ކޮވިޑް-19: ކަރަންޓީން ކޮށްފައި ހުންނަ މީހަކު އާންމުންގެ ތެރޭގައި އުޅުމަކީ ކުށެއް: ޕީޖީ
16 މާރިޗު 2020 | ހޯމަ 11:47މިކުށުގެ ޖިނާޔަތުގެ އެންމެބޮޑު އަދަބަކީ ހަތަރު އަހަރާއި 7 މަހާއި 6 ދުވަހަށް ޖަލަށްލުން
ޕީޖީ ހުސައިން ޝަމީމު
ދިވެހިރާއްޖޭގެ ޤާނޫނުލްޢުޤޫބާތުގައި ބަޔާންކޮށްފައިވާ ގޮތުން، މީހަކު ފަރުވާލެއްނެތި ކުރާ ޢަމަލެއްގެ ސަބަބުން، (އެހެން)މީހަކަށް، އޭނާ މަރުވެދާނެކަމުގެ ނުވަތަ އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވައިފިނަަމަ، އެ ޢަމަލު ހިންގި މީހާ އެކުރަނީ ކުށެއްކަމަށް ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމު ވިދާޅުވެއްޖެ އެވެ.
ޕީޖީ ޝަމީމު މިހެން މިވިދާޅުވީ، ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19)އަށް ޕޮޒިޓިވްވި ނުވަތަ ކޮވިޑް-19 ގެ އަލާމާތްތައް ހުރި ކަމަށް ޝައްކުކުރެވޭ ބައެއް ފަރާތްތަކުން އާންމުންގެ ސިއްހަތަށް ނުވިސްނާ އާންމުގެ ތެރޭގައި އުޅޭކަމަށް ދެކެވެމުންދާ ވާހަކަތަކާއ ގުޅިގެންނެވެ.
އެފަދަ ބައެއް ހާދިސާތައް ވަނީ ހިނގާފަ އެވެ. އަނަންތަރާ ދިގު ރިސޯޓުން ކޮރޯނާއަށް ޕޮޒިޓިވްވި މީހަކާ ކޮންޓެކްޓްވި (ވައިރަސް އަރާފަދަ ގާތްކަމެއް އޮތް) ދިވެއްސަކު، މިގެ ދެ ދުވަސްކުރިން ހުޅުމާލެއަށް އައިސް އުޅެފައިވާތީއާއި އޭނާ ހުޅުމާލޭގެ ބައެއް ސަރަހައްދުތަކަށް ގޮސްފައިވާ ކަމަށްބުނެ ބައެއް މީހުން ގެންދަނީ އެކަމުގެ ކަންބޮޑުވުން ފާޅުކުރަމުން ނެވެ. ހޮނިހިރު ދުވަހު އޭނާ ވަނީ ފަރުކޮޅުފުށި ކަރަންޓީން ފެސިލިޓީއަށް ގެންގޮސްފަ އެވެ. އަދި އޭނާގެ ޓެސްޓުތައް މިހާރު ދަނީ ހަދަމުން ނެވެ.
މީގެއިތުރުން، ފުވައްމުލަކު ސީޓީގައި ބަނދަރުކުރި، އައިލެންޑް ސަފާރީގައި ދެ ފަތުރުވެރިޔަކު ކޮވިޑް-19 އަށް ޕޮޒިޓިވް ވެފައިވާއިރު، އެ ސަފާރީގައި ތިބި ދިވެހިންތަކެއް ފުވައްމުލަކަށް ފޭބި ކަމަށްވެއެވެ. އެކަމާވެސް ގިނަ ބަޔަކު ދަނީ ކަންބޮޑުވުން ފާޅުކުރަމުން ނެވެ.
ރައްޔިތުންގެ މިފަދަ ކަންބޮޑުވުންތަކާއެކު، ޕީޖީ ޝަމީމު ވަނީ ޤާނޫނުލްޢުޤޫބާތުގެ އެކަމާގުޅޭ މާއްދާތައް ހެލްތު ޕްރޮޓެކްޝަން އެޖެންސީ (އެޗްޕީއޭ)އަށާއި ފުލުހުންގެ އިތުރުން ބައެއް ޑޮކްޓަރުންނަށް ވެސް ޓެގް ކުރައްވާފައެވެ.
ދިވެހިރާއްޖޭގެ ޤާނޫނުލްޢުޤޫބާތުގެ 120 ވަނަ މާއްދާގެ (ހ)ގައި ބުނަނީ، މީހަކު ފަރުވާލެއްނެތި ކުރާ ޢަމަލެއްގެ ސަބަބުން، (އެހެން)މީހަކަށް، އޭނާ މަރުވެދާނެކަމުގެ ނުވަތަ އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވައިފިނަަމަ، އެ ޢަމަލު ހިންގި މީހާ އެކުރަނީ ކުށެކެވެ. އެއީ ޖުނަހްގެ އެއް ވަނަ ދަރަޖައިގެ ކުށެކެވެ. މި ކުށުގެ އަދަބަކީ ހަތަރު މަހާއި 24 ދުވަހުގެ ޖަލަށްލުމެވެ.
ޤާނޫނުލްޢުޤޫބާތުގެ 120 ވަނަ މާއްދާގެ (ރ)ގެ 1 ވަނަ ނަންބަރުގައި، ދަރަޖަ ކުރުމުގައި ބުނެފައިވަނީ، އެ ކުށުގެ ޢަމަލު ހިންގީ އިންސާނާގެ ފުރާނައަށް އެއްވެސް ފަރުވާލެއް ނެތް ގޮތުގައިކަމުގައި ރަމްޒުކޮށްދޭ ޙާލަތެއް ކަމުގައިވާނަމަ، އެ ކުށަކީ، ޖިނާޔަތުގެ 4 ވަނަ ދަރަޖައިގެ ކުށެކެވެ.
މިކުށުގެ އެންމެބޮޑު އަދަބަކީ ހަތަރު އަހަރަށް ޖަލަށްލުމެވެ. އަބަދު ކަނޑައެޅުމުގެ އަސާސީ މިންގަނޑަކީ އެއް އަހަރާއި 7 މަހާއި 6 ދުވަހަށް ޖަލަށްލުމެވެ.
