ރިސޯޓު ލީގު: ފައިނަލުގައި ނިޔާމަ އާއި ކަނޑިންމަގެ ކުރިމަތިލުމެއް

ރިސޯޓު ލީގު 2020 ގެ ދ. ޒޯނުގެ ފައިނަލަށް އެންމެ ފަހުގެ ޗެމްޕިއަން ނިޔާމަ ޕްރައިވެޓް އައިލެންޑްސް މޯލްޑިވްސް އާއި ކަނޑިންމަ މޯލްޑިވްސް ދަތުރުކޮށްފި އެވެ.

ދ. ޒޯނުގެ ކުޅުން ކަނޑިންމައިގައި ކުރިއަށްދާއިރު، އެންމެ ފަހުގެ ޗެމްޕިއަން ނިޔާމަ ފައިނަލަށް ދަތުރުކުރީ ހުކުރު ދުވަހު ހަވީރު ކުޅުނު ސެމީ ފައިނަލް ފުރަތަމަ މެޗުގައި ސެއިންޓް ރީޖަސް އަތުން ޕެނަލްޓީ ޝޫޓްއައުޓްގައި 4-2 އިން މޮޅުވެގެންނެވެ.

މި މެޗުގެ ފުރިހަމަ ވަގުރު ހަމަވިއިރު، ދެޓީމު އޮތީ 1-1 އިން އެއްވަރުވެފައެވެ. ސެއިންޓް ރީޖަސްގެ ލަނޑު އަހުމަދު މުރުޝިދު ކާމިޔާބުކޮށްދިންއިރު، ނިޔާމަގެ ލަނޑު ޖަހައިދިނީ ސައުދުﷲ ހުސެއިނެވެ.

ފުރިހަމަ ވަގުތު ހަމަވިއިރު، ދެޓީމު އެއްވަރުވެފައި އޮތުމުން ނަތީޖާ ނެރުމަށް ޖެހި ޕެނަލްޓީ ޝޫޓްއައުޓްގައި ސެއިންޓް ރީޖަސްއަށް ކާމިޔާބުކުރެވުނީ އެނމްމެ ޕެނަލްޓީ އެކެވެ. ނިޔާމައިން ވަނީ އެޓީމުގެ ތިން ޕެނަލްޓީވެސް ކާމިޔާބުކޮށްފައެވެ.

ފައިނަލްގެ ފަހު ޖާގަ ކަނޑިންމަ ހޯދީ ހުކުރު ދުވަހު ހަވީރު ކުޅުނު ސެމީ ފައިނަލް ދެވަނަ މެޗުގައި އަންގްސާނާ ވެލާވަރު އަތުން ފަސޭހަކަމާއެކު 8-0 އިން މޮޅުވެގެންނެވެ. މި މެޗުގައި ކަނޑިންމަ އަލީ ޝާމިއު އާއި އާގް ހަމީދު، މި ދެ ކުޅުންތެރިން ހެޓްރިކް ހެދިއިރު، އަޓީމުގެ އަނެއް ދެ ލަނޑު ޖަހައިދިނީ މުހައްމަދު ޝާހު އާއި އަބްދުﷲ ޔައުގޫބެވެ.

މުބާރާތުގެ ފައިނަލަށް ނިޔާމަ އާއި ކަނޑިންމަ ދަތުރުކުރިއިރު، ފައިނަލް މެޗު ކުޅޭނީ އަންނަ އާދީއްތަ ދުވަހު އެވެ.

ރިސޯޓު ލީގުގެ ފަރާތުން ކޮންމެ އަހަރަކު ވެސް ކުރިޔަށްގެންދާ މި މުބާރާތް މި އަހަރު ވެސް ކުރިޔަށްދަނީ ފަސް ޒޯނަކަށް ބަހާލައިގެން ނެވެ. އެއީ ދ. ޒޯނުގެ އިތުރުން ނޯތު މާލެ ޒޯނާއި، ބ. ޒޯނާއި، ސައުތު އަރި ޒޯން އަދި ސައުތު މާލެ ޒޯނެވެ.

އެއް މަސް ދުވަހަށް ދިގު ދެމިގެންދާ މި މުބާރާތުގައި މި އަހަރު 42 ރިސޯޓް ވާދަކުރާއިރު، 79 މެޗު ކުޅެވިގެންދާނެއެވެ.

މި މުބާރާތުގެ މި އަހަރު މީޑިއާ ޕާޓްނަރަކީ ރާއްޖެ ޓީވީ އެވެ.