ކޮވިޑް-19: އއ. ބޮޑުފުޅަދޫން ބިދޭސީއެއް، އިކުއޭޓަރ ސަފާރީން ދިވެއްސެއް ޝައްކުވެ، މޮނީޓަރިންގ ހާލަތަށް!
އެ ދެ މީހުންވެސް ތިބީ ހޯމް އައިސޮލޭޝަންގައި
އއ. ބޮޑުފުޅަދޫ ހެލްތް ސެންޓަރ
ރައްކާތެރިކަމުގެ ގޮތުން ޢަމަލު ކުރަމުންދާ އުޞޫލުގެ ދަށުން، ކޮރޯނާވައިރަސް (ކޮވިޑް-19) އަށް ޝައްކުކުރެވޭ އަލާމާތްތައް ހުރެގެން އއ. ބޮޑުފުޅަދޫއިން ބިދޭސީއެއް އަދި އިކުއޭޓަރ ސަފާރީން ދިވެއްސެއްގެ ސާމްޕަލް ނަގައި ޓެސްޓްކުރުމުގެ މަސައްކަތް ކުރިޔަށްދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފި އެވެ.
އެޗްޕީއޭއިންނާއި ނޭޝަނަލް އެމެޖެންސީ އޮޕަރޭޝަން ސެންޓަރު (އެންއީއޯސީ) އިން ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ތަރުޖަމާނު މަބްރޫކް އަޒީޒު ވިދާޅުވީ، ކޮވިޑް-19 އަށް ޝައްކުކުރެވޭ އަލާމާތްތައް ހުރެގެން އއ. ބޮޑުފުޅަދޫއިން ބިދޭސީއެއްގެ ސާމްޕަލް، އަދި އިކުއޭޓަރ ސަފާރީ ގައި ހުރި ދިވެއްސެއްގެ ސާމްޕަލް ނަގާ ޓެސްޓްކުރުމުގެ މަސައްކަތް ކުރިޔަށްދާއިރު، ބޮޑުފުޅަދުއާއި އިކުއޭޓަރ ސަފާރީ މިވަގުތު އޮތީ މޮނީޓަރިންގ ހާލަތުގައި ކަމަށެވެ.
އެޗްޕީއޭއިން ބުނީ އެ ދެ މީހުންވެސް މިވަގުތު ތިބީ "ހޯމް އައިސޮލޭޝަން"ގައި ކަމަށެވެ.
ކޮވިޑް-19 އަށް ރާއްޖެއިން މިހާތަނަށް ޕޮޒިޓިވްވެފައިވަނީ 13 މީހެކެވެ. އެ 13 މީހުންނަކީވެސް ބިދޭސީން ނެވެ.
ކޮވިޑް-19 އަށް ޝައްކުކުރެވޭ ގިނަ ބަޔަކު ވައިރަސްއަށް ޓެސްޓްކޮށްފައިވާއިރު، ފާއިތުވެދިޔަ ހަތަރު ދުވަހު ކޮވިޑް-19 އަށް އެއްވެސް މީހަކު ޕޮޒިޓިވް ވެފައެއް ނުވެއެވެ.
އެންއީއޯސީން ބުނެފައިވާގޮތުގައި، ކޮވިޑް-19 އަށް ޕޮޒިޓިވްވި 13 މީހުންގެ ހާލު ވެސް ރަނގަޅެވެ. އަދި ދަރުމަވަންތަ ހޮސްޕިޓަލުގެ ފަރުވާދެމުންދިޔަ ހާލުދެރަ 70 އަހަރުގެ މީހާގެ ހާލުވެސް ވަރަށް ބޮޑަށް ރަނގަޅުވެފައިވާ ކަމަށް އެންއީއޯސީން ބުނެފައި ވެއެވެ.
