މި މަހުގެ 27 ވަނަ ދުވަހު ފެށިގެން ރާއްޖެއިން އޮންއެރައިވަލް ވިސާ ދިނުން ހުއްޓާލާނެ: ރައީސް
އެއަރޕޯޓް ލޮކްޑައުންވާނެ
ރައީސް
މި މަހުގެ 27 ވަނަ ދުވަހު ފެށިގެން ރާއްޖެއިން އޮންއެރައިވަލް ވިސާ ދިނުން ހުއްޓާލާނެ ކަމަށް ރައީސް ވިދާޅުވެއްޖެއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ވިދާޅުވީ މި މަހުގެ 27 ވަނަ ދުވަހުން ފެށިގެން، ރާއްޖެއިން އޮންއެރައިވަލް ވިސާ ދޫކުރުން ވަގުތީ ގޮތުން ހުއްޓާލުމަށް ނިންމަވާފައިވާކަމަށެވެ. ހުކުރު ދުވަހުން ފެށިގެން ރާއްޖެއިން ބޭރުގެ އެއްވެސް ފަރާތަކަށް ވަކި ގޮތެއް ނިންމަން ދެން ރާއްޖެ އެތެރެ ނުވެވޭނެ ކަމަށެވެ.
ހާލަތާއި ގުޅިގެން އަޅަމުންދާ ފިޔަވަޅުތައް ހަރުދަނާކުރައްވަމުން ގެންދަވާކަން ފާހަގަކުރައްވާ ރައީސް ވިދާޅުވީ ރިސޯޓުތަކުން އެންމެ ފަހުގެ ފަތުރުވެރިޔާ ފުރާ ތާރީހުން ފެށިގެން 14 ދުވަސް ހަމަވުމުން، އެ ރިސޯޓުން އެހެން ތަންތަނަށް ފުރައިގެން ދިއުމުގެ ފުރުސަތު މުވައްޒަފުންނަށް ދެވޭނެ ކަމަށެވެ.
ރައީސް މިހެން ވިދާޅުވެފައިވާއިރު ރިސޯޓުތަކުން މީހުން ދިރިއުޅޭ އެއްވެސް ރަށަކަށް މީހުން ދަތުރުކުރުމާއި، ރާއްޖޭގެ އެހެން ރަށްރަށުން ރިސޯޓުތަކަށް މީހުން ދަތުރުކުރުން މަނާކުރީ މި މަހުގެ 21 ގައެވެ. އެޗްޕީއޭ އިން ބުނީ ފަތުރުވެރިން ފުރަން އެއަރޕޯޓަށް ގެންދަންޖެހޭ ހާލަތުގައި އެކަމަށް ދާ މުވައްޒަފުން ފަތުރުވެރިން ފުރުވާލުމަށްފަހު، އަނބުރާ ރިޒޯޓަށް އަންނަގޮތަށް، މުވައްޒަފުން ރިޒޯޓުން ފޭބުމުގެ ހުއްދަ އޮންނާނެ ކަމަށެވެ. އަދި އެ ފަރާތްތައް ދަތުރުކުރަމުންދާ ގޮތުގެ މަޢުލޫމާތު ރިޒޯޓުތަކުން ބެލެހެޓުމަށް އެޗްޕީއޭ އިން ވަނީ އިލްތިމާސްކޮށްފައެވެ.
