ދިވެހި ފޮތްތެރިކަން އާލާކުރުމަށް ދިވެހި ބަހުގެ އެކެޑަމީ އާއި އެމްސެވަން އެއްބަސްވުމެއްގައި ސޮއިކޮށްފި
4 މާރިޗު 2020 | ބުދަ 13:20މައިގަނޑު މަޤްޞަދަކީ މުބާރާތްތަކެއް ހިންގައިގެން، ކުޑަކުދިންގެ އަދަބިއްޔާތުގެ ފޮތްތަކެއް ނެރުން
ދިވެހި ބަހުގެ އެކެޑަމީގެ ރައީސް އަޝްރަފް އަދި އެމް ސެވަންގެ އެމްޑީ ސައްތާރު، ސޮއި ކުރުމުގެ ރަސްމިއްޔާތުގެ ތެރެއިން
ދިވެހި ފޮތްތެރިކަން އާލާކުރުމާއި ކުޑަކުދިންގެ އަދަބިއްޔާތު ކުރިއެރުވުމަށްޓަކައި މަސައްކަތް ކުރަން ދިވެހި ބަހުގެ އެކެޑަމީ އާއި އެމް ސެވަންއާ ދެމެދު އެއްބަސްވެވޭ ފަހުމުނާމާއެއްގައި ސޮއިކޮށްފި އެވެ.
މި ފަހުމުނަމާގައި ސޮއިކުރުމުގެ ރަސްމިއްޔާތު ބާއްވާފައިވަނީ، ބުދަ ދުވަހު ދިވެހި ބަހުގެ އެކެޑަމީގަ އެވެ. އެ ފަހުމުނާމާގައި ދިވެހި ބަހުގެ އެކެޑަމީގެ ފަރަތުން ސޮއިކުރެއްވީ އެކެޑަމީގެ ރައީސް އަޝްރަފް އަލީ އެވެ. އެމް ސެވަންގެ ފަރާތުން ސޮއި ކުރެއްވީ އެމް ސެވަންގެ މެނޭޖިންގ ޑިރެކްޓަރ މުހައްމަދު އަބްދުއްސައްތާރު އެވެ.
ދިވެހި ފޮތްތެރިކަން އާލާކުރުމާއި ކުޑަކުދިންގެ އަދަބިއްޔާތު ކުރިއެރުވުމަށްޓަކައި މަސައްކަތް ކުރަން ވެވުނު އެއްބަސްވުމާގުޅޭ ގޮތުން ދިވެހި ބަހުގެ އެކަޑަމީގެ ރައީސް އަޝްރަފް ވިދާޅުވީ، މިއީ ވަރަށް މުހިއްމު މަސައްކަތެއްގެ ފެށުން ކަމަށެވެ. އެގޮތުން ދިވެހި އަދަބިއްޔާތުގައި، ކުޑަކުދިންނަށް ޝައުޤުވެރިކަމާއެކު ކިޔޭނެ ފޮތްތައް މަދުކަން އަބަދުވެސް ފާހަގަވާ ކަމަށާއި، އެމް ސެވަންއިން އިސްނަގައިގެން މިކަމަށް ހައްލެއް ގެނައުމަށް އެކަޑަމީއަށް ހުށަހެޅި ހުށަހެޅުމަކީ ވަރަށް ބޮޑަށް ބަލައިގަނެވޭ ހުށަހެޅުމެއް ކަމަށެވެ.
އެމް ސެވަންގެ މެނޭޖިންގ ޑިރެކްޓަރު ސައްތާރު ވިދާޅުވީ، މި ޕްރޮގްރާމަކީ އެއް އަހަރު ހިންގުމަށް ނިންމާލަން ރާވާފައިވާ ޕްރޮގްރާމެއް ނޫންކަމަށާއި މި ޕްރޮގްރާމް ތިން އަހަރަށް ނުވަތަ އެއަށްވުރެވެސް ދިގު މުއްދަތަށް ކުރިއަށް ގެންދެވޭ ޕްރޮގްރާމެއް ކަމަށެވެ.
ސައްތާރު ވިދާޅުވީ މިކަން ކުރަން ގަސްތުކޮށްފައިވަނީ، މުބާރާތެއްގެ ގޮތަށް ކުރިއަށް ގެންގޮސް، ދަރިވަރުންނަށް އަދަބިއްޔާތުގެ ތަކަތި ނުވަތަ ފޮތްތައް ތައްޔާރު ކުރުން ކަމަށެވެ. ސައްތާރު ވިދާޅުވީ، މުބާރާއި މި ޕްރޮގްރާމްގެ އިތުރު މައުލޫމާތުތައް ވަރަށް އަވަހަށް އާންމު ކުރައްވާނެ ކަމަށާއި އެކަމުގައި އަމަލީ ގޮތުން އުޅުއްވާނީ ތައުލީމީ ދައިރާގެ ބޭފުޅުން ކަމަށެވެ.
