ޝެރަޓަން އައިލަންޑް ރިސޯޓުން ކޮވިޑް-19 ގެ އަލާމާތްތައް ހުރުމުން ޓެސްޓް ކުރި ދެ މީހުން ނެގަޓިވްކަމަށް އެޗްޕީއޭއިން ހާމަކޮށްފިއެވެ.

ހޯމަ ދުވަހު އެޗްޕީއޭއިން ކޮށްފައިވާ ޓުވީޓެއްގައި ބުނެފައިވަނީ، ކޮވިޑް-19 އަށް ޝައްކުކުރެވޭ އަލާމާތްތައް ހުރެގެން ޝެރަޓަން އައިލަންޑް ރިސޯޓު ނެގި 2 ޓެސްޓުގެ ނަތީޖާ ނެގެޓިވް ވެފައިވާތީ އެ ރަށްތަކުން މޮނިޓަރިންގްގެ ހާލަތުން ނަގާފައިވާކަމަށެވެ.

މިހާތަނަށް ފެނުނު ޕޮޒިޓިވް ކޭސްތައް

· ކުރެއްދޫ އައިލެންޑް ރިސޯޓް: 5

· ސޭންޑީޒް ބަތަލާ: 2

· އަނަންތަރާ ދިގު: 2

· ކުރަމަތި ރިސޯޓް: 2

· އައިލެންޑް ސަފާރީ: 2

ކޮވިޑް-19 ރާއްޖެއިން ފެނުމާއި ގުޅިގެން ސަރުކާރުން ވަނީ 30 ދުވަހުގެ މުއްދަތަށް ރާއްޖޭގައި އާންމު ސިއްހީ ކުއްލި ނުރައްކަލުގެ ހާލަތު އިއުލާންކޮށްފައެވެ. އަދި މި ހާލަތު އިއުލާންކުރުމަށް ފަހު، ސްކޫލްތަކާއި ޔުނިވަރސިޓީތަކާއި، އާންމުން އެއްވެ އުޅޭ ޕާކް ފަދަ ތަންތަން، ހޮނިހިރު ދުވަހުން ފެށިގެން ދެ ހަފުތާއަށް ބަންދުކުރަން ވަނީ ނިންމާފައެވެ.

އޭގެ އިތުރުން ގެސްޓްހައުސްތަކަށް އަންނަ ގެސްޓުން ޗެކްއިން ވުން ހުއްޓާލަން ވެސް ވަނީ އަންގާފައެވެ. އަދި ރިސޯޓްތަކާއި ސަފާރީތަކުން އެކްސްކަރޝަންއަށް ރަށްރަށަށް ދިއުން މަނާކޮށްފައެވެ.