ރާއްޖޭގައި ފެތުރެމުންދާ ކޮރޯނާވައިރަސް (ކޮވިޑް-19) އާއި ގުޅިގެން މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) ކްލަބު ހައުސް ބަންދުކުރަން އެ އެސޯސިއޭޝަނުން ނިންމައިފި އެވެ.

މިމަހުގެ 12 ވަނަ ދުވަހު ވަނީ ރާއްޖޭގައި ފުރަތަމަ ފަހަރަށް ސިއްހީ ކުއްލި ނުރައްކަލުގެ ހާލަތު އިއުލާންކޮށްފައެވެ. އަދި އާދީއްތަ ދުވަހު ކުޅިވަރާ ބެހޭ ވުޒާރާއިން ވަނީ ކޮރޯނާވައިރަސް (ކޮވިޑް-19) އާ ގުޅިގެން ރައްކާތެރި ފިޔަވަޅު އެޅުމުގެގޮތުން މާލޭ ސަރަހައްދުގައި ގާއިމްކޮށްފައިވާ ކުޅިވަރު ކުޅޭ ތަންތަން ބަންދުކުރުމަށްވެސް ނިންމާފައެވެ. އަދި އެ ނިންމުން ނިންމީ ގިނަ މީހުން އެއްތަނަކަށް ޖަމާވެގެން ހިންގާ ހަރަކާތްތައް ހުއްޓުވުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ގިނަ ފިޔަވަޅުތަކެއް އަޅަމުންދާތީ، އެ އެޖެންސީގެ ލަފާގެ މަތިން ކަމަށްވެސް ވުޒާރާއިން ވަނީ ބުނެފައެވެ.

އެއާއެކު އެމްޕީބީއޭ ކްލަބު ހައުސް ބައުންދުކުރަން ނިންމިއިރު، އެ އެ އެސޯސިއޭޝަނުން ބުނީ އެ ނިންމުން ނިންމީ ކުޅިވަރާ ބެހޭ ވުޒާރާގެ ލަފާގެ މަތިން ކަމަށެވެ.

އެމްޕީބީއޭ ކްލަބު ހައުސް ބަންދުކޮށް ކުޅިވަރު ހަރަކާތްތައް ހުއްޓާލިއިރު، ރާއްޖޭގައި ބާއްވަމުން އަންނަ އެކު ކުޅިވަރު މުބާރާތްތައް މިހާރު އަންނަނީ ފަސްކުރަމުންނެވެ. އެގޮތުން އެފްއޭއެމުން ވަނީ އެ އިދާރާއިން އިންތިޒާމުކުރާ ހުރިހާ މުބާރާތްތަކެއް ފަސްކުރުމުގެ އިތުރަށް، ވައިޑީޕީ ހަރަކާތްތައް ވަގުތީ ގޮތުން ހުއްޓާލާފައެވެ. އޭގެ އިތުރަށް ރިސޯޓުތަކުގެ މެދުގައި ބާއްވަމުން އަންނަ ރިސޯޓު ލީގާއި، ކްލަބު މޯލްޑިވްސް ކަޕުގެ އިތުރުން ބެޑްމިންޓަން އެސޯސިއޭޝަން އޮފް މޯލްޑިވްސް އާއި އެތުލެޓިކްސް އެސޯސިއޭޝަން އޮފް މޯލްޑިވްސް އާއި މޯލްޑިވްސް ސާފިންގ އެސޯސިއޭޝަނުން ވަނީ އެ އެސޯސިއޭޝަންތަކުގެ ހުރިހާ ހަރަކާތްތަކެއްވެސް ހުއްޓާލާފައެވެ.

ރާއްޖެއިން ކޮރޯނާވައިރަސް (ކޮވިޑް-19) އަށް ޕޮޒިޓިވްވި މީހުންގެ އަދަދު މިހާރު ވަނީ 13 އަށް އަރާފައެވެ.