ގޭގައި މަޑުކުރުމަށް ދިވެހިންނަށް އިލްތިމާސްކުރުމުން، ރަށްރަށަށް ފުރުމަށް އެއާޕޯޓްގައި!
ގޭގައި މަޑުކުރުމަށް ވަނީ އިލްތިމާސްކޮށްފައި
ދިވެހިންތަކެއް ފުރަންވެގެން ބުދަ ދުވަހު އެއާޕޯޓުގައި ކިޔޫ ޖެހިފައި
ކޮވިޑް-19 އިތުރަށްފެތުރުނަ ނުދިޔުމަށް ގޭގައި މަޑުކުރަން ސިއްހީ މާހިރުން ތަކުރާރުކޮށް އިރުޝާދުދެމުން ދަނިކޮށް މާލެއިން ބައެއް ދިވެހިން ރަށްރަށަށް ފުރަން ފަށައިފިއެވެ.
ރާއްޖެ.އެމްވީއަށް ވަނީ ބައެއް ޑޮމެސްޓިކް ފްލައިޓަތަކުން ފުރަން ގޮސްތިބި މީހުން ކިޔޫޖެހިގެން ތިބި ފޮޓޯތަކެއް ލިބިފައެވެ. އެ ފޮޓޯއިން ފެންނަނީ ގިނަ އަދަދެއްގެ ބަޔަކު ޗެކިންވާން އެއާޕޯޓުގައި ކިޔޫ ހަދާފައިވާތަނެވެ. ރާއްޖެ.އެމްވީ އަށް މައުލޫމާތުދިން އެއާޕޯޓުގެ މުވައްޒަފަކު ބުނީ، ގިނަ އަދަދެއްގެ ބަޔަކު ރަށްރަށަށް ދިޔުމަށް ބުދަ ދުވަހު ފުރާފައިވާ ކަމަށެވެ.
ކޮވިޑް-19 ބުރާސްފަތި ދުވަހުން ފެށިގެން ހަފުތާއެއްގެ މުއްދަތަށް ސަރުކާރުގެ އޮފީސްތައް ބަންދުކުރަން ވަނީ ނިންމާފައެވެ. އަދި އޮފީސްތައް ބަންދުކުރިޔަސް ދަތުރުތަކަށް ދިޔުމުގެ ބަދަލުގައި އެންމެ ރަނގަޅީ ގޭގައި މަޑުކޮށް ބަލިން ރައްކާތެރިވުމަށް ފިޔަވަޅު އެޅުން ކަމަށް ސިއްހީ މާހިރުން ދަނީ ތަކުރާރުކޮށް ނޫސްކޮންފަރެންސްތަކުގައި އިރުޝާދުދެމުންނެވެ.
ރާއްޖެއިން ކޮވިޑް-19 އަށް 13 މީހަކު ޕޮޒިޓިވްވުމާއި ގުޅިގެން ބަލި ކޮންޓްރޯލް ކުރުމަށް ސަރުކާރުން ދަނީ ގިނަ ފިޔަވަޅުތަކެއް އަޅަމުންނެވެ. ބައެއް ގައުމުތަކުގެ މީހުން ރާއްޖެއައުން މަނާކޮށް، ސިއްހީ ކުއްލި ނުރައްކަލުގެ ހާލަތު ވަނީ ރާއްޖޭގައި އިއުލާން ކޮށްފައެވެ. ސަރުކާރުން މިހާތަނަށް އަޅާފައިވާ ހުރިހާ ފިޔަވަޅަކީވެސް ރައްޔިތުންގެ ރައްކާތެރިކަމަށްޓައި އަޅަމުންދާ ފިޔަވަޅުތައް ކަމަށް ސަރުކާރުން ވަނީ ބުނެފައެވެ.
