މިނިސްޓަރު ބޭނުންވާ ޕީއެސް ނެގުން ކުރިން އޯކޭ، މިހާރު ސީއެސްސީއަށް އެކަން ކަމަކު ނުދިޔަ!
28 ފެބުރުއަރީ 2020 | ހުކުރު 02:20ރައީސް ޔާމީންގެ ވެރިކަމުގައި ގެނައި އެ އިސްލާހާއެކު މިނިސްޓަރު ބޭނުންވާ ޕަރމަނަންޓް ސެކްރެޓަރީން މަގާމުތަކަށް ނަގަމުން ދިޔަ
ސީއެސްސީގެ ރައީސް ޑރ. އަލީ ޝަމީމް، ނައިބު ރައީސް ޝަހީދު މުހައްމަދު، މެމްބަރު އިބްރާހިމް ޝަހީގު، އަލްއުސްތާޛް ޒަކަރިއްޔާ ޙުސައިން -
މިނިސްޓްރީތަކަށް ޕާމަނަންޓް ސެކްރެޓަރީން ޢައްޔަންކުރާއިރު އެ މިނިސްޓްރީއެއްގެ މިނިސްޓަރާ މަޝްވަރާކޮށް, މިނިސްޓަރުގެ ލަފާއާއެކު ޕަރމަނަންޓް ސެކްރެޓަރީން އައްޔަންކުރުމުގައި ޢަމަލުކުރާ އުޞޫލަށް އިޞްލާހު ގެންނަމުންދާ ކަމަށް ސިވިލް ސަރވިސް ކޮމިޝަނުން ބުނެފިއެވެ.
ސިވިލް ސަރވިސް ކޮމިޝަނުގެ މެމްބަރުން މަޤާމުގެ މަސްއޫލިއްޔަތު އަދާކުރުމުގައި އިހުމާލުވެފައިވާ ކަމަށްބުނެ، ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމެޓީން ދިރާސާ ކުރަމުންދާ މައްސަލާއާ ގުޅިގެން ސިވިލް ސަރވިސް ކޮމިޝަނުގެ މެމްބަރުން ނެރުއްވި ބަޔާނެއްގައި ބުނެފައިވަނީ، 2016 ވަނަ އަހަރު ސިވިލް ސަރވިސްގެ ޤާނޫނަށް މަޖިލީހުން ގެންނެވި އިޞްލާހާ ގުޅިގެން ޕަރމަނަންޓް ސެކްރެޓަރީގެ މަޤާމަށް މީހުން ޢައްޔަންކުރަނީ އެމިނިސްޓްރީއެއްގެ މިނިސްޓަރެއްގެ ލަފައާއެކު އެކޮމިޝަނުން އަމަލު ކުރަމުން އަންނަ އުސޫލުގެ ދަށުން ކަމަށެވެ.
ސިވިލް ސަރވިސް ކޮމިޝަނުން އެގޮތަށް ބުނެފައި މިވަނީ، ސަރުކާރުގެ އެކިއެކި މިނިސްޓްރީތަކަށް ޕަރމަނަންޓް ސެކްރެޓަރީން ނެގުމުގެ ކުރިން ކޮންމެ ފަހަރަކު ވެސް މަޤާމުގެ ޝަރުތު މަތިކޮށްފައި އަނެއްބައި ފަހަރު އެ މަޤާމުގެ ޝަރުޠުތައް ލުއިކޮށްފައިވާކަމަށް މަޖިލީހުގެ މިނިވަން މުއައްސަސާތަކާބެހޭ ކޮމެޓީން އެކަން ފާހަގަކޮށްފައިވާތީ އެވެ. އަދި ސިވިލް ސަރވިސް ކޮމިޝަނުން އެގޮތަށް ޢަމަލުކޮށްފައިވަނީ ސީދާ ވަކި ފަރާތަކަށް އެމަޤާމު ދިނުމަށްކަމަށް ކޮމިޓީއަށް ފާހަގަކުރެވިފައިވާ ކަމަށް މަޖިލީހުގެ މިނިވަން މުއައްސަސާތަކުގެ ކޮމެޓީގެ ބުނެފައިވެއެވެ.
