ރާއްޖޭގެ އެއްވެސް ގެސްޓް ހައުސްއަކަށް އަންގާރަ ދުވަހުން ފެށިގެން 14 ދުވަސް ވަންދެން ޓޫރިސްޓުން އައުން (ޗެކްއިންވުން) މަނާކޮށްފި އެވެ.

ގެސްޓް ހައުސްތަކަށް ޓޫރިސްޓުން އައުން މަނާކޮށްފައިވާކަން އިއުލާން ކުރެއްވީ ޓޫރިޒަމް މިނިސްޓަރު އަލީ ވަހީދު އާއި ގެސްޓް ހައުސް އެސޯސިއޭޝަން ގުޅިގެން އަންގާރަ ދުވަހު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައެވެ. ޓުރިޒަމް މިނިސްޓަރު އަލީ ވަހީދު ވިދާޅުވީ އަންގާރަ ދުވަހުގެ ހަވީރު 6:00 އިން ފެށިގެން 14 ދުވަސް ވަންދެން ޓޫރިސްޓުން އައުން މަނާކޮށްފައިވާ ކަމަށެވެ.

ގެސްޓް ހައުސް އެސޯސިއޭޝަންގެ ރައީސް މޫސާ ނާސިހު ވެސް ވިދާޅުވީ، ރާއްޖޭގައި އާންމު ސިއްހީ ނުރައްކަލުގެ ހާލަތު މި މަހުގެ 12 ވަނަ ދުވަހުން ފެށިގެން 30 ދުވަހުގެ މުއްދަތަށް އިއުލާން ކޮށްފައިވާތީ، ގެސްޓް ހައުސް އެސޯސިއޭޝަނުން ގެސްޓް ހައުސް ހިންގާ ފަރާތްތަކާ ވާހަކަ ދެއްކުމަށްފަހު، ސަރުކާރުންނާއި ކަމާބެހޭ ފަރާތްތަކުން ރާއްޖެއިން މިހާރު ފެނިފައިވާ ކޮރޯނާވައިރަސް (ކޮވިޑް-19) ރައްޖެއިން ނައްތާލުމަށް ކުރަމުންދާ މަސައްކަތްތަކަށް އެއްބާރުލުން ދިނުމުގެ ގޮތުން ކަމަށެވެ.

ކޮވިޑް-19 އާއި ގުޅިގެން، އެންމެ ފުރަތަމަ ސަރުކާރުން މަނާކުރީ މާލެ ސިޓީ (މާލެ، ހުޅުމާލެ، ވިލިމާލެ) ސަރަހައްދުގައި ހިމެނޭ ގެސްޓްހައުސްތަކާއި، ސިޓީ ހޮޓެލްތަކަށް ގެސްޓުން ޗެކިންވުމެވެ. އެގޮތުން މިދިޔަ ހޮނިހިރު ދުވަހު ސަރުކާރުން އަންގާފައިވަނީ އެދުވަހުގެ ރޭ 12:00 އިންފެށިގެން 14 ދުވަހުގެ މުއްދަތަށް ގެސްޓުން ޗެކިންވުން ހުއްޓާލުމަށެވެ. އަދި އަންގާރަ ސަރުކާރުން މިވަނީ މުޅި ރާއްޖޭގައި ހުންގާ ގެސްޓް ހައުސްތަކަށް ޓޫރިސްޓުން އައުން ކުރިއަށް އޮތް 14 ދުވަހަކަށް މަނާކޮށްފަ އެވެ.

ސަރުކާރުން ބުނީ، މިވަގުތު ގެސްޓް ހައުސްތަކުގައި ޗެކިން ވެފައިތިބި ޓޫރިސްޓުންނަށް ބުކިންގެ މުއްދަތަށް ތިބުމުގައި އެއްވެސް ދައްޗެއް ނެތް ކަމަށެވެ.

މިއީ ކޮވިޑް-19 އިން ރައްކައުތެރިވުމަށް އާންމު ސިއްޙަތު ރައްކައުތެރިވުމުގެ ޤާނޫނުގެ 34 ވަނަ މާއްދާގެ ދަށުން ޑިރެކްޓަރޖެނެރަލް އޮފް ޕަބްލިކް ހެލްތަށް ލިބިފައިވާ ޤާނޫނީ ބާރުގެ ތެރެއިން، އާންމު ސިއްހީ ނުރައްކަލިގެ ހާލަތު އިއުލާންކޮށް، އަޅާފައިވާ ފިޔަވަޅެއް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެއެވެ.

ކޮވިޑް-19 ރާއްޖެއިން ފެނިފައިވާތީ، ރާއްޖޭގެ ފަތުރުވެރިކަމުގެ ސިނާއަތަށް ވަރަށް ބޮޑަށް ނޭދެވޭ އަސަރުތަކެއް ކުރިމަތިވެ، ރާއްޖޭގެ އިގްތިޞާދު މިވަނީ ވަރަށް ބޮޑަށް ދަށަށް ގޮސްފައެވެ.

ކޮވިޑް-19 ރާއްޖެއިން ފެނުމާއި ގުޅިގެން ސަރުކާރާއި އެޗްޕީއޭ އަދި ކަމާބެހޭ ފަރާތްތަކުން ގެންދަނީ ހަރުދަނާ ފިޔަވަޅުތަކެއް އަޅަމުންނެވެ.