ލިވަޕޫލް ކަޓުވާލުމަށްފަހު ޗެލްސީ ކުއާޓާއަށް

އިނގިރޭސި އެފްއޭ ކަޕްގެ ފަސްވަނަ ބުރުގައި ލިވަޕޫލް ބަލިކުރުމަށްފަހު ޗެލްސީ ކުއާޓާ ފައިނަލަށް ދަތުރުކޮށްފި އެވެ.

ޗެލްސީގެ ދަނޑުގައި އަންގާރަ ދުވަހުގެރޭ ކުޅުނު މެޗުން އެޓީމު މޮޅުވީ 2-0 އިންނެވެ. ޗެލްސީ އަތުން ލިވަޕޫލް ބަލިވިއިރު، މިއީ އެޓީމުން އެންމެ ފަހުން ކުޅުނު 4 މެޗުގެ ތެރެއިން ބަލިވި ތިންވަނަ މެޗެވެ.

މިމެޗުގެ ފުރަތަމަ ހާފު ލިވަޕޫލުން ޑޮމިނޭޓުކޮށްގެން ކުޅުނު ނަމަވެސް، މި ހާފުގެ ކުރީކޮޅު ޗެލްސީން ވަނީ ގާތްގާތުގައި ނުރައްކާތެރި ހަމަލާތަކެއް އުފައްދާފައެވެ. އެގޮތުން މެޗުގެ 13 ވަނަ މިނެޓުގައި ޗެލްސީން ވަނީ ލޑު ނަގާފައެވެ. ލިވަޕޫލްގެ މިޑްފީލްޑަރު ފެބީނިއޯ ހެދި ގޯހެއްގެ ފައިދާ ނަގައި މި ލަނޑު ޗެލްސީއަށް ކާމިޔާބުކޮށްދިނީ މިޑްފީލްޑަރު ވިލިއަން އެވެ.

އޭގެ ފަހުން ލިވަޕޫލުންވެސް ވަނީ ގާތްގާތުގައި ޗެލްސީގެ ގޯލާ އަމާޒުކޮށް ގިނަ ހަމަލާތަކެއް އުފައްދާފައެވެ. އެކަމަކު ޗެލްސީގެ ގޯލްކީޕަރު ކެޕާ އަރިއްޒަބަލާގާ ވަނީ ހުށިޔާރުކަމާއެކު އެ ހަމަލާތައް ހުއްޓުވާފައެވެ.

މި މެޗުގައި ޗެލްސީން ލީޑު ފުޅާކޮށްފައިވަނީ 64 ވަނަ މިނެޓުގައެވެ. ކައުންޓަ އެޓޭކެއްގައި މި ލަނޑު އެޓީމަށް ކާމިޔާބުކޮށްދިނީ މިޑްފީލްޑަރު ރޮސް ބާކްލީ އެވެ. އޭގެ ފަހުންވެސް ޗެލްސީއަށް ވަނީ އިތުރު ލަނޑެއް ޖެހުމަށް ރަނގަޅު ފުރުސަތުތަކެއް ލިބިގެން ގޮސްފައެވެ. އެގޮތުން މުޅިން ހުހަށްހުރެ ޕެޑްރޯ ރޮޑްރިގޭޒް ފޮނުވާލި ހަމަލާއެއް ލިވަޕޫލްގެ ގޯލްކީޕަރު އެޑްރިއަން ދިފާއުކުރިއިރު، އޮލިވިއޭ ޖިރޫޑް ފޮނުވާލި ހަމަލާއެއް ވަނީ ހުރަސް ދަނޑިއަށް އަމާޒުވެފައެވެ.

އަންގާރަ ދުވަހުގެރޭ ލިވަޕޫލް ބަލިކޮށް ކުއާޓާގެ ޖާގައެއް ޗެލްސީ ހޯދިއިރު، ވެސްޓް ބްރޮމް 3-2 އިން ބަލިކޮށް ނިއުކާސަލް ޔުނައިޓެޑްވެސް ވަނީ ކުއާޓާގެ ޖާގައެއް ހޯދާފައެވެ. އަދި ޝެފީލްޑް ޔުނައިޓެޑުން ވަނީ 2-1 އިން ރެޑިން ބަލިކޮށް ކުއާޓާއަށް ދަތުރުކޮށްފައެވެ.