އަންނަ ހުކުރު ދުވަހު އެމްޑީޕީގެ ދޮރުން ދޮރަށް ފަށަނީ
2 މާރިޗު 2020 | ހޯމަ 16:25އަންނަ ހުކުރު ދުވަހުގެ 14:00 ގައި ޑޯޓުޑޯ ފެށޭނެ
އެމްޑީޕީގެ \"ރަށްވެހި ފަތިސް\" ޕޯސްޓަރު ހަރުކުރުމުގެ ހަރަކާތް ފެށުމުގެ ރަސްމިއްޔާތުގެ ތެރެއިން
ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިހާބުގައި އެމްޑީޕީން ވާދަކުރާ ކެންޑިޑޭޓުންގެ ދޮރުން ދޮރަށް ފައްޓާނެ ކަމަށް އެމްޑީޕީން ބުނެފިއެވެ.
އެމްޑީޕީގެ ކެމްޕެއިން މައި އޮފީހުގައި ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން ކެމްޕެއިން ސްޕޯކްސްޕާސަން އަފްޝަން ލަތީފް ވިދާޅުވީ މިމަހުގެ 6 ވާ ހުކުރު ދުވަހުގެ މެންދުރުފަހު 14:00 އިން ފެށިގެން ރާއްޖޭގެ ހުރިހާ ރަށެއްގައި އެމްޑީޕީގެ ކެންޑިޑޭޓުންގެ ދޮރުން ދޮރަށް ހަރަކާތް ކުރިއަށް ގެންދާނެ ކަމަށެވެ. މާލެ ސިޓީ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމެޓީގައި ވާދަކުރާ އެމްޑީޕީގެ ހުރިހާ ކެންޑިޑޭޓުންނާއި ކެމްޕެއިން ޓީމްތައް ހަރަކާތްތެރިވާނެ ކަމަށެވެ.
މީގެއިތުރުން އަފްޝަން ވިދާޅުވީ، ކުރީގެ ރައީސް އަބްދުﷲ ޔާމީންގެ ވެރިކަމުގައި ރައްޔިތުންގެ ބައިވެރިވުން ވަރަށް ކުޑަ ކަމަށާއި، ކައުންސިލްތަކަށް މަސައްކަތް ނުކުރެވޭނެ ހުރިހާގޮތެއް ހަދައި މާލޭގައި ހުންނަ މިނިސްޓްރީތަކުން ކަންކަން ހަމަޖައްސަން ޖެހުނު ކަމަށެވެ.
ރައީސް ޔާމީނަކީ ލާމަރުކަޒީ ނިޒާމާ ދެކޮޅު ބޭފުޅަކަށްވާތީ، ލާމަރުކަޒީކޮށް ރާއްޖެ ހިންގަން އެނގޭ، އެވިސްނުންހުރި ބަޔަކަށް ކައުންސިލްތައް ހަވާލު ކުރުން މުހިއްމު ކަމަށާއި ދިވެހިރާއްޖޭ ލާމަރުކަޒީ އުސޫލުން ހިންގަން އެނގޭ ހަމައެކަނި ބަޔަކީ އެމްޑީޕީކަމަށް ވެސް އަފްޝަން ވިދާޅުވި އެވެ.
