ކޮވިޑް-19: އެމިރޭޓްސްގެ ދަތުރުތައް ދެ ހަފްތާއަށް މެދުކަނޑާލަނީ
މިމަހުގެ 25 އިން ފެށިގެން ކުރިއަށް އޮތް ދެ ހަފްތާއަށް ވަގުތީ ގޮތުން ފަސިންޖަރުން އުފުލާ ދަތުރުތައް މެދުކަނޑަލަނީ
އެމިރޭޓްސްގެ ފްލައިޓެއް
ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19)ގެ ސަބަބުން ގިނަ ބައެއްގެ މަގުބޫލުކަން ހޯދާފައިވާ، އަދި އެންމެ ބޮޑު އެއް އެއަރލައިން ކަމަށްވާ އެމިރޭޓްސްގެ ހުރިހާ ދަތުރުތަކެއް ވަގުތީ ގޮތުން މެދުކަނޑާލަން ނިންމައިފި އެވެ.
ކޮވިޑް-19 އާ ގުޅިގެން އެންމެބޮޑެތި ގެއްލުުންތަކެއް ވަމުންދަނީ އެއަރލައިންތަކަށެވެ. އެގޮތުން ގިނަ އެއަރލައިންތަކެއްގެ ދަތުރުތައް މެދުކަނޑާލާފައިވާއިރު، ރާއްޖެއަށް އަންނަ ބައެއް އެއަރލައިންތަކުން މިހާރުވެސް ވަނީ ރާއްޖެއަށް ކުރާ ދަތުރުތައް ވަގުތީ ގޮތުން މެދުކަނޑާލާފަ އެވެ. ނަމަވެސް އެމިރޭޓްސްގެ ދަތުރުތައް މިހާތަނަށް ހުއްޓާލާފައިނުވާއިރު، މިމަހުގެ 25 ވަނަ ދުވަހުން ފެށިގެން އެމިރޭޓްސްގެ ދަތުރުތައް ވެސް ވަގުތީ ގޮތުން މެދުކަނޑާލުމަށް ވަނީ ނިންމާފަ އެވެ.
ހޯމަ ދުވަހު އެމިރޭޓްސް އިން ނެރުނު ބަޔާނެއްގައި ބުނެފައިވާގޮތުން، ފަސިންޖަރުން އުފުލަން ކުރާ ހުރިހާ ދަތުރުތަކެއް މި މަހުގެ 25 ވަނަ ދުވަހުން ފެށިގެން ދެ ހަފުތާގެ މުއްދަތައް ހުއްޓާލާފައިވާ ކަމަށެވެ.
ފަސިންޖަރުން އުފުލަން ކުރާ ދަތުރުތައް ވަގުތީ ގޮތުން މެދުކަނޑާލި ނަމަވެސް އެމިރޭޓްސްގެ ސްކައި ކާގޯގެ ޚިދުމަތް ކުރިއަށްދާނެ ކަމަށް އެ އެއަރލައިނުން ބުނެއެވެ.
ކޮވިޑް-19 ރާއްޖެ އިން ވެސް ފެނިފައި ވާއިރު، މިމަހުގެ 12 ވަނަ ދުވަހުން ފެށިގެން 30 ދުވަހުގެ މުއްދަތަށް ޞިއްޙީ ކުއްލި ނުރައްކަލުގެ ޙާލަތު އިޢުލާންކޮށް އަޅާފައިވާ ފިޔަވަޅުތަކުގެ ތެރޭގައި ބައެއް ޤައުމުތަކުން ރާއްޖެއަށް މީހުން އައުން މަނާކުރުން ހިމެނެ އެވެ.
ރާއްޖޭގައި ކޮވިޑް-19 އަށް ޕޮޒިޓިވްވި 13 މީހަކު ރާއްޖޭން މިހާތަނަށް ފެނިފައިވެ އެވެ. އޭގެތެރެއިން ތިން މީހަކު މިހާރުވަނީ ރަނގަޅުވެފަ އެވެ. މުޅި ދުނިޔެ އަށް ބަލާއިރު މިހާތަނަށް 344,000 އަށް ވުރެ ގިނަ މީހުންނަށް މި ބަލި ޖެހި 14,700 އަށް ވުރެ ގިނަ މީހުން ވަނީ މަރުވެފަ އެވެ.
