އިޓަލީ އަށް އިތުރު މާޔޫސްކަން – އަންގާރަ ދުވަހު އެކަނި 743 މަރު!
24 މާރިޗު 2020 | އަންގާރަ 18:27އިންޓެންސިވް ކެއަރ ގައި މިހާރުވެސް 3396 މީހަކަށް އަންނަނީ ފަރުވާ ދެމުން
އިޓަލީގެ ބާގަމޯގައި ކޮވިޑް-19 ޖެހިގެން މަރުވި މީހެއްގެ ސަންދޯއް މިލިޓަރީ އޮފިސަރުން ގެންދަނީ
ކޮރޯނާވައިރަސް (ކޮވިޑް-19) ޖެހިގެން ފާއިތުވި 24 ގަޑީއިރުގެ ތެރޭގައި 743 މީހުން މަރުވެ، މިހާތަނަށް މި ބަލީގައި އިޓަލީން މަރުވި މީހުންގެ އަދަދު 6,820 ށް އަރައިފި ކަމަށް އެ ގައުމުގެ ސިވިލް ޕްރޮޓެކްޝަން އޭޖެންސީން ބުނެފިއެވެ.
މަރުވި މީހުންގެ އަދަދު މައްޗަށް މި ދިޔައީ، މި ފާއިތުވެ ދިޔަ ދެ ދުވަހު މަރުވި މީހުންގެ ރޭޓް ދަށްވަމުން ދިއުމާއެކު އުއްމީދުތައް އާވެފައި ދަނޑިވަޅެއްގައެވެ.
ހޯމަ ދުވަހު 602 މީހުން ބަލީގައި މަރުވެފައިވާއިރު، އާދިއްތަ ދުވަހު 650 މީހުން އަދި އޭގެ ކުރީ ދުވަހު 793 މީހުން މަރުވެފައިވާ ކަމަށް ވަނީ ރިޕޯޓު ކޮށްފައެވެ. ހޮނިހިރު ދުވަސް ވެގެން ގޮސްފައިވަނީ ފެބްރުއަރީ 21 ގެ ފަހުން އިޓަލީގައި އެންމެ ގިނަ މީހުން ކޮވިޑް-19 ޖެހިގެން މަރުވި ދުވަހުގެ ގޮތުގައެވެ.
އިޓަލީގައި ކޮވިޑް-19 ޖެހިފައިވާ ކަމަށް ރެކޯޑް ކުރެވިފައިވާ އަދަދަކީ 69,176 އެވެ.
މިހާތަނަށް ބަލިން ރަނގަޅުވެފައިވަނީ 8,326 މީހުންނެވެ.
އިންޓެންސިވް ކެއަރ ގައި މިހާރުވެސް 3,396 މީހަކަށް އަންނަނީ ފަރުވާ ދެމުންނެވެ.
ކޮވިޑް-19 އެންމެ ބޮޑަށް ފެތުރިފައިވާ ލޮމްބާޑީ އަދިވެސް އޮތީ ނުރައްކާތެރި ހާލަތެއްގައެވެ. ލޮމްބާޑީން 30,703 މީހުންނަށް ކޮވިޑް-19 ޖެހިފައިވާ އިރު ބަލީގައި 4178 މީހުން ވަނީ މަރުވެފައެވެ.
