އިންތިޚާބީ ޝަކުވާތައް އޮންލައިންކޮށް ހުށަހެޅުމަށް އީސީން އެދެފި

ދިވެހިރާއްޖޭގެ ހުރިހާ ސަރަހައްދެއްގައި ޢާންމު ޞިއްހަތުގެ ކުއްލި ނުރައްކަލުގެ ޙާލަތު އިޢުލާނުކުރުމާ ގުޅިގެން، ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބާ ގުޅޭ ޝަކުވާ އަންގާރަ ދުވަހުން ފެށިގެން ބަލައިގަތުމަށް ހަމަޖެހިފައިވަނީ އީމެއިލްގެ ޒަރީޢާއިން ކަމުގައި އިލެކްޝަންސް ކޮމިޝަން (އީސީ) އިން ބުނެފިއެވެ.

ކޮރޯނާ ވައިރަސް ހުރި 13 މީހަކު ރާއްޖެއިން މިހާތަނަށް ފެނިފައިވާއިރު، ސިއްހީ ކުއްލި ނުރައްކަލުގެ ހާލަތު އިއުލާންކޮށް، ގިނަ ފިޔަވަޅުތަކެއް ދަނީ އަޅަމުންނެވެ.

އީސީން ބުނީ އިންތިޚާބާ ގުޅިގެން ޝަކުވާ ހުށަހަޅަން ބޭނުންވާ ފަރާތްތަކުން ޝަކުވާ ހުށަހަޅާނީ ކޮމިޝަންގެ ރަސްމީ އީމެއިލް އެޑްރެސް ކަމަށްވާ،info@elections.gov.mvއަށް ކަމަށެވެ. ކައުންސިލް އިންތިޚާބު އަންނަ މަހު ބޭއްވުމަށް ހަމަޖެހިފައިވާއިރު އިންތިޚާބު އިތުރަށް ފަސްކުރަން އީސީން ވަނީ ދުސްތޫރީ މައްސަލައެއް ސުޕްރީމް ކޯޓަށް ހުށަހަޅާފައެވެ.

ކޮވިޑް-19 އާ ގުޅިގެން ދައުލަތުގެ ގިނަ އިދާރާތަކުން ދަނީ ޚިދުމަތް ދިނުމުގެ އުސޫލަށް ބަދަލު ގެނެސް، އީމެއިލް އާއި ސޯޝަލް މީޑިއާ މެދުވެރިކޮށް ލިޔުންތައް ފޮނުވާ ގޮތަށް ހަމަޖައްސަމުންނެވެ. އަދި ސަރުކާރު އޮފީސްތައް މާރޗް މަހުގެ 19 އިން ފެށިގެން 26 ގެ ނިޔަލަށް ވަނީ ބަންދުކޮށްފައެވެ.