ވަޒީފާއިން ވަކިކުރީ، ޓަރމިނަލް ޓީއެމްއޭއަށް ދޫކުރަން ދެކޮޅު ހެދުމުން: މުޖުތަބާ

ވަޒީފާއިން ވަކިކުރީ، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ތަރައްޤީކުރި އައު ސީ ޕްލޭން ޓަރމިނަލް ޓްރާންސް މޯލްޑިވިއަން އެއާރވޭސް (ޓީއެމްއޭ)އަށް ދިނުމާ ދެކޮޅު ހެދުމުން ކަމަށް އެމްއޭސީއެލްގެ ކުރީގެ ޖެނަރަލް މެނޭޖަރ، ކޮމަރޝަލް މުޖުތަބާ ލަޠީފު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މާލިއްޔަތު ކޮމެޓީން އަންގާރަ ދުވަހު ބޭއްވި ބައްދަލުވުމަށް، ވަޑައިގެން މުޖުތަބާ ވިދާޅުވީ އޭނާއަކީ އެމްއޭސީއެލްގެ އެކިއެކި ވަޒީފާތަކުގައި 23 އަހަރު ޚިދުމަތް ކުރައްވާފައިވާއިރު، އެއަރޕޯޓްގައި ސީ ޕްލޭން އައު ޓަރމިނަލެއް އެޅުމުގެ ޚިޔާލު ކުންފުނީގެ ބޯޑަށް ކަރުދާހެއް ހުށަހެޅުއްވީވެސް އޭނާ ކަމަށެވެ. އެއީ 2012 ވަނަ އަހަރުން ފެށިގެން 2015 ވަނަ އަހަރާ ހަމައަށް ހުންނެވީ ކޮމަރޝަލް ޖެނަރަލް މެނޭޖަރެއްގެ ގޮތުގައި ކަމަށެވެ. ނަމަވެސް ފަހުން އެހެން ޑިޕާޓްމަންޓަކަށް ބަދަލުކޮށް، ވަޒީފާއިން ކަނޑާލީ 2017 ވަނަ އަހަރު ކަމަށާއި އެ މައްސަލަ، ވަޒީފާއާ ބެހޭ ޓްރައިބިއުނަލަށް ހުށަހަޅައިގެން އެމައްސަލަ ނިމެންދަނިކޮށް، މިދިއަ ރިޔާސީ އިންތިޚާބު އިބްރާހީމް މުހައްމަދު ޞާލިޙު ކާމިޔާބުކުރެއްވުމާއި މަޤާމުގެ ހުވާ ކުރެއްވުމުގެ ކުރިން އަލުން އަނެއްކާވެސް އެމްއޭސީލުން ވަޒީފާ ހަމަޖައްސައި، ކޮމަރޝަލް ޑިޕާޓްމަންޓުގެ ޖެނެރަލް މެނޭޖަރުކަން އަނެއްކާވެސް ޙަވާލު ކުރެއްވި ކަމަށެވެ.

Advertisement

މުޖުތަބާ ވިދާޅުވީ، އައު ޓަމިނަލާ ގުޅޭ ގޮތުން އެންމެ ފުރަތަމަ ކަރުދާސް ހުށަހެޅުމާއި، އޭނާގެ ވަޒީފާ އެހެން ޑިޕާޓްމަންޓަކަށް ބަދަލު ކުރުމާއި އަދި ވަކިކުރުމަށްފަހު، އޭނާ އަނބުރާ އެމްއޭސީއެލްގެ ކޮމަރޝަލް ޑިޕާޓްމަންޓާ ޙަވާލުވިއިރު، އެދިޔަ މުއްދަތުގެ ތެރޭގައި އައު ސީ ޕްލޭންގެ މަސައްކަތް އޮތީ ވަރަށް ބޮޑަށް ކުރިއަށް ގެންގޮސްފަ ކަމަށެވެ.

އައު ސީ ޕްލޭން ޓަރމިނަލްގެ ކުއްޔަން ދިނުމުގައި ޓީއެމްއޭއާއެކު ހިންގާފައިވާ މުޢާމަލާތްތައް ހިންގާފައިވަނީ އޭރު، ކޮމަރޝަލް ޑިޕާޓްމަންޓާ އޭރު ޙަވާލުވެ ހުންނެވި ހުސައިން ފަޒީލް ކަމަށާއި، ނަމަވެސް ފަޒީލް ޢަމަލުކޮށްފައިވަނީ ކުންފުނީގެ ސެކްރެޓަރީއާއި ކުންފުނީގެ އޭރުގެ މެނޭޖިންގ ޑިރެކްޓަރ އާދިލް މޫސާގެ ލަފަޔާ އިރުޝާދުގެ މަތިންކަން ލިޔެކިޔުންތަކުން ފެންނަން އެބަހުރި ކަމަށެވެ.