ކުރީގެ ރައީސް އަބްދުﷲ ޔާމީންގެ ސަރުކާރުން ސިވިލް ސަރވިސް ކޮމިޝަނުގެ ގާނޫނަށް ގެނައި އެ އިސްލާހާމެދު އެކޮމިޝަނުން މީގެކުރިން އެއްވެސް އެއްޗެއް ބުނެފައެއް ނުވެއެވެ.
ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމު ވަނީ، މިދިއަ ރިޔާސީ އިންތިހާބުގެ ކެމްޕެއިން ދުވަސްވަރު، ރައީސް ޔާމީންގެ ކެމްޕެއިން ހަރަކާތްތަކުން ވެސް ފެނިފައެވެ.
ރައީސް ޔާމީންގެ ސަރުކާރުގެ ދުވަސްވަރު، ސިވިލް ސަރވިސް ކޮމިޝަނުގެ ނައިބު ރައީސް ޝަހީދު މުޙައްމަދު އެކޮމިޝަނަށް އައްޔަން ކުރައްވާފައިވަނީ ވެސް މަގާމުގެ ޝަރުތު ފުރިހަމަ ނުވެއެވެ. އެހެންކަމުން ޝަހީދު ސިވިލް ސަރވިސް ކޮމިޝަނުގެ މެމްބަރު ކަމަށް އައްޔަން ކޮށްފައިވަނީވެސް ގާނޫނާ ހިލާފަށެވެ.
މި މަހުގެ 10 ވަނަ ދުވަހު ބޭއްވި މިނިވަން މުއައްސަސަތަކުގެ ކޮމިޓީ ބައްދަލުވުމުގައި ސަރުކާރުގެ ވުޒާރާތަކުގެ މަސްއޫލިއްޔަތުތައް އަދާ ކުރުމުގައި ސިވިލް ސަރވިސް ކޮމިޝަން (ސީއެސްސީ) ގެ އެއްބާރުލުން ލިބެމުންދާ މިންވަރާއި ގުޅޭ ގޮތުން ވަޒީރުންނާއިއެކު މަޝްވަރާ ކުރައްވާފައިވެއެވެ. އެގޮތުން، މިނިސްޓަރުންނާއެކު ބޭއްވި ބައްދަލުވުމުގައި ދެކެވުނު ވާހަކަތަކުގެ މައްޗަށް ބިނާކޮށް، މިނިސްޓްރީތަކަށް މިހާރުގެ ސިވިލް ސަރވިސް ކޮމިޝަނުގެ ފަރާތުން އެކަށީގެންވާ އެއްބާރުލުން ލިބެމުން ނުދާކަން ފާހަގަކުރައްވާފައިވާތީ، ސިވިލް ސަރވިސް ކޮމިޝަނުގެ ހަތަރު މެންބަރުން ވަކިކުރުމުގެ މައްސަލަ ވީހާވެސް އަވަހަކަށް މަޖިލީހުގެ ތަޅުމަށް ފޮނުއްވުމަށް ކޮމިޓީން ވަނީ ނިންމާފައެވެ.
ސިވިލް ސަރވިސް ކޮމިޝަނުގެ މެމްބަރުކަމުން ވަކިކުރުމަށް ނިންމާފައިވަނީ ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމާއި، ކޮމިޝަންގެ ނައިބު ރައީސް ޝަހީދު މުހައްމަދާއި، އިބްރާހިމް ޝަހީގުގެ އިތުރުން އަލްއުސްތާޛް ޒަކަރިއްޔާ ޙުސައިނެވެ.
ސިވިލް ސަރވިސް ކޮމިޝަނުގައި ތިއްބަވަނީ ޖުމުލަ 5 މެންބަރުންނެވެ.
