ދުނިޔޭގައި މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19)އާ ގުޅިގެން ސަރުކާރު އޮފީސްތަކުގައި މަސައްކަތްކުރާ ސިވިލް ސަރވިސް މުވައްޒަފުންނާ މަސްކަތްކުރުމުގެ ވަގުތާ ގުޅޭގޮތުން ސަރުކާރުގެ ވިސްނުން ސިވިލް ސަރވިސް ކޮމިޝަން (ސީއެސްސީ)އާ ހިއްސާ ކުރައްވާފައިވާ ކަމަށް ސަރުކާރުން ބުނެފި އެވެ.

ހޮނިހިރު ދުވަހުން ފެށިގެން ދެ ހަފުތާ އަށް ޔުނިވަރސިޓީތަކާއި ކޮލެޖުތަކާއި ތަމްރީނުދޭ މަރުކަޒުތައް ބަންދުކުރަން ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޑިރެކްޓަ ޖެނެރަލް މައިމޫނާ އަބޫބަކުރު އަންގެވުމާއި ގުޅިގެން، ސަރުކާރުގެ އޮފީސްތަކުގައި މަސައްކަތްކުރުމުގައި ވިސްނުން ހުރީ ކިހިނެއްތޯ ނޫސްވެރިޔަކު ކުރި ސުވާލަކާ ގުޅިގެން ޓޫރިޒަމް މިނިސްޓަރު އަލީ ވަހީދު ވިދާޅުވީ، ސަރުކާރުގެ ވިސްނުން ސިވިލް ސަރވިސް ކޮމިޝަނާ ހިއްސާ ކޮށްފައިވާ ކަމަށެވެ. އިތުރު ތަފްސީލެއް އަލީ ވަހީދު ހާމައެއް ނުކުރައްވަ އެވެ. ނަމަވެސް ނޫސްވެރިންގެ ބައްދަލުވުމަށްފަހު، މައުލޫމާތު ދެއްވަމުން އަލީ ވަހީދު ވިދާޅުވީ، ސަރުކާރުންގެ އޮފީސްތަކުން ލިބެންޖެހޭ ހިދްމަތްތަކަށް ބުރޫ ނާރާނެގޮތަށް ސަރުކާރުގެ ބައެއް އޮފީސްތައް މިހާރު ވެސް ހިންގަމުންދާ ކަމަށެވެ. އެގޮތުން، މިހާރު ފެތުރެމުންދާ ކޮވިޑް-19 އާގުޅިގެން، ސަރުކާރުގެ ހުރިހާ އޮފީސްތަކެއްގައި ވެސް ވަކި އުސޫލެއްގެ ދަށުން މަސައްކަތް ކުރުމާއި ރައްޔިތުންނަށް ފޯރުކޮށްދެންޖެހޭ ހިދްމަތްތައް ފޯރުކޮށްދިނުމަކީ ކުރެވިދާނެ ކަމެއް ކަމަށެވެ.

މިހާރު މުޅި ދުނިޔޭގައި ހަލުވި ކަމާއެކު ފެތުރެމުންދާ ކޮވިޑް-19 އާ ގުޅިގެން ރާއްޖެއިން ވެސް އެކަށީގެންވާ ރަނގަޅު ފިޔަވަޅުތަކެއް ދަނީ އަޅަމުންނެވެ.

ސްކޫލްތަކުގެ އެއް ހަފްތާގެ ޗުއްޓީއާއެކު، އިތުރު އެއް ހަފްތާއަށް މިވަނީ ސްކޫލްތަކުގެ ކިޔެވުން މަޑު ޖައްސާލާފަ އެވެ. އަދި ހާލަތަށް ބެލުމަށްފަހު، ސްކޫލްތައް ހުޅުވުމާމެދު ގޮތެއް ނިންމާނެ ކަމަށްވެސް ސަރުކާރުން ވަނީ ބުނެފަ އެވެ.

ހޮނިހިރު ދުވަހުން ފެށިގެން ދެ ހަފުތާ އަށް ޔުނިވަރސިޓީތަކާއި ކޮލެޖުތަކާއި ތަމްރީނުދޭ މަރުކަޒުތައް ބަންދުކުރަން ސަރުކާރުން ނިންމާފައިވާއިރު ރިސޯޓްތަކުން ރަށްރަށަށް ކުރާ ދަތުރުތަކާއި ރަށްރަށުން ރިސޯޓްތަކަށް ކުރާ ދަތުރުތައް ހޮނިހިރު ދުވަހުގެ އިރުއޮއްސި 18:00 އިން ފެށިގެން 14 ދުވަސް ވަންދެން ނުކުރުމަށްވެސް ސަރުކާރުން ވަނީ އަންގާފަ އެވެ.

މީގެއިތުރުން ހޮނިހިރު ދުވަހުގެ ރޭ 12:00ގެ ފަހުން މާލެ ސިޓީގައި ހިމެނޭ، މާލެ، ހުޅުމާލެ އަދި ވިލިމާލޭގައި ހުރި އެއްވެސް ގެސްޓް ހައުސަކަށް އެއްވެސް ފަތުރުވެރިޔަކު ކުރިއަށް އޮތް 14 ދުވަސް ވަންދެން "ޗެކްއިން" ނުވެވޭނެ ކަމަށާއި ނަމަވެސް މިވަގުތު ގެސްޓް ހައުސްތަކުގައި ތިބި ފަތުރުވެރިންނަށް "ޗެކްއައުޓް"ވެ، ފުރައިގެން ދިއުމަކަށް އެއްވެސް ހުރަހެއް ނެތްކަމަށް ސަރުކާރުން ބުނެފައި ވެއެވެ.