މުޖުތަބާ ވިދާޅުވީ ވެލާނާ އިންޓަރނޭޝަނަލް އެއަރޕޯޓުގައި އެމިރޭޓްސްއަށް ނުވަތަ ގަތަރު އެއަރވޭސް ފަދަ ބޮޑެތި އެއަރލައިންތަކަށް ލައުންޖެއް ހަމަޖައްސާ ދީފާނެ ކަމަށެވެ.

މުޖުތަމާ ވިދާޅުވީ މިދައްކަނީ އެއަރލައިނެއް އޮޕަރޭޓް ބޭނުންނުވާ އެއްޗެއް ދޭ ވާހަކަ ކަމަށެވެ.

މުޖުތަބާ ވިދާޅުވީ ސީ ޕްލޭން އައު ޓަރމިނަލުން ކޮންމެ އެއަރލައިނަކަށް ބޮޑު ލައުންޖެއް ދިނުމުގެ ވިސްނުމެއް ނުގެންގުޅޭކަމަށާއި، ޙަޤީޤަތުގައި އައު ސީ ޕްލޭން ޓާރމިނަލުން ރިސޯޓުތަކަށް ލައުންޖްތައް ދޫކުރަން ވިސްނާފައިވާނީ އެއަރޕޯޓް ކުންފުނީގެ ފައިދާއަށް ކަމަށެވެ. އެގޮތުން މިހާރު އެއަރޕޯޓަށް ލިބޭ ޢާމްދަނީ ކަމަށްވާ 1.4 ބިލިއަން ރުފިޔާގެ 40 އިންސައްތައިގެ ސާފު ފައިދާގެ ކުރިއެރުމެއް ދައުލަތަށް ލިބިގެންދާނެ ކަމަށްވެސް މުޖުތަބާ ވިދާޅުވި އެވެ.

ކުރީގެ ރައީސް ޢަބްދުﷲ ޔާމީނުގެ ސަރުކާރުން އޮތީ، އައު ޓަރމިނަލްގެ ވަރަށް ބޮޑު ޞަރަޙައްދެއް އަކަމީޓަރަކަށް 10.35 ޑޮލަރުގެ ރޭޓުން 15 އަހަރު ދުވަހަށް ޓީއެމްއޭއަށް ދޭން އެއްބަސް ވެފައެވެ.

އައު ސީ ޕްލޭން ޓަރމިނަލް ގެ މި މައްސަލަ ފެންމަތިވެ، ރައީސުލްޖުމްހޫރިއްޔާ އިބްރާހީމް މުޙައްމަަދު ޞާލިޙުގެ ސަރުކާރުން ވަނީ ޓަރމިނަލްގެ 6،400 އަކަމީޓަރުގެ ޖާގަ, އަކަމީޓަރަކަށް 10.35 ޑޮލަރުގެ ރޭޓުން ޓީއެމްއޭ އަށް ދިނުމަށް އެއްބަސްވެފަ އެވެ. ސަރުކާރުން ދޫކުރަން ނިންމިގޮތާމެދު މަޖިލީހުން ވެސް ވަނީ ރުހުން ދީފަ އެވެ.

މުޖުތަބާ އެމްއޭސީއެލްގެ ވަޒީފާއިން ދެވަނަ ފަހަރަށް ވަކިކުރީ ރައީސް ޞާލިޙުގެ ސަރުކާރުގައި، އައު ސީ ޕްލޭން ޓަރމިނަލް މައްސަލަ ފެންމަތިވި ހިސާބުން، އެމްއޭސީއެލްގެ ބޯޑު މެންބަރު އިބްރާހީމް ނޫރައްދީން ނުފޫޒުން ކަމަށް ވެއެވެ.

މުޖުތަބާ ވިދާޅުވީ، އެމްއޭސީއެލްގެ ބޯޑުގައި މިހާރު ވެސް ތިއްބެވި ގިނަ ބޭފުޅުންނަކީ، ހަމަ ކުރިންވެސް ތިއްބެވި ބޭފުޅުން ކަމަށެވެ. އެގޮތުން އިބްރާހީމް ނޫރައްދީންގެ ނުފޫޒު ވަރަށް ބޮޑުކަމަށް މުޖުތަބާ ވިދާޅުވި އެވެ.