ލަންކާއިން ރާއްޖެ އައުން މަނާކޮށްފި
އެއާލައިންތަކަށް ވަނީ އަންގާފައި
ލަންކާގެ ވެރިރަށް ކޮލަމްބޯ | ގެޓީ އިމޭޖަސް
އަވަށްޓެރި ސްރީލަންކާގެ ފްލައިޓްތައް ރާއްޖެ އައުން މަނާކޮށްފި އެވެ.
ހޮނިހިރު ދުވަހު ރައީސް އޮފީހުން ނެރުނު ބަޔާނެއްގައި ބުނީ، ދުނިޔޭގައި ފެތުރެމުން އަންނަ ކޮވިޑް-19 ބަލިން ރައްކާތެރިވުމަށް އެޅިދާނެ ފިޔަވަޅުތަކާ ގުޅޭގޮތުން މަޝްވަރާކުރެއްވުމަށް ރައީސުލްޖުމްހޫރިއްޔާ އެކު، މިނިސްޓަރުންނާއި، ކަމާގުޅޭ މުއައްސަސާތަކުގެ ބޭފުޅުންނާއެކު ހުކުރު ދުވަހު ބޭއްވުނު ބައްދަލުވުމުގައި މަޝްވަރާތަކެއް ކުރެވިފައިވާ ކަމަށެވެ.
އެގޮތުން ހޮނިހިރު ދުވަހު ހެނދުނުން ފެށިގެން ސްރީލަންކާއިން ވައިގެ މަގުން ސީދާ ދަތުރުކުރާ ފަސިންޖަރުންނާއި މިދިޔަ 14 ދުވަހު ތެރޭގައިސްރީލަންކާ އަށް ޓްރާންސިޓްކޮށް ނުވަތަ ޒިޔާރަތްކޮށްފައިވާ ފަސިންޖަރުން ދިވެހިރާއްޖެއަށް އައުން ވަގުތީ ގޮތުން މެދުކަނޑާލުމަށް ނިންމަވާފައިވާ ކަމަށެވެ.
އަދި ދިވެހިރާއްޖެއަށް އެއްވެސް ފަސިންޖަރަކު ޑިސްއެމްބާކް ނުކުރާގޮތަށް، ސްރީލަންކާއިން އަންނަ ޓްރާންސިޓް ފްލައިޓްތަކާއި، ހަމައެކަނި ފަސިންޖަރުން ބަލާ ސްރީލަންކާއިން އަންނަ ފްލައިޓްތަކަށް ދިވެހިރާއްޖެއަށް އާދެވޭނެކަމަށް ރައީސް އޮފީހުން ވަނީ އެއަރލައިންތަކަށް އަންގާފައެވެ
