ކޮވިޑް-19 އާ ގުޅިގެން އެމެރިކާގެ ވިސާ ބައެއް ގައުމުތަކަށް ދިނުން މެދުކަނޑާލާފައިވާ ކަމަށް އެ ގައުމުގެ ސްޓޭޓް ޑިޕާޓްމެންޓުން ބުނެފިއެވެ.

ވިސާ ދޫކުރުން ހުއްޓާލީ ކިތައް ގައުމަކަށް ކަމަށް ސްޓޭޓް ޑިޕާޓްމެންޓުން ހާމައެއް ނުކުރެއެވެ. ނަމަވެސް ސައުތް ކޮރެޔާ، ޖަރމަނީ، ސައުތް އެފްރިކާގެ އިތުރުން ސްޕެއިންގައި ހުރި އެމެރިކާގެ މިޝަންތަކުންދެމުންދާ ހިދުމަތްތައް ވަނީ މެދުކަނޑާލާފައެވެ. ނަމަވެސް އިމަޖެންސީ ހާލާތްތަކުގައި އެ ގައުމުތަކުގައި ތިބި އެމެރިކާ މީހުންނަށް މިޝަންތައް މެދުވެރިކޮށް ވިސާ ލިބޭނެ ކަމަށް ސްޓޭޓް ޑިޕާޓްމެންޓްގެ ތަރުޖަމާނަކު ވަނީ ވިދާޅުވެފައެވެ. ވިސާ ދިނުމުގެ ހިދުމަތް ވަރަށް އަވަހަށް ފެށިގެންދާނެ ކަމަށް ތަރުޖަމާނު ވިދާޅުވިއެވެ. އެހެން ނަމަވެސް ވަކީ ތާރީހެއް އޭނާ ހާމައެއް ނުކުރައްވައެވެ.

އެމެރިކާގެ 160 މިޝަނުން ވަނީ މިދިޔަ އަހަރު އެކަނިވެސް އެ ގައުމަށް އެތެރެވާން 9.2 މިލިއަން އިމިގްރެންޓް އަދި ނޮން އިމިގްރޭންޓް ވިސާ ދޫކޮށްފައެވެ. ވިސާ ދޫކުރުން ހުއްޓާލިޔަސް ވިސާ ވެއިވަރ ޕްރޮގްރާމް (ވީޑަބްލިއުޕީ) ޕްރޮގްރާމް އަށް އޭގެ އަސަރު ނުފޯރާނެ ކަމަށް ސްޓޭޓް ޑީޕާޓްމެންޓުން ވަނީ ބުނެފައެވެ. ވީޑަބްލިއުޕީ ޕްރޮގްރާމްގައި ހިމެނޭ 39 ގައުމަށް ފަތުރުވެރިކަމާއި، ވިޔަފާރީގެ ބޭނުމުގައި ވިސާއަކާއި ނުލައި 90 ދުވަހުގެ މުއްދަތަށް އެމެރިކާ އަށް ދަތުރުކުރެވޭނެއެވެ.

މިދިޔަ އަހަރުގެ ފަހުކޮޅު ޗައިނާއިން ފެތުރެން ފެށި ކޮވިޑް-19 އަށް މިހާތަނަށް 212،00 މީހަކު ޕޮޒިޓިވްވެ 8،700 މީހުން ވަނީ މަރުވެފައެވެ. މި ރޯގާ ވަނީ ދުނިޔޭގެ 164 ގައުމަކަށް ފެތުރިފައެވެ.

ދުނިޔޭގެ ގިނަ ގައުމުތަކެއްގެ ސްކޫލްތައް ބަންދުކޮށް، ފްލައިޓްތަކާއި އިންޑަސްޓްރީތައް ހުއްޓި، ކުޅިވަރުގެ ގިނަ ހަރަކާތްތަކެއް ވަނީ ކޮވިޑް-19 އާ ގުޅިގެން މެދުކެނޑިފައެވެ. ގައުމުތަކުގެ ސަރުކާރުން ދަނީ ބަލި އިތުރަށް ފެތުރުނަ ނުދިނުމަށް ގޭގައި މަޑުކުރަން އެ ގައުމުތަކުގެ ރައްޔިތުންނަށް އަންގަމުންނެވެ.