ކޮވިޑް-19: ލަންކާއިން ހުރިހާ ކެޓެގަރީއެއްގެ ވިސާ ދޫކުރުން ވަގުތީގޮތުން ހުއްޓާލަނީ
ބުރާސްފަތި ދުވަސް (މާދަމާ) ގެ ފަތިހު ސްރީލަންކާ ގަޑިން 04:00 އިން 25 މާރިޗު 2020 ގެ ރޭގަނޑު ސްރީލަންކާ ގަޑިން 11:59 އާ ހަމައަށް ހުރިހާ ވިސާއެއް ސަސްޕެންޑްވާނެ
ދިވެހި ޕާސްޕޯޓެއްގައި ލަންކާ ވިސާ ޖަހާފައި
ކޮވިޑް-19 އާއި ގުޅިގެން ބުރާސްފަތި ދުވަހުގެ (19-03-2020) ރޭ ފަތިހުން ފެށިގެން ލަންކާއިން ހުރިހާ ކެޓެގަރީއެއްގެ ވިސާ ދޫކުރުން ވަގުތީގޮތުން ހުއްޓާލަން ނިންމައިފިއެވެ.
މިއާއެކު ސްރީލަންކާއިން އަޅާފައިވާ ފިޔަވަޅު ހަރުދަނާ ކުރުމާއި ގުޅިގެން ދަތުރުކުރާ ދިވެހިން ސަމާލުވުމަށް ފޮރިން މިނިސްޓްރީން ވަނީ އަންގާފައެވެ.
ކޯވިޑް-19 ހަލުވިކަމާއެކު ފެތުރެމުން އަންނާތީ، ސްރީލަންކާގެ ސަރުކާރުން އަޅަމުންގެންދާ ފިޔަވަޅުތައް އިތުރަށް ހަރުދަނާކުރުމުގެ ގޮތުން، ބުރާސްފަތި ދުވަސް (މާދަމާ) ގެ ފަތިހު، ސްރީލަންކާ ގަޑިން 04:00 އިން ފެށިގެން ހުރިހާ ކެޓެގަރީއެއްގެ ވިސާ ދޫ ކުރުން ވަނީ ވަގުތީގޮތުން ހުއްޓާލާފައެވެ.
މީގެ އިތުރުން އެއްވެސް ކެޓެގަރީއެއްގެ ވިސާ (އިލެކްޓްރޯނިކް ޓްރެވަލް އޯތޮރައިޒޭޝަން މެދުވެރިކޮށް ލިބިފައިވާ ވިސާ، ސްރީލަންކާގެ ރެޒިޑެންޓް ވިސާ، އެންޓްރީ ވިސާ، ލޭންޑިންގް އެންޑޯސްމެންޓް އަދި މަލްޓިޕްލް އެންޓްރީ ވިސާ) ލިބިފައި ހުއްޓަސް، މިހާތަނަށް އެއްވެސް ވިސާއެއް ބޭނުންކޮށްގެން ސްރިލަންކާއަށް ދަތުރު ކޮށްފައިނުވާނަމަ، މި ވިސާތައްވެސް ބުރާސްފަތި ދުވަސް (މާދަމާ) ގެ ފަތިހު ސްރީލަންކާ ގަޑިން 04:00 އިން 25 މާރިޗު 2020 ގެ ރޭގަނޑު ސްރީލަންކާ ގަޑިން 11:59 އާ ހަމައަށް ވަނީ ސަސްޕެންޑް ކޮށްފައެވެ. އަދި އެއްވެސް ހާލަތެއްގައި ފަތުރުވެރިންނާއި ބިދޭސިން މި މުއްދަތުގެ ތެރޭގައި ސްރީލަންކާއަށް ދަތުރު ނުކުރެވޭނެއެވެ.
ފޮރިން މިނިސްޓްރީން ބުނީ ރާއްޖޭން ބޭރަށް ދަތުރުކުރާ ދިވެހި ރައްޔިތުންނާއި ރާއްޖޭން ބޭރުގައި ދިރިއުޅޭ ދިވެހި ރައްޔިތުން، މިނިސްޓްރީގައާއި އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަންގައި ރެޖިސްޓަރ ކުރުމަށް އިލްތިމާސްކުރާ ކަމަށެވެ. އެގޮތުން، ސްރީލަންކާއަށް ދަތުރުކުރާ ދިވެހި ރައްޔިތުންނާއި ސްރީލަންކާގައި ދިރިއުޅޭ ދިވެހި ރައްޔިތުން އެޤައުމުގައި ހުންނަ ދިވެހިރާއްޖޭގެ ހައި ކޮމިޝަންގައި ރެޖިސްޓަރ ކުރުމަށް ފޮރިން މިނިސްޓްރީން ވަނީ އެދިފައެވެ.
