މިހާރު މުޅި ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ބިރުވެރިކަން ބޮޑުވެފައި އޮއްވާ މެޗު ކުޅެން ޖެހުމުން އެކަމާ ހިތްހަމަނުޖެހުން ފާޅުކުރުމުގެ ގޮތުން ބްރެޒިލްގެ ގްރެމިއޯ އާއި ބޮޓަފޯގޯގެ ކުޅުންތެރިން މާސްކުއަޅައިގެން ދަނޑަށް އަރާ މުޒާހަރާކޮށްފި އެވެ.
ދުނިޔޭގެ ސިއްހަތު ޖަމިއްޔާ (ޑަބްލިޔު.އެޗް.އޯ) އިން ދާދި ފަހުން ވަނީ ކޮރޯނާވައިރަސް (ކޮވިޑް-19) އަކީ މުޅި ދުނިޔެ އަށް ފެތުރިފައިވާ ބަލިމަޑުކަމެއް ކަމަށް ނިންމާފައެވެ.
ގިނަ ގައުމުތަކުން ކޮރޯނާ ވައިރަސް ފެނިފައިވާއިރު، ފުޓްބޯޅައިގެ އެންމެ ނަން މަޝްހޫރު ސަރަހައްދުތަކުގެ ލީގުތައް މިހާރު ވަނީ މެދު ކަނޑާލާފައެވެ. އެގޮތުން އިނގިރޭސި ޕްރިމިއާ ލީގާއި، އިޓާލިއަން ލީގާއި، ސްޕެނިޝް ލީގާއި، ފްރެންޗު ލީގުގެ އިތުރުން ޖަރުމަން ލީގުގެ މެޗުތައް ވަނީ މެދުކަނޑާލާފައެވެ.
މީގެ އިތުރުން ޔޫރަޕުގެ އެންމެ ބޮޑު ދެ މުބާރާތް ކަމަށްވާ ޔުއެފާ ޗެމްޕިއަންސް ލީގާއި، ޔުއެފާ ޔޫރޮޕާ ލީގު ޔުއެފާއިން ވަނީ މިމަހުގެ 20 ވަނަ ދުވަހުގެ ނިޔަލަށް ފަސްކޮށްފައެވެ.
އެކަމަކު ބްރެޒިލްގައި ސަޕޯޓަރުން ނުވައްދާ ލީގުގެ ކުޅުން ކުރިއަށް ގެންދަން ނިންމިއިރު، ލީގުގައި މި ހަފުތާގައި ކުޅުނު މެޗުތަކަށް ގްރެމިއޯ އާއި ބޮޓަފޯގޯގެ ކުޅުންތެރިން ލައިނަށް ނުކުތީ މާސްކު އަޅައިގެން މުބާރާތް ހުއްޓާލަން އެދި ނުސީދާކޮށް މެސެޖެއް ދިނުމުގެ ގޮތުންނެވެ.
މިއާއެކު ބްރެޒިލް ފުޓްބޯޅަ ކޮންފަޑެރޭޝަނުން ވަނީ ގައުމީ ހުރިހާ މުބާރާތްތަކެއް މެދުކަނޑާލަން އަންގާފައެވެ. އެކަމަކު ސްޓޭޓް މުބާރާތްތައް ހުއްޓާލާނެތޯ ނިންމާނީ ލޯކަލް ފެޑެރޭޝަންތަކުން ކަމަށް ކޮންފަޑެރޭޝަނުން ވަނީ ބުނެފައެވެ.
ބްރެޒިލުން މިހާތަނަށް ކޮރޯނާ ވައިރަހަށް 203 މީހަކު ވަނީ ޕޮޒިޓިވްވެފައެވެ.
