ކޮވިޑް-19: ވިއެޓްނާމްއަށް ދަތުރުކުރާ އަދި ދިރިއުޅޭ ދިވެހިން ވެސް ސަމާލުވުމަށް އެދިއްޖެ
ވިއެޓްނާމްގެ ސަރުކާރުން ވަނީ 18 މާޗް 2020 ގެ ދަންވަރު 00:00 އިން ފެށިގެން ފަތުރުވެރިންނާއި ބިދޭސީން އެ ޤައުމަށް ވަނުން މަނާކޮށްފައި
ވިއެޓްނާމްގެ ވެރިރަށް ހަނޯއީ
ވިއެޓްނާމްއަށް ދަތުރުކުރާ އަދި ވިއެޓްނާމްގައި ދިރިއުޅޭ ދިވެހިން ވެސް ސަމާލުވުމަށް ދިވެހި ސަރުކާރުން އެދިއްޖެއެވެ.
ފޮރިން މިނިސްޓްރީން މިކަމާއި ގުޅިގެން ނެރެފައިވާ ނޫސް ބަޔާނެއްގައި ބުނެފައިވަނީ މުޅި ދުނިޔޭގައި ކޯވިޑް-19 ހަލުވިކަމާއެކު ފެތުރެމުން އަންނާތީ، ވިއެޓްނާމްގެ ސަރުކާރުން ވަނީ 18 މާޗް 2020 ގެ ދަންވަރު 00:00 އިން ފެށިގެން ފަތުރުވެރިންނާއި ބިދޭސީން އެ ޤައުމަށް ވަނުން މަނާކޮށްފައި ކަމަށެވެ.
އަދި ވިއެޓްނާމްގައި މި ވަގުތު ދިރިއުޅެމުންދާ ދިވެހި ރައްޔިތުން ވިއެޓްނާމްގެ ސަރުކާރުގެ ނިންމުންތަކާއި އެންގެވުންތަކަށް ސަމާލުވުމަށް ފޮރިން މިނިސްޓްރީން ވަނީ އެދިފައެވެ.
މީގެ އިތުރުން ރާއްޖޭން ބޭރަށް ދަތުރުކުރާ ދިވެހި ރައްޔިތުންނާއި ރާއްޖޭން ބޭރުގައި ދިރިއުޅޭ ދިވެހި ރައްޔިތުން، މިނިސްޓްރީގައާއި އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަންގައި ރެޖިސްޓަރ ކުރުމަށްވެސް އިލްތިމާސްކޮށްފައިވެއެވެ.
އެގޮތުން، ވިއެޓްނާމްއަށް ދަތުރުކުރާ ދިވެހި ރައްޔިތުންނާއި ވިއެޓްނާމްގައި ދިރިއުޅޭ ދިވެހި ރައްޔިތުން މެލޭޝިޔާގައި ހުންނަ ދިވެހިރާއްޖޭގެ ހައި ކޮމިޝަންގައި ރެޖިސްޓަރ ކުރުމަށް ވަނީ އެދިފައެވެ.
އަދި ރާއްޖޭން ބޭރަށް ދަތުރުކުރާ ދިވެހިން ޓްރެވަލް އިންޝުއަރެންސް ހޯދުމަކީވެސް، ޚާއްޞަކޮށް މި ދުވަސްވަރު ވަރަށް ބޭނުންތެރި ކަމެއްކަމުގައި މި މިނިސްޓްރީއިން ފާހަގަކޮށްފައިވެއެވެ.
