ޔޫރަޕްގެ ވިސާ ހޯދަން ކުރަންޖެހޭ ދަތުރުތަކަށް ނިމުމެއް ގެނެސް މާލެއިން އެކަން ކުރެވޭ ގޮތް ހަދައިފި
މިއީ ދިވެހިރާއްޖޭގެ ތާރީހުގައި އަލަށް ޔޫރަޕްގެ ގައުމަކަށް ދަތުރުކުރުމަށް ބޭނުންވާ ވިސާ ދާއިމި ގޮތެއްގައި ލިބޭނެ ގޮތަށް ހުޅުވި ފުރަތަމަ ސެންޓަރު
ވީއެފްއެސް ވިސާ ސެންޓަރު ހުޅުވުމުގެ ރަސްމިއްޔާތުގައި ފޮރިން މިނިސްޓަރު ޝާހިދު (ކ) ޖަރުމަން ސަފީރު ޖޯން ރޯޑްސް (މ) ޗެކް ރިޕަބްލިކްގެ ސަފިރު މީލާން ހޮވަރުކާ (ވ) ސެންޓަރުގެ ނަންބޯޑުގެ ފޮތިގަނޑު ކަހާލަދެއ
ޔޫރަޕުގެ ޤައުމުތަކަށް ދަތުރުކުރުމަށް ވިސާ ހޯދުމަށް އަވަށްޓެރި ޤައުމުތަކަށް ދަތުރުކުރަންޖެހޭ ޖެހުން ނިމުމަކަށް ގެނެސް، ޖަރުމަން އަދި ޗެކް ރިޕަބްލިކްގެ ވިސާ ލިބޭނެ ވީއެފްއެސް ވިސާ ސެންޓަރެއް ފޮރިން މިނިސްޓްރީގައި ހުޅުވައިފިއެވެ.
މިއީ ދިވެހިރާއްޖޭގެ ތާރީޚުގައި އަލަށް ޔޫރަޕުގެ ޤައުމަކަށް ދަތުރުކުރުމަށް ބޭނުންވާ ވިސާ ދާއިމި ގޮތެއްގައި ލިބޭނެ ގޮތަށް ހުޅުވި ފުރަތަމަ ސެންޓަރެވެ. މި ސެންޓަރުން މިހާރުން ފެށިގެން ޖަރުމަން އަދި ޗެލކް ރިޕަބްލިކްގެ ވިސާ ލިބޭނެއެވެ. ރާއްޖޭގައި އަލަށް މިފަށާ ޚިދުމަތާއެކު، ޝެންގެން ވިސާ ހޯދުމަށް އަވަށްޓެރި ސްރީލަންކާއަށް ނުވަތަ އިންޑިއާއަށް ކުރަން ޖެހޭ ދަތުރުތަކަށް ނިމުމެއް އައިސް، ވިސާ ހޯދާ ފަރާތްތަކަށް ވަރަށް ބޮޑުތަކުން ޚަރަދު ކުޑަވެ، ޚިދުމަތް ހޯދަން ފަސޭހަވެގެންދާނެއެވެ.
ޖަރުމަންވިލާތުން ރާއްޖޭގައި ވިސާ ސެންޓަރެއް ޤާއިމުކުރާނެކަން މިނިސްޓަރ ޢަބްދުﷲ ޝާހިދު އިޢުލާންކުރެއްވީ މިދިޔަ ޑިސެންބަރު މަހުއެވެ. އަދި ކުރިއަށް އޮތްތަނުގައި ޔޫރަޕުގެ އިތުރު ޤައުމުތަކުންވެސް ރާއްޖޭގައި ތިބެގެން ޝެންގެން ވިސާ ނެގޭނެ އިންތިޒާމު ހަމަޖައްސަމުންދާނެކަމަށް އެމަނިކުފާނު އޭރު ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ފޮރިން މިނިސްޓަރ ޢަބްދުﷲ ޝާހިދު ވިދާޅުވީ ރާއްޖޭގައި އިފްތިތާޙު ކުރެވޭ ވިސާ ސެންޓަރަކީ ޔޫރަޕުގެ ޤައުމުތަކަށް މާލޭގައި ތިބެގެން ވިސާނަގައިގެން ދިޔުމުގެ ފުރުޞަތު ދިވެހި ރައްޔިތުންނަށް ހުޅުވިގެންދާ އޮފީހެއް ކަމަށެވެ. އަދި މި މަސައްކަތަކީ ރައީސް އިބްރާހީމް މުޙައްމަދު ޞާލިޙުގެ އިރުޝާދާއި ލަފާފުޅުގެ މަތިން މިދިޔަ އަހަރެއްހާ ދުވަހުގެ ތެރޭގައި ކުރެވުނު މަސައްކަތުގެ ހެޔޮ ނަތީޖާ ކަމަށް މިނިސްޓަރު ވިދާޅުވިއެވެ.
