ކޮވިޑް-19: ސާމްޕަލްތައް ނެގެޓިވްވުމުން ޕެރެޑައިސް ރިސޯޓުގެ މޮނިޓަރިން އުވާލައިފި
ޕެރެޑައިސްގެ 10 ސާމްޕާލެއް ނެގި
ޕެރެޑައިސް އައިލެންޑް ރިސޯޓް
ކޮވިޑް-19 އަށް ޝައްކުވެގެން، ވިލާ ކުންފުނިން ހިންގަމުން އަންނަ ޕެރެޑައިސް އައިލެންޑް ރިސޯޓް އެންޑް ސްޕާއިން ނެގި ސާމްޕާލްތަކުގެ ނަތީޖާ ނެގެޓިވްވެ ވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
ކޮވިޑް-19 އަށް ޝައްކު ކުރެވިގެން ޕެރެޑައިސް އައިލެންޑްގެ ރިސޯޓުން 8 ދިވެހިންނާއި ދެ ބިދޭސީއެއްގެ ސާމްޕަލް ނަގާފައިވާ ކަމަށް ނޭޝަނަލް އެމަޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފައިވަނީ ބުރާސްފަތި ދުވަހުއެވެ.
ހުކުރު ދުވަހު އެޗްޕީއޭއިން ކޮށްފައިވާ ޓްވީޓެއްގައި ބުނީ، ކޮވިޑް-19 އަށް ޝައްކުކުރެވޭ އަލާމާތްތައް ހުރެގެން ޕެރަޑައިސް އައިލަންޑް ރިސޯޓުން ނެގި ސާމްޕަލްތަކުގެ ނަތީޖާ ނެގެޓިވް ވެފައިވާތީ އެ ރިސޯޓު މޮނިޓަރިންގްގެ ހާލަތުން ނެގިފައިވާ ކަމަށެވެ. އެކަމަކު އެއީ ކިތައް ސާމްޕަލްގެ ނަތިއްޖާއެއް ކަމަށް އެޗްޕީއޭގެ ޓްވީޓްގައި ހާމަކޮށްފައެއް ނުވެއެވެ.
އަދި އޭގެ އިތުރުން ރާއްޖެއިން އެންމެ ފުރަތަމަ ކޮވިޑް-19 ފެނުނު ޅ. ކުރެއްދޫ އައިލެންޑް ރިސޯޓުން 32 ބިދޭސީން، 14 ދުވަހުގެ ކަރަންޓީނު މުއްދަތު ފުރިހަމަކޮށް ނިމިފައިވާ ކަމަށް އެޗްޕީއޭއިން ބުންޏެވެ.
ކޮވިޑް-19 އަށް މިހާތަނަށް ރާއްޖެއިން ޕޮޒިޓިވް ވެފައިވަނީ، 13 މީހެކެވެ. އެއީ މުޅިންވެސް ބިދޭސީންނެވެ. އަދި އެ ހުރިހާ އެންމެންގެ ހާލު ރަނގަޅު ކަމަށް އެންއީއޯސީން ބުނެފައިވެއެވެ. ކޮވިޑް-19 އާ ގުޅިގެން ރާއްޖޭގައި ވަނީ އާންމު ސިއްހީ ކުއްލި ނުރައްކަލުގެ ހާލަތު މިމަހުގެ 12 ވަނަ ދުވަހުން ފެށިގެން 30 ދުވަހުގެ މުއްދަތަށް އިއުލާން ކޮށްފަ އެވެ. ކޮވިޑް-19 އާ ގުޅިގެން މުޅި ރާއްޖެއަށް ވަނީ ޔެލޯ އެލާރޓް ނެރެފައެވެ.
