މި ސީޒަން ނިމުމުން ޔުނައިޓެޑުން ޕޮގްބާ ވިއްކާލަނީ

މި ސީޒަން ނިމުމުން ފަރަންސޭސްވިލާތުގެ މިޑްފީލްޑަރު ޕޯލް ޕޮގްބާ ވިއްކާލަން މެންޗެސްޓާ ޔުނައިޓެޑުން ބޭނުންވާ ކަމަށް ރިޕޯޓުތައް ބުނެފި އެވެ.

ޔުނައިޓެޑާއެކު ޕޮގްބާ ހަދާފައިވާ އެއްބަސްވުން މި ސީޒަން ނިމުމުން ހަމަވާނެ އެވެ. ރިޕޯޓުތައް ބުނާ ގޮތުން ޔުނައިޓެޑުން ބޭނުންވަނީ ޕޮގްބާގެ އެއްބަސްވުން އާކުރުމަށްފަހު 100 މިލިއަން ޔޫރޯ އަށް އޭނާ ވިއްކާލަންށެވެ. އެއްބަސްވުން އަ ނުކުރެވިއްޖެ ނަމަ، ޔުނައިޓެޑުން ޖެހޭނީ ހިލޭ ޓްރާންސްފާއެއްގެ ދަށުން ޕޮގްބާ ދޫކޮށްލާށެވެ.

ޔުނައިޓެޑުން ޕޮގްބާ ވިއްކާލަން މަސައްކަތް ކުރަމުން އަންނަ އިރު، އެނާ ހޯދުމަށް ކުރީގެ ކްލަބު ޔުވެންޓަސް އާއި ރެއާލް މެޑްރިޑުން އަންނަނީ މަސައްކަތް ކުރަމުންނެވެ.

އަނިޔާއާހެދި މި ސީޒަނުގައި ޕޮގްބާ ޔުނައިޓެޑަށް ކުޅެފައިވަނީ އެންމެ ހަތް މެޗެވެ. އަދި މިހާރުވެސް އޭނާ ކުޅުމުން ދުރުގައި ހުރިއިރު، އޭނާ ކުޅެން ނިކުންނާނެ ތާރީހެއް އަދި ކަށަވަރެއް ނޫނެވެ.

ޔުނައިޓެޑުން 2010 ވަނަ އަހަރު ކެރިޔަރު ފެށި އުމުރުން 26 އަހަރުގެ ޕޮގްބާ ހިލޭ ޓްރާންސްފާއެއްގެ ދަށުން ޔުވެންޓަސްއަށް ބަދަލުވީ 2012 ވަނަ އަހަރު އެވެ. އެޓީމުގައި ހޭދަކުރި ހަތަރު ސީޒަނުގައި ޕޮގްބާ ވަނީ 178 މެޗުން 34 ލަނޑު ޖަހާފައެވެ. އޭގެ ފަހުން އަނެއްކާވެސް ޕޮގްބާ އަނބުރާ ޔުނައިޓެޑަށް ބަދަލުވީ 2016 ވަނަ އަހަރު 105 މިލިއަން ޔޫރޯ އަށެވެ. އެކަމަކު ޔުނައިޓެޑަށް ބަދަލުވުމަށްފަހު އެޓީމުގައި އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ.