ދައުލަތުގެ ޚަރަދުތައް ކުޑަކުރުމަށް އިތުރު ފިޔަވަޅުތަކެއް އަޅަން ނިންމައިފި

ކޮވިޑް-19 ގެ ސަބަބުން ދުނިޔެއާއި ދިވެހިރާއްޖޭގެ އިޤްތިސާދު އިތުރަށް ހީނަރުވާނެކަމަށް ލަފާކުރެވޭތީ މި އަހަރަށް ލަފާކުރި އާމްދަނީ ބޮޑުތަން ދަށްވާނެކަމަށް ބެލެވޭތީ ދައުލަތުގެ ޚަރަދުތައް ކުޑަކުރުމަށް އިތުރު ފިޔަވަޅުތަކެއް އަޅައިފި އެވެ.

އެކަމާއިގުޅިގެން ފިނޭންސް މިނިސްޓްރީން ނެރެފައިވާ ސަރކިޔުލަރ ގައި ބުނެފައުވަނީ ދައުލަތުގެ ޚަރަދުތަކުން ސިއްޙީ އަދި އިޖުތިމާއީ ރައްކާތެރިކަމަށާއި ކާރިސާތަކާއި އިގުތިސާދީ އަސަރު މެނޭޖްކުރުމަށް ކުރާ ޚަރަދުތައް ވަނީ އިތުރުކުރަންޖެހިފައި ކަމަށެވެ. އެހެންކަމުން ދައުލަތުގެ ޚަރަދުތައް ހަމަޖެއްސުމަށްޓަކައި މި އަހަރަށް ދައުލަތުގެ އޮފީސްތަކަށް ފާސްކުރި އާންމުބަޖެޓުން ޖުމުލަ 1 ބިލިއަން ރުފިޔާ އުނިކުރުމަށް ވަޒީރުންގެ މަޖިލީހުން ނިންމަވާފައިވާ ކަމަށެވެ.

މިގޮތުން ވަކިވަކި އޮފީސްތަކުގެ ބަޖެޓުތަކުން އުނިކުރުމަށް ކަނޑައެޅުނު މިންވަރު، އެ އޮފީސްތަކުގެ މަޝްވަރާއާއިއެކު، ބަޖެޓުތަކުން ވަނީ އުނިކޮށްފައިކަމަށް ފިނޭންސް މިނިސްޓްރީން ބުނެއެވެ. އެއޮފީސްތަކުގެ އާންމު ބަޖެޓުން އުނިކުރެވުނު މިންވަރު މިއަހަރުގެ ތެރޭގައި އަލުން ބަޖެޓުތަކަށް އިތުރުކޮށް ނުދެވޭނެ ކަމަށްވެސް ފިނޭންސް މިނިސްޓްރީގެ ސަރކިޔުލަރގައި ބުނެފައިވެ އެވެ.

ޚަރަދުކުޑަކުރުމަށް ފިނޭންސް މިނިސްޓްރީން އަލަށް އަޅުއްވާ ފިޔަވަޅުތަކަކީ:

މުވައްޒަފުންނަށް ހިނގާ ޚަރަދު:

- ފިނޭންސް މިނިސްޓްރީން 17 މާރިޗު ގެ ނިޔަލަށް ހުއްދަދީފައިވާ މަގާމުތައް ފިޔަވައި އައު މަގާމުތަކަށް މުވައްޒަފުން ނުނެގުން.

- މާރިޗު މަހުން ފެށިގެން ސަރުކާރުގެ ސިޔާސީ މަގާމުތަކުގެ ތެރެއިން މިނިސްޓަރުގެ ނައިބާއި އެ ފެންވަރުގެ މަގާމުތަކުންފެށިގެން މަތީގެ މަގާމުތަކުގެ އަސާސީ މުސާރައިން 20 އިންސައްތަ އުނިކުރުން. މިގޮތުން، މި މާރިޗު މަހުން ފެށިގެން 2 މަސްދުވަހުގެ މުއްދަތަކަށްފަހު މި ނިންމުން އަލުން މުރާޖައާކުރުން.

- މުވައްޒަފުންނަށް މިހާރު ދެމުން ނުދާ އެއްވެސް އައު އެލަވަންސްއެއް ނުދިނުން.

ދަތުރު ޚަރަދު:

ދައުލަތުގެ ހުރިހާ އިދާރާތަކުން ރާއްޖެއިން ބޭރަށް ކުރާ ހުރިހާ ދަތުރުތަކެއް ހުއްޓާލުން. ނަމަވެސް، ދައުލަތުގެ އިދާރާއަކުން ކޮންމެހެން ކުރަންޖެހޭ ދަތުރެއްނަމަ، ފިނޭންސް މިނިސްޓްރީގެ ހުއްދަ ހޯދުން.

މަރާމާތާއި ބެލެހެއްޓުމުގެ ޚަރަދު:

- ދައުލަތުގެ އިދާރާތަކުން ޢަމަލީ މަސައްކަތް ފަށާފައިވާ މަރާމާތުގެ މަސައްކަތްތަކާއި، މަރާމާތަށް މިހާތަނަށް ރައީސުލްޖުމްހުރިއްޔާގެ އޮފީހުން ނުވަތަ ފިނޭންސް މިނިސްޓްރީން ހުއްދަ ދީފައިވާ މަސައްކަތްތައް ފިޔަވައި، އިތުރު އެއްވެސްމަރާމާތުގެ މަސައްކަތެއް ނުފެށުން.

ކެޕިޓަލް ޚަރަދު:

- ޕީއެސްއައިޕީގެ ގޮތުގައި ހިމެނޭ ކެޕިޓަލް ޚަރަދުތައް ފިޔަވައި އެހެން ހުރިހާ ކެޕިޓަލް ޚަރަދުތައް ކުރުން ހުއްޓާލުން.

މީގެކުރިން ފިނޭންސް މިނިސްޓްރީން ވަނީ ސަރުކާރު ހިއްސާވާ ކުންފުނިތަކުން ޚަރަދުތައް ކުޑަކުރުމަށް ކަންތައްތަކެއް ކަނޑައަޅާފަ އެވެ.