މިނިސްޓަރ ވިދާޅުވީ މިނިސްޓްރީގެ ލަނޑުދަނޑިއަކީ ރާއްޖޭގެ ރައްޔިތުންނަށް ވިލާތު އިއްތިހާދުގެ ޤައުމުތަކަށް ދިޔުމުން އޮން- އެރައިވަލް ވިސާ ޖެހުމުގެ ފުރުޞަތު ހޯދައި ދިނުން ކަމަށާއި، އެ މަސައްކަތް ވެސް ކާމިޔާބު ކުރައްވާނެ ކަމަށެވެ.
މި ރަސްމިއްޔާތުގައި ވާހަކަ ދައްކަވަމުން ޖަރުމަނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖޯން ރޯޑްސް ވިދާޅުވީ ވިސާ ސެންޓަރު ހުޅުވިގެން ދިޔުމަކީ ކުރިއަށް އެޅުނު ފިޔަވަޅެއް ކަމަށާއި، މިއީ ޙާޞިލުކުރެވުނު މުހިންމު ލަނޑުދަނޑިއެއް ކަމަށެވެ. އަދި ކުރިއަށް އޮތްތަނުގައި ޔޫރަޕުގެ ޤައުމުތަކަށް ދަތުރުކުރާ ދިވެހިންނަށް އަތުން އިތުރު ޚަރަދެއް ނުކޮށް ވިސާ ލިބުމަކީ ވެގެންދާނެ ކަމެއް ކަމަށް އޭނާ ސަފީރު ފާހަގަ ކުރެއްވިއެވެ.
މި ރަސްމިއްޔާތުގައި ވާހަކަ ދައްކަވަމުން ޗެކް ރިޕަބްލިކުން ރާއްޖެއަށް ކަނޑައަޅުއްވާފައި ހުންނަވާ ސަފިރު މީލާން ހޮވަރުކާ ވިދާޅުވީ، ވިސާ ސެންޓަރު ހުޅުވިގެން ދިއުމަކީ ރާއްޖޭގެ ތާރީޚުގައި ވެސް އަދި އެ ޤައުމުގެ ތާރީޚުގައި ކުރެވުނު ފާހަގަކޮށްލެވޭ މުހިންމު މަސައްކަތެއް ކަމަށެވެ. އަދި މިއީ ސިޔާސީ ގޮތުން ބެލިނަމަވެސް ކުރެވުނު މުހިންމު މަސައްކަތަކެއްކަން ސަފީރު ފާހަގަ ކުރެއްވިއެވެ.
ޖަރުމަންވިލާތާއި ޗެކް ރިޕަބްލިކްގެ ވިސާ މިހާރު ރާއްޖޭގައި ތިބެގެން ނެގޭނެ އިންތިޒާމު ހަމަޖެހުނުއިރު، ކުރިއަށް އޮތްތަނުގައި ޔޫރަޕުގެ އިތުރު ޤައުމުތަކުންވެސް ރާއްޖޭގައި ތިބެގެން ވިސާ ނެގޭނެ އިންތިޒާމު ހަމަޖައްސަމުންދާނެއެވެ.
މި ރަސްމިއްޔާތުގައި ޖަރުމަންވިލާތުގެ ސަފީރާއި، ޗެކް ރިޕަބްލިކްގެ ސަފީރުގެ އިތުރުން ޓޫރިޒަމް މިނިސްޓަރ އަލީ ވަހީދާއި، އެމްއެމްޕީއާރްސީއާއި، ޓޫރިޒަމް މިނިސްޓްރީގެ އިސް ބޭފުޅުންނާއި، މަޖިލިސް ބައެއް މެންބަރުން ބައިވެރިވެވަޑައިގެންނެވިއެވެ. ރައީސް އިބްރާހިމް މުޙައްމަދު ޞާލިޙު 2018 ވަނަ އަހަރު ވެރިކަމާއި ޙަވާލުވެވަޑައިގެން، ފޮރިން މިނިސްޓަރ ކަމުގެ މަޤާމަށް ޢަބްދުﷲ ޝާހިދު އައްޔަނުކުރެއްވުމަށް ފަހު ދިވެހިންނަށް ފަސޭހައިން ބޭރު ޤައުމުތަކުގެ ވިސާ ލިބޭނެ އިންތިޒާމު ސަރުކާރުން ދަނީ ހަމަޖައްސަމުންނެވެ.
އެގޮތުން ޔުނައިޓެޑް އަރަބް އެމިރޭޓްސް، ތައިލެންޑް، މޮރޮކޯ އަދި ރަޝިޔާއަށް ކުރިން ވިސާ ނެގުމަކާ ނުލައި ދިވެހިންނަށް މިހާރު ދަތުރުކުރެވޭއިރު، ދިވެހިންނަށް ސައޫދީ ޢަރަބިއްޔާއިން އޮން-އެރައިވަލް ވިސާ ލިބޭނެ އިންތިޒާމުވެސް މިހާރު ވަނީ ހަމަޖެހިފައެވެ. މީގެ އިތުރުން އަވަށްޓެރި ސްރީލަންކާ އަދި އިންޑިއާއިން ދިވެހިންނަށް ވިސާގެ ގިނަ ލުއިފަސޭހަތަކެއް މިހާރު ވަނީ ލިބިފައެވެ.
