ޖަލުތަކުގައި ތިބި ތާލިބާނުން މިނިވަންކުރުން އަފްޣާނިސްތާން ސަރުކާރުން ފަސްކޮށްފި

ޖަލުތަކުގައި ތިބި ތާލިބާން ޤައިދީން މިނިވަންކުރުން އަފްޣާނިސްތާން ސަރުކާރުން ފަސްކޮށްފައިވާ ކަމަށް އެގައުމުން ބުނެފިއެވެ.

މިއީ ދާދިފަހުން ތާލިބާނުންނާއި އެމެރިކާގެ ސަރުކާރާ ދެމެދު ވެފައިވާ ސުލްހައިގެ އެއްބަސްވުމާއި ފުށުއަރާ ކަމެކެވެ. ނެޝަނަލް ސެކިޔުރިޓީ ކައުންސިލްގެ ސްޕޯކްސްމަން ޖާވިދު ފައިސަލް ވިދާޅުވީ ގައިދީން މިނިވަންކުރުން ފަސްކޮށްފައިވަނީ ޖަލުތަކުގައި ތިބި ތާލިބާނުންގެ ލިސްޓު އަދިވެސް އިތުރަށް ބަލަން ބޭނުންވާތީ ކަމަށެވެ.

މިދިޔަ ހަފުތާގެ ކުރީކޮޅު އަފްޣާނިސްތާނުގެ ރައީސް އަޝްރަފް ޣަނީ ވިދާޅުވެފައިވަނީ ޖަލުތަކުގައި ތިބި 1500 ތާލިބާނުން ދޫކޮށްލާނެ ކަމަށެވެ. އެގޮތުން ހޮނިހިރު ދުވަހު މިގައިދީން ދޫކޮލަން ފަށާނެކަމަށާއި އަދި އިތުރު 3500 ގައިދީން ދޫކޮށްލާނީ ސުލްހައިގެ ވާހަކަތައް އިތުރަށް ކުރިޔަށްދާގޮތައް ރިޢާޔަތްކުރުމަށް ފަހުކަމަށް އަޝްރަފް ޣަނީ ވަނީ ވިދާޅުވެފައެވެ.

ތާލިބާނުން ވަނީ މިހުށަހެޅުން ގަބޫލުނުކޮށް މަދުވެގެން 5000 ގައިދީން ދޫކޮށްލުމަށް އެދިފައެވެ.

ފެބްރުއަރީ މަހުގެ 29 ވަނަ ދުވަހު އެމެރިކާ އާއި ތާލިބާނުންނާ ދެމެދު ވެވުނު އެއްބަސްވުމުގައި ބުނަނީ 14 މަސްދުވަހުގެތެރޭގައި އަފްޣާނިސްތާނުގައި ތިބި ބޭރު ގައުމުތަކުގެ ފައުޖުތައް އެގައުމު ދޫކޮށްދާންޖެހޭނެ ކަމަށެވެ. އަދި އެއާއެކު ތާލިބާނުން އަފްޣާނިސްތާނުގެ ފަސްގަނޑު ޓެރަރިސްޓް ހަމަލާތަކަށް ބޭނުންނުކުރާނެ ކަަމުގެ ޔަގީންކަންވެސް ދޭންޖެހެއެވެ.

ގައިދީން މިނިވަންކުރުން ފަސްކުރުމަށް އަފްޣާނިސްތާން ސަރުކާރުން ނިންމި ނިންމުމަށް ތާލިބާނުން އަދި މިހާތަނަށް އެއްވެސް އެއްޗެކޭ ބުނެފައެއް ނުވެއެވެ. އެހެންނަމަވެސް މިކަމާއި ގުޅިގެން ކުރިޔަށް ގެންދިޔުމަށް ހަމަޖެހިފައިވާ ސުލްހައިގެ ވާހަކަތަކަށް މަޑުޖެހުމެއް އަންނާނެކަމަށް ބެލެވެއެވެ.