ޔުއެފާ ޗެމްޕިއަންސް ލީގުގެ ދެވަނަ ބުރުގައި ރެއާލް މެޑްރިޑާއި މެންޗެސްޓާ ސިޓީ ބައްދަލުކުރާ މެޗާއި، ޔުވެންޓަސް އާއި ލިޔޯން ބައްދަލުކުރާ މެޗު ފަސްކުރުމަށް ޔުއެފާއިން ނިންމައިފިއެވެ.

ޔުއެފާއިން މިހެން ނިންމިއިރު، ޔުވެންޓަސް އަދި ރެއާލް މެޑްރިޑްގެ ކުޅުންތެރިން ވަނީ ކަރަންޓީނު ކޮށްފައެވެ.

ޔުވެންޓަސްގެ ކުޅުންތެރިން ކަރަންޓީނުކުރީ އެޓީމުގެ ޑިފެންޑަރު ޑެނިއެލް ރުގާނީ ކޮރޯނާވައިރަސް (ކޮވިޑް-19) އަށް ޕޮޒިޓިވް ވުމާއި ގުޅިގެންނެވެ. އަދި ރެއާލްގެ ކުޅުންތެރިން ކަރަންޓީނުކުރީ އެ ކްލަބްގެ ބާސްކެޓްބޯޅަ ޓީމުގެ ކުޅުންތެރިންތަކެއް ކޮރޯނާވައިރަސް (ކޮވޑް-19) އަށް ޕޮޒިޓިވް ވުމާއި ގުޅިގެންނެވެ.

ޔުއެފާއިން މި ނިންމުން ނިންމުމަށްފަހު ބުނީ މި ނިންމުން ނިންމަން ޖެހުނީ ރެއާލާއި ޔުވެންޓަސްގެ ކުޅުންތެރިން ކަރަންޓީނު ކުރުމާއި ގުޅިގެންނާއި، ޔޫރަޕުގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) އެންމެ ގަދަ އަށް ފެތުރެމުން އަންނަނީ ސްޕެއިންނާއި އިޓަލީގައި ކަމަށް ވުމުން ކަމަށެވެ.

ކޮރޯނާވައިރަސް (ކޮވިޑް-19) ގެ ސަބަބުން ޔޫރަޕްގެ ބޮޑެތި ގައުމުތަކުގެ ލީގުގެ މެޗުތައް ފަސްކުރަމުން އަންނައިރު ސްޕެނިޝް ލީގާއި އިޓާލިއަން ލީގުގެ މެޗުތައް ނުކުޅުމަށް ވަނީ ނިންމައިފައެވެ. އަދި ފްރެންޗް ލީގާއި ޖަރުމަނު ލީގުގެ އިތުރުން ޕްރިމިއާ ލީގުގެ މެޗުތަކަށް ސަޕޯޓަރުން ނުވެއްދުމަށް އެގައުމު ތަކުގެ ސަރުކާރުން ވަނީ ނިންމައިފައެވެ.

އިޓަލީގައި މިހާތަނަށް ކޮރޯނާވައިރަސް (ކޮވިޑް-19) 15،113 މީހުންނަށް ޖެހިފައިވާއިރު މި ބަލީގައި އެގައުމުން 1،016 މީހުން ވަނީ މަރުވެފައެވެ. އަދި ސްޕެއިންގައި މި ބަލި ޖެހުނު މީހުންގެ އަދަދު 3،059 އަކަށް އަރައިފައިވާއިރު މި ބަލީގައި އެގައުމުން 86 މީހުން ވަނީ މަރުވެފައެވެ.