ކަމެއް ފޮރުވަން އަންގާ ދުވަހު ޕްރެސްކޮންފެރެންސް ދޭން ނުހުންނާނަން: މަބްރޫކް
19 މާރިޗު 2020 | ބުރާސްފަތި 11:37މީޑިއާތަކުންވެސް ޒިންމާދާރުކަމާއި އެކު ހަބަރު ފެތުރުމަށް މަބްރޫކް އިލްތިމާސް ކުރެއްވި
މަބްރޫކް އަޒީޒް
ކޮވިޑް-19 އާ ގުޅިގެން ކަމެއް ފޮރުވުމަށް އަންގަން ބުނާ ދުވަހަކު ޕްރެސްކޮންފެރެންސް ދޭން ނުހުންނާނެ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ދަރުބާރުގޭގަައި ގާއިމްކޮށްފައިވާ ނެޝަނަލް އިމަޖެންސީ ސެންޓަރުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް އޮފީހުގެ އަންޑަރ ސެކެރެޓަރީ މަބްރޫކް ވިދާޅުވީ، ކަމެއް ފޮރުވުމުގެ ވިސްނުން ސަރުކާރުގައި ނެތް ކަމަށެވެ.
އޭނާ ވިދާޅުވީ، ރައީސްގެ ފަރާތުން ސީދާ ލިބިފައިވާ އިރުޝާދަކީ މި ބަލިން ސަލާމަތްވުމަށާއި މިކަމުން ދިމާވެފައިވާ ހާސްކަމުން އަރައިގަތުމަށް ކުރެވޭނެ އެންމެ މުހިންމު ކަމަކީ ވަގުތުން ވަގުތަށް ގަޑިން ގަޑިއަށް މައުލޫމާތު ފޯރުކޮށްދިނުން ކަމަށެވެ. ޕްރެސްކޮންފެރެންސް ދުވާލު ދެއިރު ބާއްވަނީ ގަޑިން ގަޑިއަށް މައުލޫމާތު ދިނުމަށްޓަކައި ކަމަށް މަބްރޫކް ވިދާޅުވިއެވެ.
ތަނެއްގައި ތޯތޯކޮށް ވާހަކައެއް ދައްކާ ބޮޑު ކަމެއްގެ ގޮތުގައި މިދަނޑިވަޅު ހެދުމުން މީހުންގެ މެދުގައި ހާސްކަން އިތުރުވާ ކަމެއް ކަމަށް މަބްރޫކް ވިދާޅުވިއެވެ. ނަމަވެސް މީޑިޔާއަކަށް މީޑިޔާއިން ބޭނުންވާ ޚަބަރު ޒިންމާދާރު ކަމާއިއެކު ފެތުރޭނެ ކަމަށް މަބްރޫކް ވިދާޅުވިއެވެ. ނަމަވެސް އެއްވެސް ބަޔަކު ހާސްކަން އިތުރުވާ ގޮތަށް އެކަން ނުކުރުމަށް އޭނާ އިލްތިމަސް ކުރެއްވިއެވެ.
ކޮވިޑް-19 އާ ގުޅިގެން ގައުމާ މުހާތަބު ކުރައްވާ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުވެސް ވަނީ، ހުރިހާ ފަރާތްތަކުން އިސްކަން ދެއްވާނީ ކަމާ ގުޅޭ ސައްހަ މައުލޫމާތު ފޯރުކޮށްދިނުމަށް ކަމަށް ވިދާޅުވެފައެވެ. އަދި އެއްވެސް ފޮރުވުމެއްނެެތި ސަރުކާރުން ބަލީގެ ހާލަތު ބަޔާންކުރައްވަމުންދާނެެ ކަމުގެ ޔަގީންކަން އެމަނިކުފާނު ވަނީ ދެއްވާފައެވެ.
ކޮވިޑް-19 އާ ގުޅިގެން އެކި ފަރާތްތަކުން ސައްހަ ނޫން މައުލޫމަތު ދައުރުކުރުވަމުންދާ މައްސަލަ ވަނީ މި ފަހަކަށް އައިސް އިތުރުވެފައެވެ. އެފަދަ ގޮތަށް އެއްވެސް ފަރާތަކުން އަމަލު ނުކުރުމަށް ކަމާއި ބެހޭ އިދާރާތަކުން ދަނީ ކެނޑިނޭޅި އިލްތިމާސްކުރަމުންނެވެ.
މީގެ އިތުުރުން އެޗްޕީއޭ އިން ނެރުނު އިއުލާނެއްގައި ބުނެފައިވަނީ އެޗްޕީއޭގެ އެންގުންތަކާއި ހިލާފުވާ ފަރާތްތައް އާންމު ސިއްހަތު ރައްކައުތެރި ކުރުމުގެ ގާނޫނުގެ 17 ވަނަ މާއްދާގެ (ށ) ގެ ދަށުން 5000 ރުފިޔާއަށް ވުރެން ބޮޑު ނޫން އަދަދަކުން ޖޫރިމަނާ ކުރާނެ ކަމަށާއި އެ އެންގުމާ ހިލާފުވާ ފަރާތްތަކުގެ ނަން އާންމުކޮށް ހާމަކުރާނެ ކަމަށެވެ.
