އިނގިރޭސިވިލާތާއި، މެލޭޝިޔާއިން ރާއްޖެ މީހުން އައުން މަނާކޮށްފި
މެލޭޝިޔާ އިން މީހުން އައުން މަނާކޮށްފައިވަނީ އަންގާރަ ދުވަހު ހަޔަކުން ފެށިގެން
އެއާޕޯޓުގައި ފުރަންވެގެން ގޮސްތިބި ފަތުރުވެރިންތަކެއް
މެލޭޝިޔާއާ އިނގިރޭސިވިލާތުން މީހުން ރާއްޖެ އައުން މަނާކޮށްފައިވާ ކަމަށް ސަރުކާރުން ބުނެފިއެވެ.
އަންގާރަ ދުވަހުގެ މެންދުރު ދަރުބާރުގޭގައި ގާއިމްކޮށްފައިވާ ނެޝަނަލް އިމަރޖެންސީ އޮޕަރޭޝަން ސެންޓަރުގައި ނޫސްވެރިންނަށް މައުލޫމާތުދެެއްވަމުން ރައީސް އޮފީހުގެ އަންޑަރ ސެކެރެޓަރީ މަބްރޫކް އަޒީޒް ވިދާޅުވީ، ބުދަ ދުވަހުން ހަވީރު 18:00 ފެށިގެން މެލޭޝިޔާގެ މީހުން ރާއްޖެ އައުން މަނާކޮށްފައިވާ ކަމަށެވެ. އަދި އިނގިރޭސިވިލާތުގެ މީހުން މި މަހުގެ 19 ވާ ބުރާސްފަތި ދުވަހުގެ 00:00 އިން ފެށިގެން ރާއްޖެއައުން މަނާކޮށްފައިވާ ކަމަށެވެ.
ކޮވިޑް-19 ދުނިޔޭގައި ފެތުރެން ފެށުމާއި އެކު އެންމެ ފުރަތަމަ ފިޔަވަޅެއްގެ ގޮތުން ޗައިނާއިން މީހުން ރާއްޖެ އައުން މަނާކުރިއެވެ. އެއާއި އެކު އޭގެ ފަހުން އިރާން، ކޮރެޔާ، ޖަރުމަން އަދި ސްޕެއިން އިން މީހުން އައުން ވަނީ މަނާކޮށްފައެވެ.
މިހާރު ދުނިޔޭގެ ގިނަ ގައުމުތަކަކުން ވަނީ އެ ގައުމުތަކަށް މީހުން އެތެރެވުން މަނާކޮށް ނުވަތަ ލިމިޓްކޮށް، ސަރަހައްދީ ރޮނގުތައް ބަންދުކޮށްފައެވެ. އަވަށްޓެރި ސްރީލަންކާއިން ވެސް ވަނީ ވައިގެ މަގުން އެ ގައުމަށް މީހުންނަށް އެތެރެނުވެނޭ ކަން އިއުލާންކޮށްފައެވެ. އަދި މެލޭޝިއާ ވެސް ވަނީ ލޮކްޑައުން ކޮށްފައެވެ.
