ކޮރޯނާވައިރަސް ޖެހިގެން ރެއާލް މެޑްރިޑްގެ ކުރީގެ ރައީސް ނިޔާވެއްޖެ

މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ޖެހިގެން ރެއާލް މެޑްރިޑްގެ ކުރީގެ ރައީސް ލޮރެންޒޯ ސަންޒް ނިޔާވެއްޖެ އެވެ.

ލޮރެންޒޯ ސަންޒް ނިޔާވިކަން އޭނާގެ ދަރިފުޅު ފެނާންޑޯ ވަނީ ޔަގީންކޮށްދީފައެވެ. އުމުރުން 76 އަހަރުގެ ލޮރެންޒޯ ނިޔާވިއިރު، އޭނާ ހޮސްޕިޓަލްގައި އެޑްމިޓް ކޮށްފައިވަނީ ކޮރޯނާވައިރަސް (ކޮވިޑް-19) އަށް ޕޮޒިޓިވްވުމުންނެވެ.

ލޮރެންޒޯ އަކީ ގިނަ އަހަރުތަކެއް ވަންދެން ރެއާލުގައި މަސައްކަތްކުރެއްވި ފަރާތެކެވެ. އޭނާ އެންމެ ފުރަތަމަ ރެއާލުގައި އަދާކުރެއްވީ ޑިރެކްޓަރެއްގެ މަގާމެވެ. އެކަމަކު 1995 ވަނަ އަހަރުގެ ފަހުކޮޅުގައި ރެއާލަށް ދިމާވި މާލީ މައްސަލަތަކާ ހުރެ އޭރުގެ ރައީސް ރާމޮން މެންޑޯޒާ އިސްތިއުފާ ދެއްވުމުން ރެއާލުގެ ރައީސްކަމާ ލޮރެންޒޯ ހަވާލުވެވަޑައިގަތީ އެވެ. 2000 ވަނަ އަހަރުގެ ނިޔަލަށް ރެއާލްގެ ރައީސްގެ މަގާމު ލޮރެންޒޯ ފުރުއްވިއިރު، އެ މުއްދަތުގައި ރެއާލުން ވަނީ ޔުއެފާ ޗެމްޕިއަންސް ލީގު ދެ ފަހަރު ކާމިޔާބުކޮށްފައެވެ.

ކޮރޯނާވައިރަސް ޖެހިގެން ރެއާލް މެޑްރިޑްގެ ކުރީގެ ރައީސް ލޮރެންޒޯ ސަންޒް ނިޔާވިއިރު، މީގެ ކުރިން މި ވައިރަސް ޖެހިގެން ސްޕެއިންގެ ޒުވާން ފުޓްބޯޅަ ކޯޗެއް ކަމަށްވާ އުމުރުން 21 އަހަރުގެ ފްރެންސިސްކޯ ގާސިއާ ވަނީ މަރުވެފައެވެ. ފްރެންސިސްކޯ ގާސިއާ އަކީ ސްޕެއިންގެ މަލާގާގެ ޔޫތު ޓީމަކަށް ކޯޗުކޮށްދެމުން އައި ކޯޗެކެވެ.

ކޮރޯނާވައިރަސް (ކޮވިޑް-19) ގެ ސަބަބުން ސްޕެނިޝް ލީގުގެ މެޗުތައް ވަނީ މެދުކަނޑާލާފައެވެ. ސްޕެނިޝް ލީގުގައި ވާދަކުރަމުން އަންނަ ވެލެންސިއާ ސްކޮޑުގެ 35 އިންސައްތަ މި ވައިރަހަށް ޕޮޒިޓިވްވެފައިވާއިރު، ރެއާލް މެޑްރިޑްގެ ބާސްކެޓްބޯޅަ ކުޅުންތެރިއަކު ކޮރޯނާވައިރަސް (ކޮވިޑް-19) އަށް ޕޮޒިޓިވްވުމުން، ރެއާލް މެޑްރިޑްގެ ފުޓްބޯޅަ ޓީމުވެސް މިހާރު ވަނީ ކަރަންޓީނު ކޮށްފައެވެ.

ސްޕެއިނުން މިހާތަނަށް 25،374 މީހުން ކޮރޯނާވައިރަހަށް ޕޮޒިޓިވް ވެފައިވާއިރު، 1،378 މީހުން ވަނީ މިބަލީގައި މިހާތަނަށް މަރުވެފައެވެ.