އެމްއެންޔޫއެސްޔޫ އިންޓަ ފެކަލްޓީ ވޮލީބޯޅަ މުބާރާތުގެ އަންހެން ޑިވިޝަނުގެ ތަށި ބީއެސް ބަލިކޮށް އެސްއެން އިން އުފުލައިލިއިރު ފިރިހެން ޑިވިޝަނުގެ ތަށި ބީއެސް ބަލިކޮށް ސީއެފްއެސް އިން އުފުލާލައިފިއެވެ.

އެމްއެންޔޫއެސްޔޫ އިން 2015 ވަނަ އަހަރުން ފެށިގެން ސިލްސިލާ ގޮތެއްގައި ބާއްވާ އެމްއެންޔޫއެސްޔޫ އިންޓަރ ފެކަލްޓީ ވޮލީ މުބާރާތުގެ އަންހެން ޑިވިޝަނުގައި ޖުމްލަ 8 ޓީމު ބައިވެރިވިއިރު، މި މުބާރާތުގެ ފިރިހެން ޑިވިޝަނުގައި 7 ޓީމުން ބައިވެރިވިއެވެ.

ހޮނިހިރު ދުވަހުގެ ހަވީރު ކުޅެވުނު އަންހެން ޑިވިޝަނުގެ ފައިނަލުގައި އެންމެ ފަހުގެ ޗެމްޕިއަން ބީއެސް ބަލިކޮށް އެސްއެން އިން ވަނީ މުބާރާތުގެ ތަށި އުފުލާލައިފައެވެ. ގިނަ އަދަދެއްގެ ސަޕޯޓަރުން ކުރިމަތީ ކުޅުނު މި މެޗު އެސްއެން އިން ކާމިޔާބުކުރީ 3 ސެޓު 2 ސެޓުންނެވެ. މެޗުގެ ފުރަތަމަ ދެ ސެޓު އެސްއެން އިން ވަނީ ފަސޭހަކަމާއިއެކު ކާމިޔާބުކޮށްފައެވެ. މި ދެ ސެޓު އެސްއެން އިން ކާމިޔާބުކުރީ 19-25 އަދި 15-25 އިންނެވެ. އެކަމަކު ޖެހިގެން އައި ދެ ސެޓުގައި ބީއެސްއިން ވަނީ އެޓީމުގެ ކުޅުން ރަނގަޅުކޮށް އެ ދެ ސެޓު ކާމިޔާބުކޮށްފައެވެ. މި ދެ ސެޓު ބީއެސްއިން ކާމިޔާބުކުރީ 16-25 އަދި 20-25 އިންނެވެ. މެޗުގެ ފަހު ސެޓުގެ ކުރީ ކޮޅު އެސްއެން އިން ވަނީ ބޮޑު ލީޑެއް ނަގައިފައެވެ. މި ސެޓު އެސްއެން އިން ކާމިޔާބުކުރީ 15-10 އިންނެވެ.

އަންހެން ޑިވިޝަނުގެ އެންމެ މޮޅު ހަ ކުޅުންތެރިންނަކީ އެފްއެޗްއެސްގެ އާމިނަތު އަފާފް ނިޒާމް، އެސްއެންގެ އާމިނަތު ފިރުޝާ، އެސްއެންގެ މަރިޔަމް ނިޝާ، ބީއެސްގެ ޝަމްހާ ރިޔާޒް އަދި ބީއެސްގެ އިނާޝާ އަބްދުއް ރަހީމް އެވެ. އަދި މި މުބާރާތުގެ އެންމެ މޮޅު ލިބަރޯ އަކީ ސީއެފްއެސްގެ އާމިނަތު ފަސީހާ އެވެ. އަދި މި ޑިވިޝަނުގެ އެންމެ މޮޅު ކުޅުންތެރިޔަކީ އެސްއެންގެ އައިޝަތު ޒުނީތާ އެވެ. އަދި މި ޑިވިޝަނުގެ އެންމެ މޮޅު ކޯޗަކީ އެސްއެންގެ ކޯޗު ޝުއައިބް އަހުމަދެވެ.

މި މުބާރާތުގެ ފިރިހެން ޑިވިޝަނުގެ ޗެމްޕިއަންކަން ބީއެސް ބަލިކޮށް ކާމިޔާބުކޮށްފައިވަނީ ސީއެފްއެސް އިންނެވެ. މިއީ މި މުބާރާތް ސީއެފްއެސްއިން ކާމިޔާބުކުރި ފުރަތަމަ ފަހަރެވެ. ސީއެފްއެސްއިން މި މުބާރާތް ކާމިޔާބުކުރީ މެޗަކުން ބަލިނުވެއެވެ.

ފައިނަލް މެޗު ސީއެފްއެސްއިން ކާމިޔާބުކުރީ ފަސޭހަކަމާއިއެކު ސީދާ ތިން ސެޓުންނެވެ. މެޗުގު ފުރަތަމަ ސެޓު ސީއެފްއެސްއިން ފަސޭހަ ކަމާއިއެކު 25-18 އިން ކާމިޔާބުކުރިއިރު ބީއެސް އިން ވަނީ ދެ ވަނަ ސެޓުގައި އެޓީމުގެ ކުޅުން ރަނގަޅުކޮށްފައެވެ. ދެވަނަ ސެޓުގެ ކުރީކޮޅު ބީއެސްއިން ލީޑު ކުރިނަމަވެސް ސީއެފްއެސްއިން ވަނީ ފަހަތުން އަރާ މި ސެޓު 28-26 އިން ކާމިޔާބުކޮށްފައެވެ. އަދި މެޗުގެ ފަހު ސެޓު ސީއެފްއެސް އިން ކާމިޔާބުކުރީ 25-11 އިންނެވެ.

ފިރިހެން ޑިވިޝަނުގެ އެންމެ މޮޅު ހަ ކުޅުންތެރިންނަކީ ސީއެފްއެސްގެ ހުސެއިން ޝާހް، ސީއެފްއެސްގެ، އަހުމަދު މުޒްލިފް، އެފްއީގެ އަލީ އާރިފް، ބީއެސްގެ އިބްރާހީމް ރަޒީން، ބީއެސްގެ ހަސަން ޖައިލަމް ރިޔާޒް އަދި އެފްއީއެސްޓީގެ އަހުމަދު އަތޫފް އެވެ.

މި ޑިވިޝަނުގެ އެންމެ މޮޅު ހަގު ކުޅުންތެރިޔަކަށް ސީއެފްއެސްގެ މާދިހް މުހައްމަދު ހޮވުނުއިރު އެންމެ މޮޅު ކުޅުންތެރިޔަކީ ސީއެފްއެސްގެ މުހައްމަދު ޝަމްވީލް އެވެ. އަދި އެންމެ މޮޅު ކޯޗަކީ ބީއެސްގެ ކޯޗު ސޮފްވާން އަހުމަދެވެ.

އެމް.އެން.ޔޫ.އެސް.ޔޫގެ ފަރާތުން އެމް.އެން.ޔޫގެ ފެކަލްޓީތަކާއި ސެންޓަރ ތަކަށް އަމާޒުކޮށްގެން ބާއްވާ އެމް.އެން.ޔޫ.އެސް.ޔޫ އިންޓަރ ފެކަލްޓީ ވޮލީ މުބާރާތުގައި ދެ ޑިވިޝަނުން ޖުމްލަ 15 ޓީމު ވާދަކޮށްފައިވެއެވެ.