ފާއިތުވި ހަފުތާއެއްގެ ތެރޭގައި ބޭރު ޤައުމުތަކަށް ދަތުރުކުރުމަށް ފަހު އަނބުރާ ލަންކާ އަށް ދިޔަ 170 މީހަކު ކަރަންޓީނު ކޮށްފިއެވެ.
ލަންކާގެ ނޫސްތަކުން ރިޕޯޓުކުރާ ގޮތުން ކަރަންޓީނު ކޮށްފައިވާ 170 މީހުންނަކީ ކޮވިޑް-19 މިހާރު އެންމެ ބޮޑަަށް ފެތުރެމުންދާ ޤައުމުތަކަށް ކަމަށްވާ ދެކުނު ކޮރެއާ، އިޓަލީގެ އިތުރުން އިރާނަށް ދަތުރުކޮށްފައިވާ މީހުންނެވެ. އެމީހުން ކަރަންޓީނު ކުރަނީ 14 ދުވަހުގެ މުއްދަތަކަށެވެ.
ލަންކާ ސަރުކާރުން ވަނީ މީހުން ކަރަންޓީނުކުރަން ޚާއްޞަ ޞަރަޙައްދުތަކެއްގައި ކަނޑައަޅާފައެވެ. ލަންކާގެ އޮންލައިން ނޫހަށް ދެެއްވި އިންޓަވިއުއެއްގައި އެ ޤައުމުގެ ޖެނެރަލް ހެލްތު ސަރވީސްގެ ޑިރެކްޓަރ ޑރ. އަނިލް ޖަޔަ ސިންހާ ވިދާޅުވީ، އެ ތިން ޤައުމުން ކަނޑު މަގުގެ އިތުރުން ވައިގެ މަގުން އެތެރެވާ އެންމެން 14 ދުވަހުގެ ކަރަންޓީނުގެ މުއްދަތު ފުރިހަމަ ކުރަންޖެހޭ ކަމަށެވެ. ލަންކާއިން ވަނީ މި ދުވަސްވަރު އަޅުކަންތަކުގައި އިންޑިއާ އަށް އެއްވެސް ގޮތަކަށް ޒިޔާރަތް ނުކުރުމަށް އިލްތިމާސް ކޮށްފައެވެ.
ކޮވިޑް-19 އިން ރައްކާތެރިވުމުގެ ގޮތުން އަތްދޮވުމަށާއި، މީހުން ގިނައިން އެއްވާ ތަންތަނަށް ނުދިޔުމަށް ލަންކާގެ ހެލްތު މިނިސްޓްރީން ވަނީ އިލްތިމާސްކޮށްފައެވެ. ޑިސެންބަރު މަހު ޗައިނާއިން ފެތުރެންފެށި ކޮވިޑް-19 އަށް މިހާތަނަށް އެއްލައްކަ އަށްވުރެ ގިނަ މީހުން ވަނީ ޕޮޒިޓިވްވެފައެވެ. އަދި މަރުވި މީހުންގެ ޢަދަދު އުޅެނީ ހަތަރުހާހަށް އަރާފައެވެ.
