާ ގުޅޭގޮތުން އަޅަންޖެހޭ އިތުރު ފިޔަވަޅުތައް މިހާރުވެސް އަޅަމުން ގެންދަވާކަން އެމަނިކުފާނު ފާހަގަކުރެއްވިއެވެ.
