ބީއެމްއެލްއިން ލޯނު ނަގާފައިވާ ފަރާތްތަކަށް ހަ މަސް ދުވަހުގެ ލުޔެއް ދެނީ!
19 މާރިޗު 2020 | ބުރާސްފަތި 14:29ލޯނު އަނބުރާ ދެއްކުމުގައި ލުއި ލިބެނީ ކޮވިޑް-19 ގެ ސަބަބުން އަސަރުކޮށްފައި ވާނަމަ
ފިނޭންސް މިނިސްޓަރު އަމީރު އަދި ބީއެމްއެލްގޭ ސީއީއޯ ޓިމް ސޯޔަރ
ބޭންކް އޮފް މޯލްޑިވްސް (ބީއެމްއެލް) އިން ލޯނު ނަގާފައިވާ ފަރާތްތަކަށް ހަ މަސް ދުވަހަށް އިންޓްރެސްޓް ޕޭމަންޓާއި ޕްރިންސިޕަލް ޕޭމަންޓް ދިނުމުގައި ލުއިތަކެއް ދިނުމަށް ނިންމާފައިވާކަން ސަރުކާރުން އިއުލާންކޮށްފިއެވެ.
މިއީ ކޮވިޑް-19 އާ ގުޅިގެން އިގްތިސާދަށް އައިސްފައިވާ ހީނަރުކަމާއި ގުޅިގެން އަމިއްލަ ފަރުދުންނަށާއި ވިޔަފާރިވެރިންނަށް ލުއިތަކެއް ދިނުމުގެ ގޮތުން ސަރުކާރުން އަޅާފައިވާ ފިޔަވަޅެކެވެ.
އެގޮތުން މި ބަލީގެ ސަބަބުން ސީދާ ގޮތުން ވިޔަސް ނުސީދާ ގޮތުން ވިޔަސް އަސަރުކޮށްފައިވާ ފަރާތްތަކަށް، ލޯނު އަނބުރާ ދެއްކުމުގައި ލުއިތަކެއް ހޯދުމަށް އެދެވޭނެ އިންތިޒާމު ސަރުކާރުން ވަނީ ހަމަޖައްސާފައެވެ. މި ލުއި ބޭނުންވާ ފަރާތްތަކުން ޖެހެނީ ބޭންކުގައި އެދެންށެވެ.
މިކަން އިއުލާންކުރައްވާ ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރ އިބްރާހިމް އަމީރު ވިދާޅުވީ، މިކަމުގެ ތަފްސީލުތައް ބީއެމްއެލްއިން ކުރިއަށް އޮތް ދުވަސްތަކުގެ ތެރޭގައި ހިއްސާކުރައްވާނެ ކަމަށެވެ.
މިހާތަނަށް ބީއެމްއެލްއާއެކު އެކަނި އެއްބަސްވުމަކަށް އާދެވިފައިވީ ނަމަވެސް، އެހެނިހެން މާލީ އިދާރާތަކާއެކު މަޝްވަރާތައް ކުރެވެމުންދާ ކަމަށް އަމީރު ވިދާޅުވިއެވެ.
ބީއެމްއެލްގެ ލޯނުތައް އަނބުރާ ދެއްކުމުގައި ލުއިތަކެއް ދޭން ނިންމުމުގެ އިތުރުން، ސަރުކާރުން ވަނީ، އިގްތިސާދަށް އައިސްފައިވާ ހީނަރުކަމުން އަރައިގަތުމުގެ ގޮތުން ވިޔަފާރިތަކަށް ހާއްސަކޮށްގެން، 2.5 ބިލިއަން ރުފިޔާގެ ސްޓިމިއުލަސް ޕެކޭޖެއް އިއުލާންކޮށްފައެވެ.
